Link to home pageLanguagesLink to all Bible versions on this site
10
Israel, degi, Bab-Dummad-Gayaburba-Nued
1 Gwenadgan, bela-bela an ibmar-abegedi, degine, Babse Israel-dulemarga an goledi, an binsaed, bitigi wemar abonolesmalana gadinye. 2 Ar an nue-wisid, an nue bemarga sogmalad, we-Israel-dulemala Bab-Dummadbina nue-sogmalanad. Degi-inigwele, ibmar-nue-wissulidba noar ese gormalad.

3 Ar Israel-dulemar, Bab-Dummad-isgussuliyob-dulemar-imaked wissurmalad. A-ulale, Israel-dulemar na e-ibmar-imakedba isgussuliyob-gued amididimarsunnad. Degisoggu, Bab-Dummad-isgussuliyob-emar-imaked-igar-maidba dasurmalad. 4 Ar Moisés-Igar-Mesisad, Cristoʼgi bela gunonikid. Adi, Bab-Dummad bela dulemar-Cristoʼgi-bensurmalad isgussuliyob dakegar.

5 Ar Moisés Igar-Maidgi Bab-Dummad-dule-isgussuliyob-dakedgi soged:

“Ar dule we-Igar-Maidba innikidaele, dula gudiguodo.”
Levítico 18:5

6 Ar Cristoʼgi-bensulid-ular, dule-isgussuliyob-gunonidaedgindina soged:

“Mer be-gwagegi be soge:
‘¿Doa wede niba nakoe?’ ”
Deuteronomio 30:12
(Ar adi, napnegse Cristo-sedagega soged).
7 Mer be sogbalo:
“¿Doa wede napa-urba aidegoe?”
Deuteronomio 30:13
(Ar adi, dulemar-burgwarmalad-abargi Cristo-onakwega soged).

8 Degite, ¿igi Bab-Dummad-Gardagi sogsunna?

“Bab-Dummad-Gayaburba begi itakaa gudiid.
Ar be-gwabindukugi naid, degi, be-gwagegi maibalid.”
Deuteronomio 30:14
We-Bab-Dummad-gayaburba-Cristoʼgi-bensulidgi anmar sunmakdimalad.

9 Ar dulemarga bela be sogele, “Jesús, Bab-Dummadye,” degine, be-gwagegi be bensulile, Bab-Dummad, we-Jesús burgwarmalad-abargi gannar odulosye, be abonolegodo.

10 Ar be isgussuliyob-daklegega, gwagegi Jesúsʼgi-bensuli be guergebed.

Be abonolegegardi, gayagi be sogergebed, Jesús, Bab-Dummadye.

11 Ar Bab-Dummad-Gardagi soged:

“Ar dule agi bensulile, suli-suli itogosulid.”
Isaías 28:16

12 Ar Bab-Dummad Judíoʼmar, degi, Judíoʼsurmalad, akar-akar daksulid, emarbi daked. Ar Bab-Dummad ebi wargwenna bela dulemar-e-Dummadga maid, bela obinagwar dulemar-ese-goledga ibmar ukmaid. 13 Ar Bab-Dummad-Gardagi sognaid:

“Bela dulemar Bab-Dummad e-Bab-Dummadga imakmaladi, bela abonolemaloed.”
Joel 2:32

14 Emisgi, ar Jesucristoʼgi amba benmalale, ¿igi-degite, e-Bab-Dummadga imakosunna?

Ar Jesucristo-nug itodisurmalale, ¿igi egi bensuli gumalosunna?
Ar dule ega Bab-Dummad-Gayaburba-Nuedgi-sunmaksulile, ¿igi-Jesucristo-nug itomalosunna?

15 Ar dule barmilesulile, ¿doa Bab-Dummad-Gayaburba-Nuedgi sunmakosunna?

Ar weyob Bab-Dummad-Gardagi narmakar naid:
“Ibibayobi nuedi, we-dulemar-gayaburba-nuegan-berbemalad-danikid,
Bab-Dummad-Gayaburba-Nued sedanikid.”
Isaías 52:7

16 Ar degite, bela Israel-dulemar Bab-Dummad-Gayaburba-Nued-sogedba imaksasurmalad.

Agala Isaías sogsad:
“Bab-Dummad, wede, ¿doa anmar-ibmar-sogsad bengussuli?”
Isaías 53:1

17 Degisoggu, ar dule e-uayagwar Bab-Dummad-Gayaburba itogergebed. Geb agi Jesucristoʼgi bensuli gunonikoed. We-gayaburba-itogoedi, Cristoʼgi-sunmaklenaid itogoed.

18 Ar an egismosundo: ¿Wede Israel-dulemar, Bab-Dummad-gayaburba itossurmarsi? Itosmala.

Ar Bab-Dummad-Garda soged:
“Bab-Dummad-gayaburba-barsoglenaid, bela napneg-naidgi barmilesad.
Ar sukun-gwen-bessuli e-gayaburba warmaknaid.”
Salmo 19:4

19 Degine, an egisbarsundo:

¿Wede, Israel-dulemarde we gayaburba wisgussurmarsi? Wisgusmala.
Ar Moisés-inse gebe-sogsad:
Bab-Dummad soged: “An-dulasurmalad an sabguoed,
bemar, a-dulemargi nobgumaloed.
An dule-binsaed-satemaladgi nabir binsaoed,
bemar, a-dulemargi uludoed.”
Deuteronomio 32:21

20 Sorbali, Isaías bur-bakar-buud soged:

Bab-Dummad soged:
“Dulemar-an-amidisulid, an-amimalaga an imaksad,
dulemar-an-egisdisurmaladse an magarosad,
an doa-dule gue.”
Isaías 65:1

21 Ar Israel-dulemargindi, Isaías weyob sogsad:

Bab-Dummad soged: “Dule-uayasulidamaladse,
degine, dule-ega-ibmar-sogedba-ibsasurmaladse,
bane-bane, an-argan an oyomai gusanad.”
Isaías 65:2

<- Romanos 9Romanos 11 ->