1 Efraín-sordamar weyob Gedeónʼga urwedgi sogdemalad:

—¿Ibiga be anmarga sogsasuli, anmar Madián-sordamargi bila-ononasokarye? ¿Ibiga be anmar-owisossuli? Be anmarse gochawilubbinad.

2 Geb Gedeón Efraín-sordamar-abin sogded:

—Ar ibu wis-imaksa be an-dake. Bemar-Efraín-dulemar, bemar-uva-e-solagan-welegedi, anmar-Abiezer-dulemar-uva-welegedba, bur bule nuedid. Ar deyobi, bemar an-ibmar-imaksadba bur bule ibmar-nued-imaksamalad. 3 Ar Bab-Dummad bemarga Madián-sordamar-e-dummagan Oreb, degi, Zeeb urmaksad. Degitega, ¿ibu-imaksa be an-daksunna? Andi gwen-dogdar ibmar-nued imaksasulid.

Efraín-sordamar deyob Gedeón ega-soge-itosmargu, bar-akar-sogsasurmalad.

4 Gedeón, degi, e-sordamar-dulataled-ilapaagwadmala (300) Jordán-diwarse mosgua, obaksamalad. Ar nue yegusmar-inigwele, deggines e-isdarmalad-balegichamalad. 5 Gedeón Sucot-neggweburse mosgua, Sucotʼginmaladga sogded:

—Wis be an-sordamarga mas-uke, ar an-sordamar na nue-yegusmalad. Amba anmar Madián-reymar Zebaʼye-nugad, degi, Zalmunaʼye-nugad baleginadapmalad.

6 Sucot-e-dummagan abin-sogdemalad:

—¿Ibiga anmar be-sordamar masgi-ogunnoe? Ar bemarde amba yoo Zeba-gamalad, amba yoo Zalmuna-gamarbalid. Bato be gasmalardi, nabirdo.

7 Geb Gedeón Sucot-e-dummagan-abin sogded:

—Degir nabir. Ar Bab-Jehová an-argan-yaurgi anga Zeba-uksale, Zalmuna-uksabalile, bemar anse suar-ikobiidgi, degi, nega-dulesulidganba gagan-ikobiid-gannareged-nikadgi san dubamaklegoed.

8 Gedeón Sucotʼgi-nadgu, Peniel-neggweburse naded. Agi, Gedeón amba-deyob e-sordamarga mas egichidapbalid. Penielʼginmalad amba Sucot-e-dummagan-sogsadyob Gedeónʼga sogsamarmogad. 9 Degi, Gedeón, Penielʼginmaladga sogsamogad: “Nuedgi an gannar aibilisale, we-neg-matusulid an earnonikoye.”

10 Rey-Zeba, Rey-Zalmunaʼbogwa Carcorʼye-neg-nugadgi sordamar-miliambe-gakatar-gudimaladba (15,000) gudimalanad. Unnila napi-wemar sordamar-dad-nakwedsikmalad besmalad. Ar e-sordagan-baigandi es-suidgi-bila-onomaladi mili-dulanergwa (120,000) bila-onogedgi girgusmalad. 11 Gedeón, Nobaʼye-neg-nugad-dad-nakwedsik dulemar-bukmaladsik, degi, Jogbeha-neg-nugadsik naded. Geb Gedeón, ukiar Madián-sordamar baisur-binsabukwadgi egi gwichigudapid. 12 Madián-reymar Zeba, Zalmunaʼbogwa aisaar-wakitemalanad. Degi-inigwele, Gedeón balegitegusgu, warbobela-gadapid. Degidbali, Madián-sordamar na nue-dobe itodmalad.

13 Joás-machi-Gedeón, bila-onodiidgi-gannar-aibilisadgi, Jeresʼsik-aibinlemaid-igarba-danigua, 14 machi-sapingwa-Sucotʼgined-gasad. Ese dulemar-nugmar egichisad. Machi-sapingwa Sucot-e-dummagan-e-nugmar, degi, girmar-dummagan-e-nugmar dulapaa-gakambe-gakagugle-mergued (77) Gedeónʼga narmakar uksad.

15 Degidgi, Gedeón Sucotʼse naded. Gedeón modapgu, Sucotʼginmaladga sogded: “¿Be ebinsamala, bemar-angi-dodosmalad, bemar an-bendaksasurmalad? Bemar anga sogsamalad: ‘An be-sordamarga masgunned-ukosurye, ar bemarde amba yoo Zeba, degi, Zalmuna-gamaladdeeye, ar be bato-gasmalardi, nabirye. ¿Bemar anga deyob sogsad be ebinsamala? Emide, an we-dulemar-gasad be dakmardo.’ ”

16 Degidgi, Gedeón, suar-ikobiid, degi, nega-dulesulidganba-gagan-ikobiid-gannareged amisad. Geb a-ikogine, Sucot-girmar-dummagan-bibyosad.

