1 Mndewa Mulungu kawalongela Musa na Haluni, 2 “Wapete welesi wa Kohasi, kulawa kabila da Walawi, kwa kusondelela ng'holo zawo na kaye za tati zawo. 3 Kwandusila walume weli na miyaka malongo matatu mbaka malongo matano, wowodaha kwingila muna isang'hano muladi wasang'hane hana dihema da Mulungu. 4 Sang'hano ya Wakohasi ikala kupapa via velile va hema da Mulungu.”

5 “Lusita lwa kusegeza dilago, Haluni na wanage wa chilume wezakwingila mgati na kudihulumusa dipanzia dili haulongozi wa sanduku da lagano na kudigubika sanduku da lagano kwa panzia ijo. 6 Uchanyha yake wezakwika mbende ya mnyama wa mwiibahali, wezakwika chitambala cha langi ya buluu. Maabaho wezakwingiza mibiki ya kupapila sanduku da lagano.

7 “Uchanyha ya meza ya kulavila magate yelile yoyokwikigwa haulongozi wa Mndewa Mulungu, wezakwanzanza chitambala cha langi ya buluu chiya uchanyha yake wezakwika vyano na vitanda va ubani na nhungo, kwa ichimu cha kulavila nhambiko za ving'waji. Uchanyha ya meza kwizakuwa na magate siku zose. 8 Wezagubika vinhu ivo vose kwa chitambala chidung'hu, na uchanyha yake wezagubika kwa mbende ya mnyama wa mwiibahali na kuiguma ija imibiki yake.

9 “Wezasola chitambala cha langi ya buluu na kugubika chinala cha vitasa na vitasa vake na mibato yake na vyano vake na via vake vovisang'haniligwa kwikila mavuta. 10 Wezachiguma na via vake vose mgati ya mbende ya mnyama wa mwiibahali na kuchika uchanyha ya mibiki ya kupapila.

11 “Uchanyha ya lupango lwa zahabu wezagubika chitambala cha langi ya buluu na kugubika kwa mbende ya mnyama wa mwiibahali. Wezaguma mibiki yake ya kupapila. 12 Maabaho wezavisola via vose vovisang'haniligwa muna ikaye yelile, na kuviguma muna ichitambala cha langi ya buluu na kugubika kwa mbende ya mnyama wa mwiibahali na kuvika mchanyha ya mibiki ya kupapila. 13 Wezasegeza maivu hana ulupango lwa kutimbulila nhambiko na kulugubika kwa chitambala cha langi ya zambalau. 14 Wezavika mchanyha yake via vose vovisang'haniligwa hana ulupango, hamwe na vyano va kuhalila moto na mibatilo na magembe na vizae. Maabaho uchanyha yake wezakwika ngubiko ya mbende ya mnyama wa mwiibahali na kuiguma mibiki yake ya kupapila. 15 Haluni na wanage wahakomeleza kuhagubika hanhu helile hamwe na via vake vose, wahawa waisasala kwandusa mwanza, wanhu wa lukolo lwa Kohasi wezakwiza na kuvipapa. Wawo hawalondeka kwamha via ivo velile, buleivo wezadanganika. Iyo niiyo sang'hano ya wanhu wa lukolo lwa Kohasi chila lusita hema da Mulungu vidihamizigwa.

16 “Eleazali mwana wa mkulu wa nhambiko Haluni kezayeka goya mavuta ya vitasa na ubani unogile na nhosa za usage za chila siku na mavuta ya kuboboda. Iviya kezakaliza hema da Mulungu na vinhu vose vili mgati yake na hanhu helile na via vake.”

17 Mndewa Mulungu kawalongela Musa na Haluni, 18 “Sekemuwaleke wanhu wa lukolo lwa Kohasi mwa Walawi wadanganizigwe, 19 mbali watendeleni vino muladi vondawavikwenhukile vinhu velile ng'hani wawe wagima na sekewadanganike. Haluni na wanage wezakwingila mgati na kumsagula chila munhu na sang'hano yake na mbahasha yake. 20 Mbali sekewengile hanhu haja kulola vinhu velile lusita wakulu wa nhambiko wovisasala, buleivo wezadanganika.”

