1 Dule-gwensak-Micaíaʼye-nugad Efraín-yalaganba maigusad. 2 Ibagwengi, e-nanga weyob sogded:

—Nana, dule bei-mani nibir-durgwen-gakabaabak (28) atursasad-ukabsanai an be-itosad. Ani an be-ibe we-mani susad. Ani an ganikid.

E-nan ega sogded:

—¡Machi, Bab-Jehová begi nued binsasun!

3 Micaía e-nan-ibe mani-nibir-durgwen-gakabaabak-atursasad (28) gannar e-nanga uksad. Geb agi, e-nan weyob sogded:

—We-mani Bab-Jehováʼga an nug-imaksad, adi, we-manigi dule-mani-sobed an-machiga bab-dummadyob-imakleged-ise-wagar-onoar sobega, degi, bab-dummadyob-imakleged-manibiid sobbaligar. Emisgindi, gannar an bega ukbalid.

4 Degisoggu, Micaía gannar e-nanga mani-uksagua, e-nan, mani-nibiratar-aidiku-wilub dule-mani-sobedga uksad. A-dule, bab-dummadyob-imakleged ise-wagar-onoar sobsad, degi, bab-dummadyob-imakleged-manibiid sobsabalid. Geb a-sorbali, Micaía-negse berbeapid.

5 Micaía e-neggi bab-dummadyob-imaklemalad-neg sii gusad. Degine, mor-suid-efodʼye-nugad maksabalid, degi, bab-dummadyob-imaklemalad-burwigana sobsabalid. Deginbali, e-machi-gwensak dule-irwa-bab-dummadyob-imaklemaladse-golega nug-imaksabalid. 6 Ar ade, a-ibagangine, Israel-yalagi rey sulid. Degisoggu, dulemar na e-itolegedba nanabukwad, degine, na e-dakedba ibmar-imakbukwad.

7 Deunni, Belén-neggweburgi machi-sapin-gwensak Levita-dule Judá-yalagined gudiid. 8 We-machigwade, Belén-neggweburgi-gudiid neg-baid-amiega aligusad. Degi, Efraín-yalaganba-nadapi, Micaía-negse modapid.

9 Micaía ega sogded:

—¿Bia be daniki?

Levita-dule abin-sogded:

—Belén-neggweburgi an daniki. An Levita-dule. Emi, an megega neg-amidii.

10 Degi, Micaía ega sogded:

—An-walik be mego, adi, be anga dule-irwa-bab-dummadse-goledga guegar, degi, anga-binsaed-ukedga be gubaloed. Birgagi, mani-sibu-miligwen gaka dulatar (1,100) aidiku-wilub, an be-bennukoed. Mor an bega ukbaloed, degine, an bega masgulleged ukbaloed.

Degi, Levita-dule bessundo.

11 Levita-dule, Micaía-walik-megnonigu, nued itosad. E-machiyob Micaíaʼga gunonikid. 12 Geb Micaía dule-irwa-bab-dummadyob-imaklemaladse-goledga Levita-dule-nug-imaksad. Degisoggu, Levita-dule Micaía-neggi gudii gunonisunnad. 13 Micaía na weyob binsaalid:

“Dule-irwa-bab-dummadse-goledga an Levita-dule-imaksasoggu, an wisi, emisgi Bab-Jehová an-bendakoe.”

<- Jueces 16Jueces 18 ->