1 Yakobo kahita na mwanza wake, wasenga wa kuulanga waiting'hana nayo. 2 Yakobo viyawawone kalonga, “Dino ni lago da Mulungu.” Kahatanga hanhu haja Mahanaimu.

3 Yakobo katuma wasenga kumulongolela kwa sekulu wake Esau uko Seili kuna iisi ya Edomu. 4 Kawalagiliza wakamulongele mwenevale wake Esau, “Msang'hani wako Yakobo kolonga vino ‘Nikala kuugeni kwa Labani mbaka sambi. 5 Niye nina ng'ombe na vihongwe na ng'hondolo na luti na wasang'hani wa chilume na wa chike. Nogala mbuli yangu kumwako mwenevale muladi nitogoleke haulongozi wako.’ ”

6 Wasenga viwabwelile kwa Yakobo, walonga, “Chihita kwa sekulu wako Esau, nayo kamzila kokwiza kukuhokela. Kokwiza na walume magana mane.” 7 Yakobo kadumba ng'hani na kengiligwa na luholozi. Kawagola mabumbila maidi wanhu wowakalile nayo, iviya ng'hondolo zake na luti zake na ng'ombe zake na ngamiya zake. 8 Yakobo kagesa, “One Esau yaheza na kuditowa bumbila da mwanduso, bumbila dondadisigale dizaibanga.”

9 Maabaho Yakobo katosa, “Mulungu wa tati yangu Bulahimu na Mulungu wa tati yangu Isaka, nihulike niye! Mndewa Mulungu kunilongela nibwele kuna isi yangu kwa ndugu zangu, na kezanitendela chila chinhu chinogile kumwangu. 10 Niye sifaya hata chidogo sang'hano zako za ulondo wa ufunya umoyo na ubazi wounilaguse msang'hani wako. Vinilokile lwanda lwa Yoludani nikala nabule chinhu ila mhome muhala, mbali lelo ninayo mabumbila maidi. 11 Nikombole kwa sekulu wangu Esau. Nodumba kwaviya kezakwiza kuchitowa na kuchinanga cheye chose na wanaake na wana. 12 Kulonga kuwa kwiza nitendela yanogile na kutenda welesi wangu uwe mwingi fana msanga wa mwiibahali, haupeteka bule.”

13 Yakobo kagona baho chilo chose, maabaho kabagula vinhu vake vimwenga viwe chitumetume kwa Esau sekulu wake, 14 mizike ya luti magana maidi na mabebelu ya luti malongo maidi, mizike ya ng'hondolo magana maidi na mabebelu yang'ondolo malongo maidi, 15 ngamiya wokong'heza malongo matatu hamwe na madang'ang'a yawo, mang'ombe mazike malongo mane na malume longo, mhunda mazike malongo maidi na malume longo, 16 kawagola wasang'hani wake, chila munhu bumbila jake. Kawalongela, “Longoleni, kuno muleka nyafasi hagati ya bumbila dimwe na dimwenga.” 17 Kamulagiliza msang'hani yalongole, “Wahaiting'hana na sekulu wangu Esau, yahakuuza, ‘Weye kwa msang'hani wa yelihi? Kohitahi? Wanyama kuulongozi wako wa yelihi?’ 18 Kolondeka umwidike, ‘Ni wa msang'hani wako Yakobo. Komgalila chitumetume mwenevale wake Esau. Yakobo mwenyewo kahachisogo chetu kokwiza.’ ” 19 Kalagiliza ivoivo kwa msang'hani wa bumbila dekaidi na deketatu na wamwenga wose kwa kulonga, “Mwizamulongela Esau mbuli izo izo vondamwiiting'hane nayo. 20 Iviya mumulongele, ‘Msang'hani wako Yakobo kahachisogo chetu kokwiza.’ ” Yakobo katenda ivo kagesa, “Huwenda nizamuhoza kwa vitumetume ivo vonimulongozela, na hamwande nodaha kuiwona nayo chihanga kwa chihanga, huwenda kezanihokela.” 21 Vitumetume va Yakobo vikala vimulongolela, mbali yeye chilo icho kakala mudilago.

22 Uko chilo icho Yakobo kalamuka kawasola wake zake waidi na watumwa zake wa chike waidi na wanage longo na imwe, na kawalosa lwanda lwa Yaboki. 23 Viyakomeleze kuwalosa umwambu, iviya kalosa vinhu vose viyakalile navo, 24 mbali Yakobo kakala yaidumwe.

Munhu imwe keza na wagomba mbaka imitondo. 25 Munhu iyo viyawonile kuwa hadaha kumuhuma Yakobo, kamdalisa ichigudi mbaka kasiguka. 26 Munhu iyo kalonga, “Nileke nihite kwaviya kokunguzuka.”

Yakobo kamwidika, “Sikuleka bule mbaka unitemele mate.” 27 Munhu iyo kamuuza, “Zina jako nani?”

Nayo kamwidika, “Yakobo.”

28 Munhu iyo kamulongela, “Zina jako hadizakuwa Yakobo kaidi. Mbali zina jako dizakuwa Isilaili, kwaviya kugomba na Mulungu na wanhu, na kufunya umoyo.”

29 Yakobo kamuuza, “Lelo nilongele zina jako.”

Mbali yeye kamwidika, “Habali kolonda kumanya zina jangu?” Maabaho kamtemela mate Yakobo.

30 Yakobo kalonga, “Nimuwona Mulungu chihanga kwa chihanga na ning'hali mgima.”. Kahatanga hanhu baho Penueli. 31 Yakobo viyafosile Penueli, zuwa dikala dosomoza, kakala yonjumbila kwaviya kasiguka ichigudi. 32 Niivo ili mbaka diyelo Waisilaili hawaja bule muge wa chigudi, kwaviya imunhu ija kamdalisa Yakobo hana umuge wa ichigudi chake viwakalile wogomba.

<- Mwanduso 31Mwanduso 33 ->