Mateo 22

Ome-nikued-ibagi burbar sunmaklenaid

(Lucas 14:15-24)

1 Jesús, gannar igar-burbar-maidgi sunmakdebargu, Judío-dummaganga sogdebalid:

2 “Bab-Dummad-e-negdakmaid weyob gubalid: Rey-gwensak e-machi-ome-nikunaidgi iba-dummad onoalid. 3 Rey dulemar-ibase-nonimaloedse-gornaega e-maigan-barmisad, adi, e-machi ome-nikusokalid-e-ibase dagmalagar. Ar a-dulemarse-gollesmalad ibase budar dage gusmalad. Gwen nonisurgusmalad.

4 ”Geb agi rey e-maigan-baigan-barmisbalid, ega sogsad: ‘Dulemar-ibase-danimaloedga sogo: Emi wegine, guagwar bemarga an mas imaksamar, molisan, degine, sibad-wawaad-gwallu-ibegan an bemarga oburgwismar. Bato bemarga guagwar bukwad, degisoggu mer ikumalo, ibase dagmalo.’

5 ”Ar ese-gollesmalad bai gwen itossurmar, aka ibmar-baid imaknadmalad. Gwensak e-nainuse arbanaded, baiddi ibmar-uked-negse ibmar-uknaded. 6 Bamaladdi, rey-e-maigan-sarsodmalad, geb oburgwismalad.

7 ”Rey wisguargu, ibase-dagega-ese-gollesmalad deyob e-maigan-imaksamarye, nue-sae itoded. Geb e-sordamar-barmisad, bela e-maigan-oburgwismalad ogilosad. Deginbali, rey, bela ese-gollesmalanad-e-neggwebur ogumaksasunnad.

8 ”Geb degi, rey e-maiganga sogded: ‘Ar an-machi-ome-nikued-ibagi masgunned bato guagwar siid. We-dulemar ibase-dagega-ese-gollesmaladdi, ibase-daged bar ega igar maisulid. 9 Degisoggu, igarganba be namarsun, ar agi be dulemar-dakalir, masgunned-ibase-dagmalaga, ese be gormalo.’ 10 Rey-maigan igarganba nadmargu, dulemar-abingusmaladse bela gochamalad. Dule-nueganse, degi, dule-isganamarse-bakar, ese gochad. Degisoggu, ome-nikued-ibagi bela neg engussunnad.

11 ”Rey masgunned-ibase-dognonigu, dule-nonimalad-daknonikid. Agi dakalid, dule-wargwen ome-nikued-ibagi-mor-yoleged yoisuli. 12 Rey a-dulega sogded: ‘An-ai, ¿igi be ome-nikued-ibagi-mor-yoleged-yoisuli be dogsa?’ Dule gwen abin-imaksasulid.

13 ”Geb degi, rey e-maiganga sogdesunnad: ‘We-dule-ibe e-argan be edinmar, e-mali be edinmarbar. Magaba negsichidgi be metemar, agi dummad-wilesiidba bosii guoed, nugar-gorsii guoed.’

14 ”Ar Bab-Dummad bukidar dulemarse gochad, degi-inigwele, unnila ichee wis sulesmalad.”

Roma-dummadga-mani-galeged-igargi sunmaklenaid

(Marcos 12:13-17; Lucas 20:20-26)

15 Jesús sunmaked-bergusgu, Fariseoʼmar nadmalad. Geb igar amiarmalad, igi-saele e-sunmakedgi Jesús-gaodibeye. 16 Degisoggu, Fariseoʼmar, e-sapingan Herodes-sordamarmala, Jesúsʼse barmisad. Jesúsʼse nonimargu, ega sogdemalad:

—Odurdaked-saila, anmar be-wisdo, be dule-ibmar-napiragwad-soged-duled, igar-napiragwadba Bab-Dummad-igar be odurdaked, degine, baisur be itoged igi dulemar begi binsae, ar ade, bedi emarbi be dulemar-daked. 17 Degisoggu, anmarga be sogena, emide, Roma-Dummad-Césarʼye-nugad anmargi-mani-gaed-bennuked, ¿we igar-nuedi? ¿Anmar bennukoe? ¿Anmar bennukosuli? ¿Igi be sogmosunna?

18 Ar Jesúsʼdi wemar-egi-isdar-binsananaid mag daksoggu, amarga sogded:

—¡Bemar wagar-darbodamaladid! ¿Ar ibiga bemar yamo an-wilubdakdanimala? 19 Roma-dummadga-mani-ukleged anga be oyogena.

Geb Jesúsʼga mani-gwagwen oyoarmalad. 20 Geb degi, Jesús amarga sogded:

—¿Ar wede we-manigi doa-wagar-wilub sisunna, degine, doa-nug narmakar naibarsunna?

21 Jesús-abin sogdemalad:

—Roma-Dummad-César-wagar-wilub, degi, a-nug narmakarbalid.

Geb degi, Jesús sogded:

—Ar ibmar Césarʼgadir, Césarʼga be ukdo. Ar ibmar Bab-Dummadgadirdi, Bab-Dummadga be ukdo.

22 Dulemar-Jesúsʼse-ibmar-egisnonimalad weyob Jesús-ega-soge-itosmargu, geger abin itodmalad. Geb degi, emardi Jesúsʼgi bangudmarsunnad.

