Lucas 4

3c. Jesús nega-dulesulidganba gudigusad

(4:1-13)

Jesús, nia-sailase wilubdaklesad

(Mateo 4:1-11; Marcos 1:12-13)

1 Jesús, Bab-Dummad-Burba-Isligwaled nue-nikagudii, Jordán-diwargi banguded. Geb degi, Bab-Dummad-Burba-Isligwaled nega-dulesulidganba Jesús-sesa gusad. 2 Agi iba-dulabo (40), nia-saila Jesús-wilubdakdii gualid. A-ibagangine, Jesús mas-gunsuli gudigusad, degisoggu, ukudmaada itoalid. 3 Agi Jesúsʼga nia-saila sokalid:

—Ar be Bab-Dummad-Machi-sunnadiile, we-akwaga be soge: ‘Maduga be binyeye.’

4 Jesús, abin-imakdegu, nia-sailaga sogded:

—Noar be soge, ar Bab-Dummad-gayaburbagi weyob narmakar naid:

‘Dule maduginbi dula-gudii guosulid,

[bela Bab-Dummad-gayaburba-itogedgi dula gudigubaloed].’

Deuteronomio 8:3

5 Geb degi, nia-saila yar-matusulidse Jesús-sesad. Agi belagwable-napneg-naid-ugakse ega ukiagwar ilagwen-oyoar imaksad. 6 Agi nia-saila Jesúsʼga sokalid:

—We-neggweburmar-an-bega-oyosadi bela e-ganguedi, degi, e-gandikidba-yeerdaklegedi an bega ukoed. Ar bela we-neggweburmar anga uklesad. Degisoggu, ar doaga an ukbie, an aga ukoed. 7 Degisoggu, be an-asabin Bab-Dummadyob an-nug-odummogega yokorgi sindigar sigele, we-neggweburmar bela begadga guoed.

8 Jesús, abin-imakdegu, sogded:

—Nia-saila be angi bangu. Ar Bab-Dummad-Gardagi weyob narmakar naid:

‘Bab-Dummad-be-Dummad-e-nug be odummodii nanao.

Unnila agarbi be ibmar imako.’

Deuteronomio 6:13

9 Geb degi, nia-saila Jerusalénʼse Jesús-sesbalid, Bab-Dummadse-goled-neg-uas-birgi ogwisdapid. Geb Jesúsʼga sogded:

—Ar be Bab-Dummad-Machi-sunnadiile, napase be ichomakdo. 10 Ar Bab-Dummad-Gardagi weyob narmakar naid:

‘Na e-baliwiturmar be-edarbega bega barmidagoed,

e-argangi be-gamalagar.

11 Adi, melle be akwagi gowarmakegar.’

Salmo 91:12

12 Jesús, abin-imakdegu, sogded:

—Nabir be sogendo, ar Bab-Dummad-Gardagi weyob narmakar sognaibalid:

‘Melle Bab-Dummad-be-Dummad, be wilubdako.’

Deuteronomio 6:16

13 Ar nia-saila bela Jesús-wilubdaked bergusgua, sikwas wis egi bangud gusad.

4. JESÚS, GALILEA-YARGI ARBASAD

(4:14–9:50)

4a. Jesús ibmar-imaksad

(4:14–7:17)

Jesús na e-arbadedgi onoded

(Mateo 4:12-17; Marcos 1:14-15)

14 Jesús gannar Galileaʼse nonigu, nue Bab-Dummad-Burba-Isligwaled-gangued-nikadba nonikid, degi, bela neggweburmar-dikarba-bubukwad Jesús-ibmar-imakdiid wisguarmalad. 15 Jesús, Judíoʼmar-onmakedneggi dulemar-odurdakdii gualid. Bela Jesús-nug-odummogedbi gusmalad.

Jesús, Nazaretʼgi gudigusad

(Mateo 13:53-58; Marcos 6:1-6)

16 Jesús Nazaret-neggweburse nonikid, ar ade, agi dungusadid. Obunnoged-ibagi, Jesús na gusgu e-daedba Judíoʼmar-onmakednegse dogdapid. Agi Bab-Dummad-Garda-absogega gwisguded. 17 Ar ade, Jesúsʼga Bab-Dummad-gayaburba-barsoged-Isaías-narmaksad uksamalad. Jesús a-garda-egasgu, weyob-narmakar-naid absoded:

18 “Bab-Dummad-e-Burba angi maid.

Ar ade, dule-wilemaladga gayaburba-nuegangi-sunmakega, Bab-Dummad an-susad.

Bab-Dummad an-barmialid:

Dule-gwage-nunmak-itodimaladga gwage-armakegar.

Dule-galesbukmaladga binnasur sogegar, bemar ainimarye.

Dule-ibyasuli-gudimaladga ibya-egaegar.

Dule-mesagwar-gudimalad-ollor-imakegar.

19 Bab-Dummad-e-birga-nuedgi sunmakega, an-barmialid.”

Isaías 61:1-2

20 A-sorba, Jesús Bab-Dummad-Garda-obipirmasgu, Judíoʼmar-onmakednegdaked-dulega garda-uksagu, sigisad. Agi-bukmalad bela Jesúsʼginbi atakbukwa gusmalad. 21 Geb degi, Jesús sogded:

—Emi-ibagi, bemar-abargi we Bab-Dummad-Gardagi-narmakar-naid sanar-gunonikid.

22 Bela-dulemar-bukmaladi, Jesúsʼgi nuedbi sunmakedbimalad. Geger dakmalad, ibiyobi Jesús yeer sunmake. Degine, sogdemalad:

—¿Ar wede, José-machisursi?

