1 Maabaho Musa kasegela kuna dibawe da Moabu, kahita kuna umulima wa Nebo, kakwela kuna inhembeti ya mulima wa Pisiga uli habehi na Yeliko. Uko Mndewa Mulungu kamulagusa isi yose, kwandusila Gileadi mbaka Dani, 2 hanhu hose ha Nafutali na hanhu ha Efulaimu na Manase na hanhu hose ha Yuda mbaka bahali ya Meditelaniya, 3 Negebu na bawe jose da Yeliko, dili bululu da mibiki ya mitende mbaka Soali. 4 Maabaho Mndewa Mulungu kamulongela Musa, “Ino iyo isi yoniwalahile Bulahimu na Isaka na Yakobo, vinilongile, ‘Nizaweng'ha isi ino welesi wenu.’ Nikuleka uwone kwa meso yako, mbali hwizaloka kuhita uko.”

5 Ivo Musa msang'hani wa Mndewa Mulungu, kadanganikila kuna iisi ya Moabu, fana Mndewa Mulungu viyalongile. 6 Maabaho Mndewa Mulungu kamuwanda muna dibawe da Moabu, habehi na bululu da Besi Peoli, mbali habule munhu yahamanyile hanhu hoyawandigwe Musa mbaka diyelo. 7 Musa viyadanganike kakala na miyaka gana na malongo maidi, meso yake hayawile na uvulivuli na ludabwa lwake halumalile bule.

8 Wanhu wa Isilaili wamulilila Musa siku malongo matatu kuna dibawe da Moabu.

9 Yoshua mwana wa Nuni kakala kamemezigwa muhe wa ubala, kwaviya Musa kamsagula kwa kumwikila makono yake. Ivo Waisilaili wamtegeleza Yoshua na kuzindilila malagilizo ya Mndewa Mulungu yoyamwing'hile Musa.

10 Kwandusila lusita ulo, hakunalawilila mulotezi imwenga muna iisi ya Isilaili yalingile fana Musa, yoyalongile na Mndewa Mulungu chihanga kwa chihanga. 11 Hakunalawilila mulotezi imwenga yatendile mauzauza na mawewedeko fana yaja Mndewa Mulungu yoyamtumile Musa kuyatenda muna iisi ya Misili, kwa mfalume na wasang'hani wake na isi yake yose. 12 Hakunalawilila mulotezi imwenga yatendile mbuli ng'hulu na za kudumbiza fana viyatendile Musa haulongozi wa Waisilaili wose.

<- Kumbukumbu da Malagilizo 33