Gannar-durgued-igargi sunmaklesad

(Marcos 12:18-27; Lucas 20:27-40)

23 Amba a-ibagi, Saduceoʼmar Jesúsʼse nonimalad. Wemar sogmalad, dule burgwisale, gannar geg bar durguye. Agala, Saduceoʼmar Jesúsʼse we-igar egichiarmalad, 24 ega sogdemalad:

—Odurdaked-saila, Moisés sogsagusad:

‘Ia mimmi-nikussuli ome-idu burgwisale, e-urba a-ome-nikuoye,

adi, e-iaga anagan-urbegar.’

Deuteronomio 25:5

25 ”Anmar-abargi machimala e-gwenadgan-walagugle-na-gumaladi (7) weyob gusdo: Ia-dummad ome-nikusgu, anagan-urbissuli burgwisad. A-sorbalid, a-ome-nikunonimogu, 26 amba e-iayob mimmi-nikussuli burgwismogad. Geb degi, a-sorbalid, e-urba-baid amba a-ome-nikunonimogad. Deyob bela e-walagugled (7) a-ome nikusmaladbiid. Anagan-gwen-obessuli bela burgwismalad. 27 Geb a-sorba, ome burgwismosunnad.

28 ”Ar dule-gannar-durguoed-iba-nonikile, a-omede, ¿doa-omega gunonikosunna, ar bela na e-gugle (7) nikusmaladbiid?”

29 Geb Jesús, Saduceoʼmar-abin sogded:

—Bab-Dummad-Garda-narmakar-maid-wissulidba, degi, Bab-Dummad-gangued-wissulidba, be noar sogmalad. 30 Ar ade, dulemar gannar-durgued-ibagi ome-bar-nikuosurmalad, degine, gannar ome sui-nikunai bar guosurmogad, ar ade, dulemar Bab-Dummad-baliwiturmar-nibnegginmaladyob gumaloed.

31 Jesús Saduceoʼmarga sogdebalid:

—Ar dule-burgwismalad-gannar-durgued-igardina, be ¿Bab-Dummad-gayaburba-maidde be absodisurmarsi? Ar Bab-Dummad Moisésʼga sogsa gusad:

32 ‘Ani an Abraham, Isaac, degi, Jacob, amar-e-Bab-Dummadid.’

Éxodo 3:6

”A-ular, Bab-Dummad, dulemar-burgwarmalad-e-Bab-Dummadsulid. Bab-Dummad, dulemar-dula-gudidimalad-e-Bab-Dummadid. Degisoggu, bemar nue-noar sogmalad.”

33 Ar dulemar weyob Jesús-dulemar-odurdaked-itosmargu, geger-dakmalad.

Bab-Dummad-Igar-Mesisad-bur-birigined

(Marcos 12:28-34)

34 Degi, Fariseoʼmar wisguarmargu, Jesús nue-Saduceoʼmar-abin-imaksaye, agi Fariseoʼmar igar-itoarmalad. 35 Geb Fariseo-wargwen Moisés-Igar-nue-wisidi, Jesús-yamo-wilubdakega, ese egisnonikid:

36 —Odurdaked-saila, Bab-Dummad-Igar-Maidgi, ¿igid bur igar-biriginedi?

37 Jesús, abin-sogded:

—‘Bab-Dummad-be-Dummad, bela-belad be-gwagegi be sabguoed,

bela-belad be-san-burbagi, degi, bela-belad be-binsaedgi be sabguoed.’

Deuteronomio 6:5

38 ”Gebegi, Bab-Dummad-sabguleged, bur igar-biriginedid, degi, bur igar-dummarbadbalid. 39 Sogbogwadgi, amba deyobsaarbalid:

‘Ar na be-san na be sabguedyobi,

dule-baid be sabgumogoed.’

Levítico 19:18

40 ”Ar we-igar-warbogwadgi, bela igar-baigan-mamaidi, degi, Bab-Dummad-gayaburba-barsogmalad-sunmaksamaladi, ase bergusiid.”

Cristo e-danikidgi sunmaked

(Marcos 12:35-37; Lucas 20:41-44)

41 Jesús, Fariseoʼmar-danar-bukwadse egichialid, 42 ega sogded:

—¿Cristoʼgi bemar igi binsamarsunna? ¿Wede Cristo, doa-wagwasunna?

Abin-sogdemalad:

—Rey-David-wagwa.

43 Jesús amarga sogdebalid:

—Ar degite, ibiga David Bab-Dummad-Burbaba Cristoʼga sogsunna, ‘An-Dummadye,’ deun soggu:

44 ‘Bab-Dummad an-Dummadga sogsad: An-argan-nuedsik be sige,

be-isdarmalad an bela ogalakuedse be sige.’

Salmo 110:1

45 ”Ar David Cristoʼga-sogedde, ‘Be an-Dummadye,’ degite, ¿igi Cristo e-wagwaga gubarsunnoe?”

46 Ar dule-wargwensaar gwen Jesús-abin-imaksasurmalad. A-iba-akale, dulemala, bipisaale Jesúsʼse ibmar gwen bar egisbi itossurmalad.

<- Mateo 21 Mateo 23 ->