Link to home pageLanguagesLink to all Bible versions on this site

SOFONÍAS-GARDA
SOFONÍAS
GEBE-SOGLENAID
Garda-nug
Sofonías-Garda. Sofonías, Nahúm-ibagangi, degi, Habacuc-ibagangi, Bab-Dummad-gayaburba-barsogedga mai gusmogad. Odukulesadye, Sofonías-nug obarileged.
Sofonías-Gardagi weyob sunmaklenaid
Sofoníasʼgi binsaleged, Bab-Dummad, Rey-Manasés-ibagangi Sofonías-odukusye.
Judá-e-rey-Josías-ibagangi, Sofonías, Bab-gayaburbagi sunmakdii gusad. Deun, Rey-Josías Judá-yargi, degi, Jerusalén-neggweburgi, bab-dummagan-bamalad-e-wilub-gwigwichid obelosad. E-ailamar, degi, ese-goled-negmar obelosbalid. Bab-Jehová-Igar-Maid-Garda amilesbalid. A-ular, Rey-Josías, Jerusalén-neggweburgi Bab-Dummadse-goled-e-igargan nudaksa gusad.
We-gardagine, weyob ilemakar sunmaklenaid:
1. Bab-Jehová-Sabsur-Urwoed-E-Iba (1:1-18).
2. Dulemar-yar-baid-baidgi-bukwamalad sabsur-odurdaklemaloed (2:1-15).
3. Jerusalén-dulemar-e-isgusad, degi, e-bendaklenonikoed (3:1-20).
Be itogua.

1. BAB-JEHOVÁ-SABSUR-URWOED-E-IBA
1
(1:1-18)

1 We, Bab-Jehová-e-gayaburbad. Amón-machi-Josías, Judá-yargi-reyga-maiunni, Bab-Jehová we-gayaburba Cusi-machi-Sofoníasʼga sognonigusad. Sofoníasʼde Gedalías-wagwad, Amarías-wagwa-yokorginedid, degi, Ezequías-wagwa-daksikidid.

Neg-bergued-danikoed iduakwaa owisolenaid
2 Bab-Jehová soged:
“We-napneggi bela ibmar-bukwadi, an obelogoed.
3 Dulemar-bukwadi, ibdurgan-bukwadi, an obelogoed.
Sikwimar-gukudimaladi, uamar-gudimaladi, an obelogoed.
Bab-dummadyob-ibmar-imakledimalad, an obelogoed,
dule-isganamar, an obelogoed.
Dule-we-napneggi-gudiid, an obelogoed.”
Bab-Jehová deyob soged.
Judá-dulemar sabsur-odurdaklenonikoed
4 Bab-Jehová sogbalid:
“Judá-yarginmalad an sabsur-odurdakoed,
bela Jerusalénʼgi-gudimalad an sabsur-odurdakoed.
Jerusalénʼgi ibmar-Baal-bab-dummadyob-imaklediidi, an bela obelogoed.
Dule-Baalʼga-arbadimalad-e-nug, an obelogoed.
Dule-irwa-Baalʼse-gormalad-e-nugse-bakale, an obelogoed.
5 Dulemar na e-neg-niba niisgwamar-nug-odummogega,
niisgwamar-asabin-sindigar-sigmalad, an obelogoed.
Dulemar, sindigar-sii an-nuggi ise-sogar-ibmar-sognaid,
degi, bab-Milcom ise-sogar-ibmar-sognaidamarbalid, an obelogoed.
6 Dulemar-angi-bangudmalad,
degi, an amisurmarbalid,
degi, anse idaksurmarbalid, an obelogoed.”
 
7 Bab-Jehová-Bur-Gandik-Maid-asabin bogidik sigmalo,
ar Bab-Jehová-e-iba bato mosad.
Bab-Jehová ibmar-ogumakar-ukleged guakwaa urbisad,
ese-dagega-gorlesmaladi swilidik imaklesmalad.

8 Bab-Jehová sogbalid:

“Anga-ibmar-uklegoed-e-ibagi,
dule-dummaganga-mamaid, an sabsur-odurdakoed,
rey-masmala, an sabsur-odurdakoed.
Bela dulemar dule-ainebalidyob-mor-yomalad, an sabsur-odurdakoed.
9 A-ibagine, anse-goled-neg-yawagak-dogedgi nag-obiar-dogmaladi, an sabsur-odurdakoed.
Dulemar, emar-sabsur-imakedba e-bab-dummagan-neg ibmar-enasii-imakdimalad, an sabsur-odurdakoed.
Emar-yardakedba e-bab-dummagan-neg ibmar-enasii-imakdimalad, an sabsur-odurdakoed.”

10 Bab-Jehová weyob sogbalid:

“A-ibagine, Yawagak-Uaye-nugad-akale, dule-e-bendakega binnasuli-gornanai-gumaloedi, itolegoed.
Neggwebur-binid-akale, dule-akiginmalad, itolegoed.
Yarmar-mullugan-akale, wile-itogedba-binnasur-oimakmaladi, itolegoed.
 
11 ”Mactesʼginmalad, binnasur be gormakmarmoga.
Ar a-ibagine, dule-manigi-ibmar-ukmalad bergunonikoed.
Mani-muchub-ibmar-ogwamalad bela burgwemaloed.
12 A-ibagine, Jerusalén-neggweburgi gwallu-mee an imaknonikoed.
Dulemar-vino-sabolebukwadyob dobsuli-bukwamalad, an sabsur-odurdakoed.
We-dulemar binsamalad:
‘Bab-Jehová ibmar-nued imakosulid,
ibmar-isgana imakosurbalid.’
13 A-ulale, ibmar-nuegan bela e-ibe sulegoed,
e-negmar, bela swana naguoed.
Neg-sobnanai-gumaloenad,
degi-inigwele, egi gwen megosurmalad.
Uva-dub digmaloenad,
degi-inigwele, e-vinoʼdi gwen gobosurmalad.”
Bab-Jehová-e-urwed-dummad-iba
14 “Bab-Jehová-e-urwed-dummad-iba bato walikgudanikid,
a-iba gwae-gwae modanikid.
Bab-Jehová-e-urwed-dummad-ibagine, sabsur-gormaknanai gumaloed.
Dule-buledse-bakale, binnasuli-gornai guoed.
15 A-iba, urwed-dummad-iba, naguoed.
Wile-itoged-iba, surbinsa-itoged-iba, naguoed.
Bela ibmar-bergued-iba, ibmar-bibisged-iba, naguoed.
Negsichid-nagued-iba, neg-gudureged-iba, naguoed.
Boo-bela-bela-babated-iba, mogirmar-sichigan-nagued-iba, naguoed.
16 Gar-trompeta-goled-iba, bila-onogega oimaknanaigumaloed-iba, naguoed.
A-ibagi, neggweburmar-sakdigar-bukwadgi-bila-ononaegala, igar uklegoed.
Negmar-matusur-gwigwichidgi-urwenamalaga, igar uklegoed.”

17 Bab-Jehová soged:

“Dulemar angi isgusmalad.
A-ulale, bela-bela-surbinsa-itogega an imakoed.
Ibyasuliyob gudii gumaloed.”
 
E-ablis ukubyob milemai guoed.
E-sanmar ibmar-isganayob milemamai guoed.
18 Bab-Jehová-urwed-ibagi,
e-mani gwen e-bendakosulid,
e-or gwen e-bendakosurbalid.
Bab-Jehová-e-sae-itogedbali, bela napneg-naid berguoed.
Bela-dulemar-napneggi-gudidimalad, ilagwen-obelolegar ese imaklemaloed.

Sofonías 2 ->