21 Mndewa Mulungu kamulongela Musa, 22 “Wapete welesi wa Gelishoni kwa kusondelela ng'holo zawo na kaye za tati zawo. 23 Wapete walume kwandusila weli na miyaka malongo matatu mbaka weli na miyaka malongo matano wowodaha kusang'hana sang'hano muna dihema da Mulungu. 24 Sang'hano ya Wagelishoni ni kupapa mbahasha. 25 Wezasola mapanzia na hema da Mulungu hamwe na ngubiko yake na ngubiko ya mbende ya mnyama wa mwiibahali uchanyha yake na mapanzia ya hanhu ha kwingilila muna dihema da Mulungu, 26 na mapanzia ya luwa luzunguluke hanhu helile na lupango, na panzia da hanhu ha kwingilila muna dihema da Mulungu na nzabi zake na vinhu vose va usang'hano wawo. Wawo wezasang'hanila mbuli zose zozisonhela vinhu vino. 27 Sang'hano yose ya wana wa chilume wa Wagelishoni kwa kupapa mbahasha na sang'hano yawo yose izakuwa kwa kulangulizigwa na Haluni na wanage. Wezawapangila vinhu vose vowolongeligwa kuvipapa. 28 Ino iyo sang'hano ya Wagelishoni hana dihema da Mulungu. Wezasang'hana kwa kulangulizigwa na Isamali mwana wa mkulu wa nhambiko Haluni.

29 “Wapete welesi wa Melali kwa kusondelela ng'holo zawo na kaye za tati zawo. 30 Wapete walume wose kwandusila weli na miyaka malongo matatu mbaka weli na miyaka malongo matano, wowodaha kusang'hana usang'hano hana dihema da Mulungu. 31 Wezalondeka kupapa mibiki, mhanda na vikalilo va hema da Mulungu.

32 “Iviya na mhanda za luwa kuzunguluka banzi zose za hanhu helile na vikalilo na vigingi na nzabi zake hamwe na vinhu vake vose na via vake vimwenga vose. Kwizawapangila kwa kusondelela mazina yawo vinhu vowolondeka kupapa. 33 Ino iyo yondaiwe sang'hano ya Wamelali hana dihema da Mulungu, wezalangulizigwa na Isamali mwana wa mkulu wa nhambiko Haluni.”

34 Musa na Haluni na walangulizi wa mting'hano wose wawapeta welesi wa Kohasi, kwa kusondelela ng'holo zawo na kaye za tati zawo. 35 Walume wose kwandusila weli na miyaka malongo matatu mbaka weli na miyaka malongo matano, wowodaha kusang'hana muna dihema da Mulungu, 36 wowapetigwe kwa kusondelela ng'holo zawo wakala 2,750. 37 Ino ikala peta ya welesi wa Wakohasi wowasang'hane usang'hano muna dihema da Mulungu. Musa na Haluni wawapeta fana Mndewa Mulungu viyamulagilize Musa.

38 Wagelishoni wapetigwa kwa kusondelela ng'holo zawo na kaye za tati zawo. 39 Walume wose kwandusila weli na miyaka malongo matatu mbaka weli na miyaka malongo matano, wowodaha kusang'hana usang'hano muna dihema da Mulungu, 40 wowapetigwe kwa kusondelela ng'holo zawo na kaye za tati zawo wakala 2,630.

41 Ino ikala peta ya welesi wa Wagelishoni wowasang'hane usang'hano muna dihema da Mulungu, waja Musa na Haluni wawapeta fana Mndewa Mulungu viyamulagilize Musa.

42 Wamelali wapetigwa kwa kusondelela ng'holo zawo na kaye za tati zawo. 43 Walume wose kwandusila weli na miyaka malongo matatu mbaka weli na miyaka malongo matano, wowodaha kusang'hana usang'hano muna dihema da Mulungu, 44 wapetigwa kwa kusondelela ng'holo zawo na kaye za tati zawo, wakala 3,200. 45 Ino ikala peta ya welesi wa Wamelali, waja Musa na Haluni wawapeta fana Mndewa Mulungu viyamulagilize Musa.

46 Ivo Musa na Haluni na walangulizi wa Isilaili wawapeta Walawi wose kwa kusondelela ng'holo zawo na kaye za tati zawo. 47 Walume wose kwandusila weli na miyaka malongo matatu mbaka weli na miyaka malongo matano, wowodaha kusang'hana usang'hano muna dihema da Mulungu, 48 wapetigwe wakala 8,580. 49 Kwa lagilizo da Mndewa Mulungu kufosela Musa, wapetigwa, chila munhu kwa sang'hano yake na fana voili mbahasha yake, niivo viwapetigwe fana Mndewa Mulungu viyamulagilize Musa.

<- Peta 3Peta 5 ->