1 A-ibagangi, Israel-yargi rey amba sulid. Aginmoga, Dan-wagan na ambikuega yar-amidimalad. Bela Israel-dulemar-danar-danar-bukmalad-abargi amba yoo Dan-waganga yar-ukleged. 2 Degidbali, Dan-wagan Zora-neggweburgi, degi, Estaol-neggweburgi e-sordamar-bur-gandikmalad walatar barmisad, adi, dulemar-arganaegar, degine, napa-nanaid-arganabaligar. Sordamar-e-ataledga sogdemalad:

“Be namar, yar-arganamar.”

E-ataled nadmargu, Efraín-yalaganba nadmalad. Micaía-e-negse modapmalad. Agi gabismalad. 3 Micaía-neg-mosmargu, sapingwa-Levita-e-sunmaked magar-itosmalad. Degi, ese ibmar egisnadmalad:

—¿Doa wese be-senoniki? ¿Ibu be wegi sae? ¿Ibu be wegi amie?

4 Machi-sapingwa, Micaía-ega-ibmar-imaksad sogded, degi, ega sogded:

—Micaía anbo igar-mesisad, degi, an ega dule-irwa-a-bab-dummadse-goledga an gued.

5 Degidgi, ega sogdemalad:

—Wis be anmar-nuki Bab-Dummadbo sunmake, adi, anmar wisguega, anmar nadele, bule nueganbi anmar naoe.

6 Geb dule-irwa-bab-dummadse-goled amarga sogded:

—Be nueganbi namaloe, ar Bab-Jehová bemarba namaloed.

7 Agine, sordamar-e-ataled nadmalad. Geb, Lais-neggweburse modapmalad. Dakdapmalad, Laisʼginmalad Sidón-dulemar-gudimaladyob gudimarmoga. Sidón-dulemarde nueganbi bonisuli bukwamalad, degi, gwayedsuli bukwamarbalid. We-yargi bela ibmar-nikadbi bukwamalad, ibmarsuli bukwasurmalad. Laisʼginmalad Sidón-dulemargi dikasur-bangu-bukwamalad, degi, dulemar-baiganbo igar-nikasur-bukwamarbalid.

8 Sordamar-e-ataled gannar Zora-neggweburse, degi, Estaol-neggweburse nonimargu, e-dulemar-neggweburginmalad ese egichiarmalad:

—¿Degite, igi be gudmala?

9 Sordamar-e-ataled abin-sogdemalad:

—Anmar ginebinne, egi anmar gwichigu-nae. Ar an neg-daksamaladi, napa-nuedid. ¿Degite, bemar naosuli? Mer geger be itomala. Anmar yar-suega nae. 10 Anmar nader, dulemar-baisur-binsa-bukwamaladse anmar modapmaloed. Degi, a-yar-bipisur-naid Bab-Dummad anmarga ukoed. A-yargi ibmar-bela-nikad, ibmar-soggwenad suli soglesulid.

11 Degidgi, Zora-neggweburgi, degi, Estaol-neggweburgi Dan-sordamar dulataled-ilanergwa (600) nadmalad. A-sordamar bila-onogedgi-ibmar-ebulemalad guar-guar sesmalad. 12 Nadmargu, Judá-yargi, Quiriat-Jearimʼye-neg-nugadgi danar-danar ambikudapmalad. A-ulale, we-garda-narmaklenaidse Quiriat-Jearim-dad-argwanedsik Dan-dulemar-ambikuedye bileged. 13 Agi bukwa, Efraín-yalagansik nadmalad, degi, Micaía-negse modapmalad.

14 Sordamar-e-atar-Lais-yar-argaapmaladi, e-sordaganga sogdemalad:

—Be wismala, we-negyabali mor-efodʼye-nugad bukwad, degi, bab-dummad-negginmalad bukwabalid. Degine, bab-dummadyob-imakleged-ise-wagar-onoar-sobaled, degi, bab-dummadyob-imakleged-manigi-sobaled gwichibalid. Be-itolegedba be samalo, be-imakbimaladba be imakbalo.

15 Micaía-negse modapmargu, Levita-sapingwa-maidse dogdapmalad. Nued-sogeye ega sogsamalad. 16 Dan-sordamar-dulataled-ilanergwad (600), bila-onogedgi-ibmar-ebulemalad-guar-guar yawagak-dogedgi nakulebukmalad. 17 Sordamar-e-atar-yar-argaapmaladi ibmarmar-bukwadyaba dogsamalad. Geb bab-dummadyob-imakleged-ise-wagar-onoar-sobaled searmalad. Geb mor-efodʼye-nugad-bukwad searmarbalid, degi, bab-dummadyob-imaklemalad-negginmalad-bukwabalid searmarbalid. Degi, bab-dummadyob-imakleged-manigi-sobaled searmarbalid. Dule-irwa-bab-dummadyob-imaklegedse-goleddi yawagakgi sordamar-dulataled-ilanergwa-walik (600) gwichid.

