Tito 3

4. JESÚSʼBA-NANAIMALAD IGI-DAMALARGEBE

(3:1-11)

1 Tito, gwenadganga gannar be sogo, insamaloye:

Dule-negsemamaid-urbaligwa be nanamaloye,

dummagan-mamaid-urbaligwa be nanamaloye,

amar-sogedba damaloye.

Ibmar-nueganbi-imakegala, be guagwar gudii gumaloye.

2 Mer dulemargi ichakwa sunmakmaloye,

bur be bogidik gudiguo.

Bur dulemargi binsaed-nikaa damaloye,

bela dulemar-baigan-urbaligwadaed na be imakmaloye.

3 Ar anmar epenne deyob binsaedsuli-gudii gusmogad, Bab-Dummadba ibmar-imaksuli-gudii gusmogad. Weyob anmar gudii gusad:

Yardakles-gudii,

ibmar-isgana-maiga-gudii,

ibmar-isganagi-wergudii,

ibmar-isganagi-binsadii,

nobgudii,

dulemarse-isdar-dakledii,

degine, muchub-muchub-na-isdar-dakdii,

anmar gusmalad.

4 Ar Bab-Dummad-anmar-Abonoged-e-nued-dulemargi-binsaed-oyolenonigu, degine, bela e-sabgued dulemarse-oyolenonigu, 5 Bab Dummad wile-anmar-daksadba anmar-abonononikid. Anmar ibmar-innikii-imaksadbarsulid. Bab-Dummad-Burba-Isligwaled-uksadba anmarga isgued-elinonikid, burba-dulad anmarga uknonikid. Deyob anmar-abonononikid. 6 Anmar-Abonoged-Jesucristoʼba, Bab-Dummad anmarga E-Burba-Isligwaled unnitiba uknonikid. 7 Bab-Dummad anmargi-nabir-binsamaidba, isgussuliyob anmar-daknonikid, degine, bensulidgi burba-geg-bergued-edarbediguega anmar-imaksad.

8 Tito, we-Gayaburba, napiragwadid. We-Gayaburbagi nue-gandikidba dule-odurdaknai an be-abeged, adi, dulemar-Bab-Dummad-bensurmalad ibmar-nueganbi imakdigumalagar. We-ibmarmar, ibmar-nueganad, degine, dulemarga ibmar-nueganga gubalid.

9 Ar ibmargi-binsa-ee-sunmaklemaladgi, dadgan-danimalad-igargi, mer be sunmakdii guo. Muchub-muchub-abin-abin-imakmaladgi, Moisés-Igar-Mesisadgi-abin-abin-urwemaladgi, mer be sunmakdii guo.

Ar weyob sunmaklegedi, binsaledid, gwen ibmar-nueganga gusulid.

10 Ar dule-wargwen sordamar-mamardiile, ese be goloed. Irbo-goledgi be-itosulile, a-dule be onogoed. 11 Ar be wisid, we-dule-degidaedi, isgudiid, galagwensuli gudiid. Ar na e-daedbali, bato odurdakleged-igar ega megisdo.

5. PABLO, TITOʼGA NAPI IBMAR SOGSAD

(3:12-14)

12 Artemas an bese barmidodibe, Tíquicoʼdibe. We-gwensak bese-modapile, be gwae anse Nicópolis-neggweburse-daged imako. Ar a-neggweburgi an dii-wied-niigi mai guoed. 13 Dule-irwa-gwisgued-Zenas, degine, Apolos, amarga ibmar be ukmalo, adi, neggwebur-baidsik-nadmalar, melle ibmar-sate igarba nadapi gumalagar. 14 Degine, anmar-sordamarmoga, ibmar-nuegan-imaked durdakmarmogoed, adi, dule-ibmarsurmaladga ibmar-nuegan-imakega, mer binsa Bab-Jesúsʼba nanadii gumalagar.

6. NAPI-SOGLENAID

(3:15)

15 Bela an-walik-bukmalad bega sogsimardo, bemarde nued sogeye. Dulemar-Jesúsʼgi-bensurmalad-anmar-sabmaladga be sogo, bemar nued sogeye.

Bab-Dummad nued bemargi binsasun.

<- Tito 2