17 Deginbali, Gedeón, Peniel-neggwebur-ibe neg-matusulid earisbalid. Degi, Gedeón, machergan-Penielʼginmalad-oburgwisbalid.

18 Geb Gedeón Zebaʼse, Zalmunaʼse egichided:

—Bemar Taborʼgi dulemar-oburgwisadi, ¿igi daklemala?

Geb Gedeónʼga sogdemalad:

—Beyob-daklemala. Rey-machiyob daklemalad.

19 Degidgi, Gedeón binnasur sogded:

—Bemar, an-gwenadgan-oburgwismalad. ¡Bab-Jehová nue-dula-mai dakledo! Ar bemar an-gwenadgan-oburgwissulina, emi-ibagi, an bemar-oburgwedgi-binsasulindo.

20 Geb Gedeón e-machi-dummad-Jeterʼga sogded:

—Dakebinne, oburgwe.

Ar machigwade sapingwasoggu, dobedba es-suid onossulid.

21 Zeba, degi, Zalmunaʼbo Gedeónʼga sogdemalad:

—Ar dule-machered na be itogele, be anmar-oburgwedo.

Gedeón gwichigudgu, Zeba-oburgwisad, degi, Zalmuna-oburgwisad, degine, e-moli-yargan-muremalad-dukargi-ibmar-nanaid ei susbalid.

22 Israel-dulemar Gedeónʼga sogdemalad:

—Gedeón, Madián-sordamargi be anmar-bendaksasoggu, be anmarga negseedo. Geb be-sorba be-machi, degi, be-wagan anmarga negseemogoed.

23 Gedeón, Israel-dulemar-abin sogded:

—Suli, an bemarga negseosuli, an-machi seosurmoga. Unnila Bab-Jehová bemarga negseoed.

24 Sogdebalid:

—An bemarse ibmar-soggwen egisdo: Bemar Ismael-dulemar-ibe-oluamar-susad gwa-gwagwen be anga udamalo.

25 Israel-dulemar abin-sogdemalad:

—Degiirdi, nuedgi an bega ukmalo.

Degidgine, napagi mor-dummad-ogichamalad. Geb oluamar-amismalad na mor-dummadgi urbismalad.

26 Oluamarbi nibir-dulabo-gakapaa (43) aidikue-wilub welesad. Ibmar-baigan soglesulid: Ibmar-nuegan, ibmar-orgimalad, mor-suir-akwagiid-Madián-reymar-ebusmalad, amardi soglesulid. Degine, moli-yargan-muremalad-dukarmargi-ibmar-nagusmalad, soglesurbalid. 27 Gedeón we-ormargi efod-sobsad. We-efod-orbiid e-neggwebur-Ofraʼgi ogwichisad. Geb bela Israel-dulemar we-efod-orbiid Bab-Dummadyob dakdemaladba isgudmalad. Amba deyob Gedeónʼga, degine, e-gwenadganga ibmar-isganaga gunonimogad.

28 Weyob Madián-dulemar, Israel-dulemar-sogedba-nanadii gusmalad. Madián-dulemar bar Israel-dulemargi obindii gussurmalad. Gedeón-gudigusadgi, birga-dulabo (40) Israel-yalagi neg-bogidikid nagusad.

29 Geb degine, Joás-machi-Gedeón Jerobaalʼye-nugbalid e-neggweburse megnad gusad. 30 Agine, Gedeón omegan-ichesur-nikussoggu, dulapaa-gakambe (70) machimala-nikusad. 31 Geb Siquemʼgi ome-dikarbalid nikusbalid. A-omebali, machi-wargwen-nikusad. Abimelecʼye onugsasad.

32 Joás-machi-Gedeón, nue-sereddii burgwisad. Geb Abiezer-wagan-bukwadgi, Ofra-neggweburgi e-bab-Joás-neg-uangi diglesad.

33 Gedeón-burgwisad-sorba, gannar Israel-dulemar Bab-Dummad-Jehováʼgi isgudmalad. Geb Baal-Berit e-bab-dummadga imakde gusmalad. 34 Israel-dulemar e-Bab-Dummad-Jehová-iedmalad, e-isdarmaladgi e-bendaksasuliyob dakdemalad. 35 Deginbali, Israel-dulemar, Gedeón ega-ibmar-nuegan-imaksa-inigwele, e-gwenadgangi wis nued-binsassurmarbalid.

<- Jueces 7Jueces 9 ->