1 Maabaho Mndewa Mulungu kamulongela Nuhu, “Ingila mwiisafina weye na wanago wose, kwaviya nikuwona weye muhala kunoga haulongozi wangu mwa iwanhu wa isi yose. 2 Iviya muna iwanyama wodigwa usole malume saba na mazike saba, mbali wanyama hawadigwa sola lume dimwe na zike dimwe. 3 Iviya sola ndege wa kuulanga malume saba na mazike saba, muladi uwakalize ugima wawo mwiisi. 4 Zihafosa siku saba kwandusila sambi nizagala mvula yondaitonye kwa siku malongo mane, imisi na ichilo, muladi kuvibanaga viumbe vigima vose vonivilumbile.” 5 Nuhu katenda chila chinhu choyalagilizigwe na Mndewa Mulungu.

6 Gombo vidizile muna iisi, Nuhu kakala na miyaka magana sita. 7 Nuhu na muke wake na wanage wa chilume na wake zawo, wengila muna isafina muladi kugomboka na digombo. 8 Wose wanyama iwe wambule mwiko hebu hawambule mwiko na wang'onyo na ndege, 9 wengila mwiisafina waidi waidi, muke na mulume hamwe na Nuhu, fana Nuhu viyalagilizigwe na Mulungu. 10 Vizifosile siku saba gombo diza.

11 Nuhu viyawile na miyaka magana sita, muna isiku ya longo na saba mwezi wekaidi, siku iyo nzasa zose hasi ng'hani ya isi zilava mazi ng'hani na mazonzo ya kuulanga yavuguka. 12 Mvula itonya mwiisi siku malongo mane, imisi na ichilo.

13 Siku iyo iyo Nuhu na muke wake wengila muna isafina hamwe na wanawe watatu, Shemu na Hamu na Yafesi na wake zawo. 14 Wahita hamwe na chila modeli ya wanyama wa kumbago na chila modeli ya wanyama wofugigwa na chila modeli ya wang'onyo wotambala na chila modeli ya ndege na chila chiumbe chili na mabawa. 15 Chila viumbe waidi waidi walume na wake, chila chilumbe chili na ugima chingila muna isafina hamwe na Nuhu, 16 fana Mulungu viyamulagilize. Maabaho Mndewa Mulungu kahinda ulwivi hachisogo cha Nuhu.

17 Gombo digendelela kwa siku malongo mane, na yamazi yamema mbaka safina iyengeluka uchanyha ya mazi. 18 Mazi yawa na china chitali na safina iyengeluka muna yamazi. 19 Mazi yakala mengi ng'hani muna iisi, yaigubika milima mitali chila hanhu. 20 Mazi yamema mbaka yaigubika milima utali wa makono longo na mitano. 21 Vilumbe vose vili na ugima muna iisi vidanganika, ndege wose na wanyama wose wofugigwa na wanyama wose wa kumbago na wang'onyo wose wotambala na wanhu wose. 22 Chila chilumbe chikala muna iisi inyalile chidanganika. 23 Mndewa Mulungu kavinanga viumbe vose vigima mwiisi, wanhu na wanyama wang'onyo wotambala na ndege woguluka. Kasigala Nuhu muhala na waja wowakalile hamwe nayo muna isafina. 24 Mazi yakala muna iisi siku gana na malongo matano.

<- Mwanduso 6Mwanduso 8 ->