Kumbukumbu da Malagilizo 19

Mabululu ya kukimbilila

(Peta 35:9-34; Yoshua 20:1-9)

1 “Mndewa Mulungu vondayawadanganize wanhu wawo na kumwing'hani isi yawo, muwawinge na kukala muna yamabululu yawo na muna zikaye zawo, 2 mwizakwika hakwe mabululu matatu muna yamabululu yondayamwing'heni Mndewa Mulungu, Mulungu wenu muyahazi. 3 Mwizatenda makumba muna yamabululu yayo na kuigola vihande vitatu isi yondayamwing'heni Mndewa Mulungu, Mulungu wenu, muladi chila munhu yondayakome munhu yadahe kukimbilila uko.

4 “One munhu yahamkoma miyage bila kwiilunga, nayo hamwihile, kodaha kukimbilila bululu dimwe mwa mabululu yayo, kuikombola ugima wake. 5 One wanhu waidi wahahita hamwe kumbago kuzahila ngodi, viyokanha nhemo isomoka kulawa kuna umuhini wake na imkoma ija munhu imwenga, munhu iyo kodaha kukimbilila kuna dibululu dimwe mwa mabululu matatu yayo muladi yawe mgima. 6 One kuhawa na bululu dimwe muhala, munhu yolihilizila kodaha kumsondelela. Kezamgwila na kumkoma munhu iyo yamkomile miyage, ingawa halondeka kukomigwa kwaviya hamwihile baho haichanduso. 7 Lekamana nomulagilizani mwike hakwe mabululu matatu.

8 “One Mndewa Mulungu, Mulungu wenu, yahatagamula mhaka za isi yenu, fana viyawalahile wasaho zenu, nayo kamwing'hani isi yose iyalaganile kuweng'ha wasaho zenu, 9 one muhazindilila malagilizo yano yose yonimulagilizani diyelo, muhamulonda Mndewa Mulungu, Mulungu wenu na kusondelela nzila zake siku zose, mwizakongeza mabululu yamwenga matatu. 10 Tendeni vino muladi munhu yelibule ubananzi sekeyakomigwe muna iisi ija Mndewa Mulungu, Mulungu wenu yondayamwing'heni kuwa yenu, muladi sekemuwe na ubananzi wa kukoma.

11 “Mbali one munhu yahamwihila miyage na kumsepa na kumwinukila, kamtowa mbaka kadanganika, nayo kakimbilila bululu dimwe muna yamabululu matatu, 12 walala wa bululu jake wezamgala munhu iyo yakomile kwa yolihiliza chisasi cha ukomaji uwo, muladi yakomigwe. 13 Sekemumuwonele ubazi munhu iyo, mbali musegeze wihi wa kumkoma munhu yelibule ubananzi muna iisi ya Isilaili, muladi mukale kwa tindiwalo.

Mhaka za umwaka

14 “Sekemusegeze chinhu chochilagusa mhaka ya wakaya wayenu, chochikigwe goya umwaka muna iisi iyomwing'hani Mndewa Mulungu, Mulungu wenu muihazi.

Wakalangama

15 “Mkalangama imwe hafaya kumulavila ukalangama munhu yoyose kwa ubananzi hebu kwa uhasanyi wowose. Mbuli yolondeka ilaviligwe ukalangama na wanhu waidi hebu watatu. 16 One mkalangama yahalava ukalangama wa kuwonela kwa kulonga uvwizi, 17 wanhu waidi wowoihuma na mbuli izo wolondeka walonge haulongozi ha Mndewa Mulungu na haulongozi ha wakulu wa nhambiko na wasemi wondawawe baho siku iyo. 18 Wasemi wezalola goya mbuli iyo, one mkalangama yahawa mvwizi na komulavila ndugu yake ukalangama wa uvwizi, 19 mkalangama iyo kolondeka yatendeligwe fana viyalondile kumtendela ija iyamulongeleze. Ivo niivo vondamusegeze wihi hagati yenu. 20 Maabaho wamwenga wose wasigale wezahulika chochilawilile, wezadumba na habule munhu yondayatende wihi fana uwo vimwili. 21 Sekemuwawonele ubazi wanhu walingile ivo. Ugima wizalihigwa kwa ugima na ziso kwa ziso na zino kwa zino na mkono kwa mkono na mgulu kwa mgulu.

<- Kumbukumbu da Malagilizo 18 Kumbukumbu da Malagilizo 20 ->