1 Bab-Jehová bemarga soged: “Binsa-sogmalo: ‘Dule-wargwen ome-metele, we-ome machered-baid-nikunonikile, machered-idualed, ¿gannar e-omega-gusad-monao be insae? Suli, gege gannar monaed. Ar monaele, bela yar-oichogo-itole.’ Emide bemar, Israel-dulemar, galagwensuli abirgunagwarsuli be nanasmalad. Degisoggu, geg be bar anse warmakmalad.
2 Nue be yar-mullugan-swana-naid be dake:
Bia be galagwensuli-gussuli dakmalodibe.
Bemar, Árabe-dulemaryob nega-dulesulidba igar-yalagi mellesii be damalad.
Omegan-gamba-imakmaladi, na machered-abindaksidamaladyobi, be gudidamalad.
Bemar galagwensuli-isgusmaladbali, we-yala be oichosmalad.
3 A-ulale, bar bemarga dii wissulid,
degi, dii-wied-ibagangi bar bemarga dii wissurbalid.
Ar bede ome-gambasaedyob na be san-imaksamalad,
gwen bingedar be itossurmalad.
4 Emisgwasaar be anse weyob gordigusad:
‘Babaye, bipigwad-akale be an-ai-nuedye.’
5 Be sogsabalid:
‘Babaye, ¿be anmarbo urwedigu guode?
¿Be anmarbo degisadegu sae-itodii guode?’
Deyob be sogdigusmargu, degite, amba bemar ibmar-isgana-imakdii gusmalad.”
Israel-dulemar Bab-Jehováʼgi dummad-isgudimalad
6 Josías-reyga-maiunni, Bab-Jehová anga weyob sognonigusad: “Jeremías, ¿Israel-dule-uayasulidamalad-ibmar-isgana-imaksad be daksa? Bela yar-mulluganse, sapi-dummagan-urba galagwensuli gusmalad. 7 Bela we-ibmar-isgana-imaksamalad-sorba, gannar anse nonimaloye an binsasanad. Degi-inigwele, gwen anse gannar nonisurmalad. E-gwenadgan-Judá-dulemar-uayasulidamogadi, e-gwenadgan-ibmar-imaksad daksamarmogad. 8 Ar Judá-dulemar daksagusad, igi an Israel-dule-uayasulidamalad galagwensuli-gued-ular metegusa, an ega ome-meted-garda-uksagusad an-daksamalad. Degite, e-gwenadgan-Judá-dule-uayasulidamalad gwen an-dobee itossulid, e-gwenadgan-Israel-dulemaryob galagwensuli gusmarmogad.
9 ”Israel-dulemar an-yardaksagu, gwen bai itossulid. Aka bur bela yar-oichosad, degi, akwamar-bab-dummadyob-imaklemaladba, degine, suarmar-bab-dummadyob-imaklemaladba galagwensuli nanasmalad. 10 Bela weyob neg-nagus-inigwele, e-gwenadgan-Judá-dule-uayasulidamalad gwen gwage-ulubgi e-itogedba anse nonisulid, unnila binsa angi dododii gusad. Ani an Bab-Jehová-guedgi bemarga soged.”
11 Bab-Jehová anga weyob sogdebalid: “Jeremías, Israel-dule-uayasulidamaladi, bur Judá-dule-galagwensuli-nanamaladba bur nued daklesunnad. 12 Jeremías, dad-nakwed-argan-sapiledsik be nae. We-gaya be sognao. Weyob be sogo:
‘Weyob Bab-Jehová sogye:
Ani an Bab-Jehová-guedgi bemarga soged:
Israel-dule-uayasulidamalad, gannar be anse dagmala,
an isdar bemar-dakosulid.
Ani an Bab-Jehová-guedgi bemarga soged:
An wile-dulemar-dakdaedid,
isdar an bemar-dakdii guosulid.
13 Ani an Bab-Jehová-guedgi bemarga soged:
Unnila be-isgusad be magar-itomala,
na be angi-nosmalad be magar-itomala.
Bela sapi-dummagan-urba bab-dummad-baiganga be ibmar-imaksamalad be magar-itomala,
gwen be an-sogedba-nanabigussulid be magar-itomala.’
14 ”Ani an Bab-Jehová-guedgine bemarga soged: Bemar Israel-dule-uayasulidamalad, gannar be anse dagmala. ¡Ar ani an be-ibedid! Neggwebur-iliba war-wargwen an bemar-suoed, degine, be-dadgan-iliba war-warbo an bemar-subaloed. Geb Sión-yalase an bemar-nidagoed. 15 An bemarga dule-be-idumalad dakedba an bega ukoed, adi, wemar an-ibmar-abegedba imakmalagar. Binsaed-nikaa be-semalagar, ibmar-nue-wisidba be-idumalagar.
16 ”Ani an Bab-Jehová-guedgi bemarga soged: Yoo bemar bukidargusale, nue-mergusale: Bab-Jehová-Dadganbo-Igar-Mesisad-Ulugi bar sunmaklegosulid. Dulemar bar a-Ulugi binsaosurmalad, degi, bar a-Ulu obarosurmalad. Degine, bar Ulu-baid sobosurmalad, ar bar abegosurmalad.
17 ”A-ibagangine: ‘Bab-Jehová-ologanaye’ be Jerusalén-bimaloed. Bela dulemar-yar-baid-baidgi-bukwamalad Jerusalén-neggweburse an-nug-odummogega nonimaloed. Bar bemar gwagegi-ibmar-isganagi-binsaedba ibmar imakosurmalad.
18 ”A-ibagangine, Judá-dulemar, Israel-dulemarbo gannar atogoed. Neggwebur-dad-nakwed-argan-sapiledsik-siidba be danimaloed, bia an, be-dadganga-yar-uksagusadse be bukunonimaloed.
19 An-sunnagwad an weyob sogsagusanad: Israel an-mimmiga an imakoye,
napa-bur-sunsoged an ega-ukoye, an sogsagusad.
Baiganba yar-bur-yeerdakleged an ega ukoye, an binsasad.
