1 Ivo lekeni kutenda wihi wowose, uvwizi na udelenya na migongo na mbuli za ufyang'hu. 2 Fana viya wana vititi lusita lose wonda kong'ha tombo, mweye iviya molondeka kuwa na ng'hilu ya motombo ya chimuhe hayahanganyigwe na mazi, muladi mudahe kukala na kukomboligwa, 3 ihawa kweli muvimanya kuwa Mndewa kanoga.
4 Ivo muhitileni Mndewa. Yeye niiyo dibwe dili na ugima, dodilemigwe na wanhu mbali disaguligwa na Mulungu najo dopetigwa dofaya ng'hani. 5 Na mweye iviya, fana viya mabwe yeli na ugima yoyasang'haniligwe kwa kuzenga kaye ya chimuhe. Na muja mwizasang'hana sang'hano zelile za ukulu wa nhambiko kwa kulava nhosa za chimuhe zozimnogeza Mulungu kwa kufosela Yesu Chilisito. 6 Kwaviya Maandiko Yelile yolonga,
“Nokwika dibwe uko Sayuni, dibwe da chandusilo da kuna ichingolobweda,
niye nidisagula dimbwe dofaya ng'hani.
Munhu yomuhuwila hezakuwa na chinyala.”
7 Lelo kumwenu mweye muhuwila, dibwe ijo dofaya ng'hani. Mbali kwa wanhu waja wolema kuhuwila. Fana Maandiko Yelile viyolonga,
“Dibwe diwalemile wazenzi kuzengela,
diwa dibwe dinogile kufosa mabwe yose ya kuzengela.”
9 Mbali mweye ni welesi usaguligwe, ukulu wa nhambiko wa chifalume, bumbila da wanhu welile, wanhu wa Mulungu, womusaguligwe kugong'onda sang'hano ng'hulu za Mulungu, yoyamtangileni mweye kulawa muna diziza na mwingile muna dibung'hulo jake da kwazanya. 10 Lusita lumwe hamukalile wanhu wa Mulungu, mbali sambi mweye muwa wanhu wake, lusita lumwe hamumanyile ubazi wa Mulungu, mbali sambi muhokela ubazi wake.
Wasang'hani wa Mulungu
11 Walondwa, nowalamba fana wafosanzila na wagendaji muna isi, muyepule na tamaa zihile na izo zoibasakanya na mihe yenu. 12 Ugenzi wenu kwa wanhu hawammanyile Mulungu, wolondeka uwe unoga ng'hani mbaka haja honda wawavwizile kuwa mosang'hana yehile, wadahe kuvimanya sang'hano yenu inogile na ivo wamwing'he ukulu Mulungu muna Isiku ya kwiza kuwalamulila nhaguso wanhu.
13 Wategelezeni wanhu wose weli na udahi kwa ichimu cha Mndewa, fana mfalume mkulu yeli na ludabwa lukulu lwa kulanguliza, 14 hebu wakulu wa mikowa, wowasaguligwe nayo kuwatagusa wanhu wotenda yehile na kuwatogoza wanhu wotenda yanogile. 15 Kwaviya Mulungu kolonda mutende yanogile muladi mudahe kuvudaza mbuli za chibozi hawamanyile chiwochilonga. 16 Kaleni fana wanhu weli na ulegeho, mbali sekemuusang'hanile ulegeho wenu kufisa yehile, kaleni fana wasang'hani wa Mulungu. 17 Wahulikeni wanhu wose, walondeni ndugu zenu wahuwila, mumdumbe Mulungu na muhulikeni mfalume.
Simwe da manhesa ya Chilisito
18 Mweye wasang'hani wa mkaye wategelezeni wenevale wenu kwa kuwahulika ng'hani, siyo waja wanogile na wahole muhala, mbali iviya waja wene kukalika. 19 Kwaviya Mulungu konogiligwa na munhu yofunyila umoyo manhesa yaja halondeka kuyapata, kwaviya siku zose komgesa Mulungu. 20 Vino mwizapata choni fana muhafunyila umoyo kutowigwa kwa ichimu cha kutenda yehile? Mbali one muhafunyila umoyo manhesa vondamutende yanogile, Mulungu kezanogiligwa na mweye. 21 Yano ni yayo yomutangiligwe, kwaviya Chilisito kagazigwa kwa ichimu chenu, kamulekelani simwe na mweye tendeni fana viyatendile. 22 Yeye hatendile uhasanyi na halongile mbuli yoyose ya uvwizi bule. 23 Viyaligigwe, yeye habwelezele ligo, na viyagazigwe, yeye habwelezele bule, mbali kamuhuwila Mulungu yolamula nhaguso viilondeka. 24 Chilisito mwenyewo kaupapa uhasanyi wetu muna ulukuli lwake mumsalaba muladi chileke uhasanyi na kukala kwa kutenda yanogile haulongozi ha Mulungu. Kwa malonda yake mweye muhona. 25 Mukala fana ng'hondolo wagile, mbali sambi mumbwelela Mdimi na Mwimilizi wa ugima wenu.
<- 1 Petili 11 Petili 3 ->