18 Dule-irwa-bab-dummadyob-imaklemaladse-goledi neg-akala dakargu, egichided:

—¿Ibu be imaknanai?

19 Abin-sogdemalad:

—Boogwa-be. Mer-be-sunmake. Anmarba be dage, anmarga be dule-irwa-bab-dummadse-goledga guoed, degi, anmarga-binsaed-ukega be gubaloed. Bur-nabirsursi, dule-wargwenga-arbaedba be bela Israel-dulemarga Bab-Dummadse-goledga gued. A-bur-nuedi.

20 Dule-irwa-bab-dummadyob-imaklemaladse-goled na yeer-itosad. Geb na mor-efodʼye-nugad-bukwad sesad, degi, bab-dummadyob-imaklemalad-negginmalad sesbalid, degi, bab-dummadyob-imakleged-ise-wagar-onoar-sobaled sesbalid. Geb Dan-sordamarba nadsunnad. 21 Dan-sordamar nadmargu, burwigana e-idu-naega-imaksamalad, degi, ibmar-durgan, degine, e-ibmar-ebumalad e-idu sedega imaksamalad.

22 Dan-sordamar undargus nanamaladgine, Micaía, dulemar-e-neg-dikarba-mamaidbo atosad. Geb na Dan-sordamar-balegitemalad.

23 Micaía-sordamar binnasur gornadapmarsoggu, Dan-sordamar daksik-aibilidmalad. Geb agine, Micaíaʼga sogdemalad:

—¿Ar ibu be itoge, be oimakdanimalad?

24 Micaía abin-sogded:

—Igi be anga sogmala, ¡ibu-itoye be anga sogmala! Ar bemar an-bab-dummagan ani semaid, dule-irwa-bab-dummadse-goled ani be semaimarbalid. Bela be ani ibmar-obelosmalad, gwen be anga wis ibmar obessurmalad.

25 Dan-sordamar abin-sogdemalad:

—Mer be anmar-abin ee-gwisgue. Degiile, an-sordamar-abala sae-itoalile, begi gwichigudmaloed, binsarsunna be burgwedagoed, be-gwenadgan binsa-burgwedamarmogoed.

26 Micaía egi-obin-dakargu, gannar e-negse nadsunnad. Dan-sordamardi na e-nadapmaladba na nadmalad. 27 Deyobi, Dan-sordamar, Micaía-ibmarmar-sobsad sesmalad, degi, e-dule-irwa-bab-dummadyob-imaklemaladse-goled sesmarbalid. Geb degi, Lais-neggweburse modapmalad, dulemar-bogi-bukwamaladse, degi, dulemar-akar-gwen-binsa-buksurmaladse. A-dulemargi gwichigusmalad, es-suidgi ogilosmalad, degi, e-ibe neggwebur ogumaksamarbalid. 28 Ar Lais-neggwebur Sidón-neggweburgi dikasur bukwasoggu, dulemar-baiganbo igar-nikasurbarsoggu, dule-e-bendaked sate-gusad. Lais-neggweburde nebagi siinad, Bet-Rehob-neg-nugad-walik.

Geb a-sorba, Dan-dulemar a-nega gannar neggweburga urbisad, degi, na agi ambikusmalad. 29 Neggwebur, Laisʼye nugan-inigwele, Dan-wagan e-dad-dummad-Danʼba Danʼye onugsasmalad. Danʼde, Israel-e-machid. 30 Agi, Dan-wagan bab-dummadyob-imaklemalad ese-golega urbismalad. Degine, dule-irwa-bab-dummadyob-imaklemaladse-golega Jonatán-nug-imaksamalad. Jonatánʼde, Gersón-machid, Moisés-wagwabalid. Geb a-sorbali, Dan-dulemar-gales-selesmalad-ibaganse, Jonatán-wagan Dan-dulemar-irwa-bab-dummadyob-imaklemaladse-golega gusmalad. 31 Silo-neggweburgi Bab-Dummadse-goled-neg-siid-gusad-ibagangi, Micaía-ibmarmar bab-dummadyob-imakleged-sobsamalad Dan-neggweburgi amba ebudii gusmalad.

<- Jueces 17Jueces 19 ->