23 Jesús amarga sogded:

—An wisi, wegi-sogleged be anga sogdamaloed: ‘Ina-duled, na be dukin san nudake, adi, be anmarga nue-ibmar-wisid oyogegar. Ar Capernaúm-neggweburgi bukidar ibmar-imaksaye anmar be-itosmaladi, wegi be-neggweburgine be imakmoga.’

24 Degi, Jesús sogdebalid:

“Napira an bemarga soged, Bab-Dummad-gayaburba-barsoged-wargwensaar na e-neggweburgi geg e-nug odummoleged. 25 Napira an bemarga soged, deunni, Elías-ibagangi, bukidar Israel-yargi, mukwamar-ei-sui-burgwismalad gudigusad. A-ibagangine, deun birgapaa-abala dii gwen wissulid, degidbali, bela napneggine ukud-dummad nagunonigusad. 26 Degite, Elías a-mukwamarse gwen barmilessulid. Bur Sarepta-neggwebur-Sidónʼgi-siidse mukwa-wargwen-ei-sui-burgwisadse barmilesgusad, adi, a-mukwa ega mas-ukegar.

27 ”Deginbali, Bab-Dummad-gayaburba-barsoged-Eliseo-ibagangi, bukidar Israel-yargi, dulemar-naibe-buna-yaa-maleged nikagusmalad, degite, amar gwen nudaklessulid. Bur Siria-dule-Naamánʼye-nugadi nudaklesad.”

28 Ar deyob Jesús-ibmar-soge-itosmargu, onmakedneggi-bukwamalad bela sae-itodmalad. 29 Dulemar gwisgudmargu, Jesús-ise-onoar imaksamalad, geb neggwebur-magaba yar-birse Jesús-sesmalad, ar ade, a-yar-birgi neggwebur siid. Adi, a-neggwebur-gulluba egwanmalagar. 30 Degi-inigwele, Jesúsʼdi emar-abargi ganna-ganna noded, emar-abargi bangudsunnad.

Jesús, dule-niaburba-nikad nudaksad

(Marcos 1:21-28)

31 Jesús, Galileaʼse Capernaúmʼye-neggwebur-nugadse nonikid. Geb obunnoged-ibagi dulemar-odurdakdii gualid. 32 Dulemar Jesús-ibmar-odurdakedi, geger-itomalad igi-Jesús dulemar-odurdake. Ar ade, Jesúsʼde nue-igar-wisi sunmaked.

33 Agi onmakedneggi dule-wargwen, niaburba-isgana-nikad-siid binnasur goted, 34 sogded:

—Jesús-Nazaretʼgined, mer anmarse be achao, ¿ibiga be anmar-wiodaniki? ¿Be anmar-obelogega daniki? An be-wisi be doa-dule, be-dule-gwage-islidikidid, be Bab-Dummad-nuggi-danikid-duled.

35 Jesús niase binnasur-uluded, ega sabsur weyob ibmar-sogded:

—¡Mer be sunmak! Dulegi-maid be noe.

Geb degi, nia emar-abargi dule-balimetegu, dulegi-maid nodegusad. Dule gwen akar-gussulid.

36 Deyob ibmar-gusadi bela geger dakdemalad. Na agi sokarmarsunnad:

—¿Wede igid-gayaburba-barsunna? Nue-burba-nika, gandikidba, niamarga ibmar soged. Niamar Jesús-ega-sogedba ibmar-imakdedamalad.

37 Degi, bela Galilea-yalaganba Jesús-dulemar-nudakdiid wisgudmalad.

Jesús, Simón-Pedro-e-sakbundor-uellemaid-nudaksad

(Mateo 8:14-15; Marcos 1:29-31)

38 Geb degi, Jesús Judíoʼmar-onmakedneggi-siidgi nodsunnad. Geb Simón-negse nadsunnad. Simón-sakbundor ise-uellegar mai dakdapid. Jesúsʼgi wilenaigusmalad, adi, Simón-sakbundor-nudakegar. 39 Degi, Jesús Simón-sakbundor-walik gwisgunonigu, uellegedga sabsur-ibmar sogded. Agi uelleged yog-akinnar naded. Geb Simón-sakbundor yog gwisguar imaksad, geb a-sorba emarga yog-ibmar-imakar imaksad.

Obunnoged-iba-bergusgu, Jesús dulemar-bukidar-nudaksad

(Mateo 8:16-17; Marcos 1:32-34)

40 Dad-argwategu, obunnoged-iba-bergusgu, bela galagwensuli-bonigan-nikamalad Jesúsʼse senonimalad. Jesús bonigan-nikamaladgi e-argan mesisad, geb bela amar-nudaksad. 41 Deginbali, Jesús bukidar niamar-onisbalid. Niamar ainider, binnasur-gote, sogdedamalad: “¡Bedi Bab-Dummad-Machi!”

Ar Jesúsʼdi niamarse uluddaed, osunmakega gwen imakdasulid, ar ade, niamar wismalad, we, Bab-Dummad-dule-wargwen-barmidagoye-sogsad-dule-gue.

Jesús, Galilea-yalaganba Bab-Igargi sunmakdii gusad

(Marcos 1:35-39)

42 Neg-oibosgu, Jesús neggweburgi bangudsunnad, nega-dulesulidganba nadsunnad. Dulemar Jesús-amidii guarmalad. Dulemar Jesús-amismargu, mer-egi-banguega, egi wilenaigusmalad. 43 Ar Jesúsʼdi amarga sogded:

—Ar neggwebur-baiganse Bab-Dummad-negdakmaid-e-gayaburba-nuedgi an sunmaknabalirgebed, ar a-ular, an barmilealid.

44 Jesús Galileaʼgi Judíoʼmar-onmakednegmargi Bab-Dummad-Gayaburba-Nuedgi sunmakdii gusad.

<- Lucas 3 Lucas 5 ->