Peta 21

Uhumi uko Holima

1 Mkanaani imwe mfalume wa Aladi, yoyakalile uko ubanzi wa kusi, viyahulike kuwa Waisilaili wokwiza kufosela nzila ya Asalimu, kahita kuwatowa na wamwenga kawasola. 2 Maabaho Waisilaili wamulahila Mndewa Mulungu, walonga, “One weye kwizawaguma wanhu wano muna imikono yetu, kweli cheye chizayananga ng'hani mabululu yawo.” 3 Mndewa Mulungu kadihulika dizi da Waisilaili, kawatenda wawahume Wakanaani. Waisilaili wawananga ng'hani hamwe na mabululu yawo na zina da hanhu haja hatangigwa Holima.

Zoka da shaba

4 Waisilaili wandusa mwanza kulawa mulima wa Holi, wafosela nzila yoihita bahali ya Shamu muladi waizunguluke isi ya Edomu. Mbali muna inzila wanhu wandusa kulegela. 5 Wanhu wamulongelelela Mulungu na Musa, walonga, “Habali muchilava muna iisi ya Misili muladi chidanganike muna ichuwala? Mana hano habule ndiya hebu mazi. Cheye chiting'hwa na ndiya ino ya chakachaka.” 6 Maabaho Mndewa Mulungu kagala nyoka weli na sungu hagati ya wanhu, Waisilaili wengi walumigwa na wengi wadanganika. 7 Wanhu wahita kwa Musa na wamulongela, “Chitenda uhasanyi kwa kumulongelelela Mndewa Mulungu na weye iviya. Mpule Mndewa Mulungu yachisegezele nyoka wano.” Ivo Musa kawapulila wanhu.

8 Mndewa Mulungu kamulongela Musa, “Tenda nyoka wa shaba na umtumbike uchanyha ya mbiki, muladi chila yoyalumigwe yahamulola inyoka iyo, kezahona.” 9 Ivo Musa katenda nyoka wa shaba na kamtumbika uchanyha ya mbiki. Chila munhu yoyalumigwe na nyoka viyamulolile nyoka iyo wa shaba, kahona.

Mwanza wa kuhita kudikolongo da Wamoabu

10 Waisilaili wagendelela na mwanza wawo na weka lago uko Obosi.

11 Maabaho walawa Obosi, wapanga Iye Abalimu, muna ichuwala, ubanzi wa ulawilo wa zuwa wa isi ya Moabu. 12 Viwasegele uko weka lago jawo muna dikolongo da Zeledi. 13 Kulawa uko wagendelela na umwanza na weka lago jawo ubanzi wa kasikazi wa lwanda lwa Alinoni, woukilima mazi kulawa muna iisi ya Waamoli na kufosela muna ichuwala. Lwanda ulo lukala mhaka hagati ya Wamoabu na Waamoli. 14 Ivo yandikigwa muna ichitabu cha ng'hondo za Mndewa Mulungu,

“Wahebu muna iisi ya Sufa na makolongo ya Alinoni.

15 Na magidimilo ya makolongo yayo kugidimila bululu da Ali

na kuhita kuna imhaka ya Moabu.”

16 Kulawa uko Waisilaili wahita mbaka Beeli, icho ni chisima chiya Mndewa Mulungu hoyamulongele Musa, “Wating'hanize wanhu hamwe, nizaweng'ha mazi.” 17 Maabaho Waisilaili wemba wila uno.

“Chisima weye lawa mazi! Chimbileni!

18 Chisima chowahimbile wakulu na walangulizi wa wanhu.

Wakulu wa wanhu wachisikula,

kwa fimbo za chifalume na fimbo zawo.

Kulawa chuwala chiya wahita Matana.”

19 Kulawa Matana wahita Nahalieli, na kulawa Nahalieli wahita Bamosi, 20 na kulawa Bamosi wahita kudibawe da Moabu, kuinhembeti ya mulima wa Pisiga, yoisonhela hasi kuchuwala.

Sihoni na Ogu wohumigwa

(Kumbukumbu 2:26-3:1)

21 Maabaho Waisilaili wawatuma wasenga wahite kwa Sihoni mfalume wa Waamoli wakamulongele, 22 “Chitogolele chifose muna iisi yako. Hachizafosa mumgwazo na kwingila muna imigunda hebu muna imigunda ya mizabibu, hebu hachizakung'wa mazi ya visima venu, chizafosa dimwe kwa dimwe muna inzila ng'hulu ya mfalume mbaka vondachisegele muna iisi yako.” 23 Mbali Sihoni kalema Waisilaili sekewafose muna iisi yake. Kawaduganya hamwe wakalizi wake wose na kahita Yahasa kuichuwala kuwatowa Waisilaili. 24 Mbali Waisilaili wamkoma kwa panga na waisola isi yake, kwandusila lwanda lwa Alinoni mbaka lwanda lwa Yaboki, mbaka isi ya Waamoni, kwaviya mhaka ya Waamoni ikala yokalizigwa. 25 Waisilaili wayasola mabululu yose ya Waamoli, nawo wakala muna yamabululu yose ya Waamoli, hamwe na bululu da Heshiboni na vibululu vake. 26 Mana Heshiboni dikala bululu da Sihoni mfalume wa Waamoli, yoyaitowile na mfalume wa umwaka wa Moabu na kumuhoka isi yake yose, mbaka lwanda lwa Alinoni. 27 Lekamana wembaji wokwimba,

“Izoni Heshiboni na kudizenga.

Bululu da Sihoni dizengigwe na kugangamizigwa.

28 Mana moto ulawa Heshiboni,

milambi ya moto ilawa kuna dibululu da Sihoni,

udidanganiza bululu da Ali da Moabu,

udanganiza milima yose ya lwanda lwa Alinoni

29 Kogaya weye Moabu!

Mudanganizigwa, mweye wanhu wa Kemoshi!

Kawalava wanage wa chilume kuwa wakimbizi,

na wanage wa chike wahite kuutumwa,

wahite kwa Sihoni mfalume wa Waamoli.

30 Mbali lelo nyelesi zawo zibanangigwa,

Nzila zose kulawa Heshiboni mbaka Diboni,

kulawa Nashimu mbaka Nofa, habehi na Medeba.”

31 Ivo Waisilaili wakala muna iisi ya Waamoli. 32 Musa kawatuma wanhu kudipelemba bululu da Yazeli. Wadisola hamwe na vibululu vake na wawawinga Waamoli wowakalile umo.

33 Maabaho Waisilaili wahinduka na wasondelela nzila yoihita Bashani. Ogu mfalume wa Bashani kasegela na wanhu wake wose kahita kuitowa na Waisilaili uko Edilei. 34 Maabaho Mndewa Mulungu kamulongela Musa, “Sekeumdumbe, mana nizatenda mumuhume yeye na isi yake yose na wanhu wake wose. Kwizamtendela fana viya viumtendele Sihoni mfalume wa Waamoli, yoyakalile kokala Heshiboni.” 35 Ivo Waisilaili wamkoma Ogu na wanage na wanhu wake wose, hawamsigaze hata munhu imwe. Maabaho waisola isi yake.

<- Peta 20 Peta 22 ->