Isaías 37

Jerusalén-neggwebur-bendaklesad

(2 Reyes 19:1-13; 2 Crónicas 32:20-23)

1 Rey-Ezequías deyob ibmar-itosgua, e-mor-yoid siir-siir imaksad. Geb wile-itoged-mor yosad. Geb Bab-Jehováʼse-goled-negse naded. 2 Degi geb Rey-Ezequías, dummad-reyneg-dakdiid-Eliaquim, degi, ibmar-gusad-narmaked-Sebna, degine, dule-irwa-Bab-Dummadse-gormalad-sergan wile-itoged-mor-yoyoi, Amoz-machi-Isaías-daknamalaga barmisad. Isaíasʼde, Bab-Dummad-gayaburba-barsogedid.

3 Isaíasʼga sognonimalad: “Weyob Rey-Ezequías soged: ‘Emi-iba-naidi, suli-suli-itoged-iba naid, sabsur-odurdakleged-iba naid, degine, bingegued-dummad-iba naid. Igi ome muu-neggi-nagudele, na abagan-nollo-naddae, deyob emi-iba naid.

4 ” ’Bitigine, be-Bab-Dummad-Jehová, Asiria-sordamar-e-dummad-ibmar-sogsadi, bela itosana gadin. Ar ade, Asiria-e-rey, e-sorda-dummad, Bab-Dummad-Dula-Maidgi-dodoar-sunmakega barmiar gusad.

” ’Bitigine, be-Bab-Dummad-Jehová, we-dule-gayaburba-itosadba sabsur-odurdaksunnana gadin. Bab-Dummadse Israel-dulemar-napi-gudimaladga be gorsun.’ ”

5 Rey-Ezequías-e-dummagan Isaíasʼse nadmargu, 6 Isaías ega sokalid: “Weyob be-dummadga be sogmalo: ‘Bab-Jehová weyob sogye: Be we-dule-ibmar-soge-itosadgine, Asiria-e-rey-e-dummagan angi ise-yolegar-sunmaksadgine, mer be gwayo. 7 ¡Be dako! Senaquerib gayaburba-isgana-itogega an imakoed. Geb gannar e-yarse naoed. Geb e-yargi, es-suidgi oburgwemalaga an imakoed.’ ”

8 Asiria-sordamar-e-dummadi, Asiria-e-rey, Laquis-neggweburgi-mai-nadye-wisguargu, balimakde gusad. Libna-neggwebur-ebo bila-ononai Asiria-e-rey-dakdapid.

9 Geb agine, Rey-Senaquerib wisgualid, Etiopía-dulemar-e-rey-Tirhaca, ebo bila-onogega egi daniye. Deyob-wisguargua, gannar Rey-Ezequíasʼse dule-gayaburba-berbemalad barmisad, 10 ega sogegar: “Judá-e-rey-Ezequías, be-Bab-Dummad-egi-be-bensurgudiid bega-sogedi: ‘Asiria-e-rey Jerusalén-neggwebur suosurye.’ Mer be-Bab-Jehováʼse be yardaklego. 11 Ar Asiria-e-rey bela yarmar-obelos-gusadde be wisgussursi. Ar degite be, ¿san-onogo be itoge? 12 Ar an-babgan Gozán-neggwebur-obelosgusadi, Harán-neggwebur-obelosgusadi, Resef-neggwebur-obelosgusadi, Edén-wagan-Telasar-neggweburgi-bukwad-obelosgusbalidi, degitega, ¿e-bab-dummagan bendaksa be daksi? 13 Degite, ¿bia Hamat-dulemar-e-reyde, Arfad-dulemar-e-reyde, nadmarsunna? ¿Bia Sefarvaim-dulemar-e-reyde, Hena-dulemar-e-reyde, Iva-dulemar-e-reyde, nadmarsunna?”

Ezequías Bab-Dummadse-gochad

(2 Reyes 19:14-19)

14 Degine, Rey-Ezequías, dule-gayaburba-berbemalad-abin garda susad, geb absosad. Geb a-sorbali, Bab-Jehováʼse-goled-negse naded. Geb Bab-Jehová-asabin garda nallaa imaksad. 15 Geb degi, Ezequías weyopira Bab-Jehováʼse goted:

16 “Bab-Jehová-Bela-Gangued-Nika-Maid, Israel-dulemar-e-Bab-Dummad, baliwiturmar-wagar-darbakegwad-abargi be negsemaid. Unnila bebi we-napneg-naid-e-Bab-Dummadga be gued. Be nibnega nasiksad, napnega be obinnisbalid. 17 Bab-Jehová-Dula-Maidye, nue be an-itoye, nue be anmar-gunaid be dakye. Igi Senaquerib begi ise-yolegar anga gayaburba-barmiali, nue be itoge.

18 ”Bab-Jehová, ar nue napiragwa, Asiria-e-reymar we-neggweburmar, e-yarmar, obelosad. 19 E-bab-dummadyob-imaklemalad bela soogi-ogumaksabalid. Ar wemar Bab-Dummadsurmalad, suarmar-sobaled nanaed, akwa-sobarmalad nanaed. Dulemar sobsananaedid. 20 Emidi, Bab-Jehová, be-anmar-Bab-Dummadid, wis be we-dulegi anmar-bendake, adi, dulemar bela we-napneggi-bukmalad be-wisgumalaga, unnila beebi, Bab-Jehová wargwenna maiye.”

Rey-Senaquerib-burgwisad

(2 Reyes 19:20-37; 2 Crónicas 32:20-21)

21 Geb degi, Amoz-machi-Isaías, Rey-Ezequíasʼse weyob gayaburba barmisad: “Bab-Jehová Israel-dulemar-e-Bab-Dummad, weyob soged: ‘Be anga Asiria-e-rey-Senaqueribʼgi ibmar-sogsadi, bela an be-itosye. 22 Ani an Bab-Jehová, weyob Rey-Senaqueribʼnik an soged:

Senaquerib, Siónʼginmalad sae be-dakmalad, begi dodomalad.

Jerusalénʼginmalad wakite-be-dakmargu, bega nono-ege-ege imakmalad.

23 Senaquerib, ¿doanik be isdar-sunmaksa?

¿Doagi be ise-dodoar-sunmaksa?

¿Doaga urwedgi be ibmar sogsa?

¿Doa-abin san-dummarba be itosa?

Ar be Israel-e-Bab-Dummad-Isligwalednik be isdar sunmaksad.

24 Bega-gayaburba-berbemaladba be Bab-Jehováʼgi ise-yolegar sunmaksad.

Weyob be sogsad: An-moli-ur-bila-onomaladgi Líbano-yar-dummagan-birigi an nakwisye.

E-urwarmar-dummagan-bubukwad, ani an ei siksa naiye.

E-baryawarmar-yeerdaklegwismaladi bela an ei immisye.

E-yar-birse an nakwisye,

e-neg-sergan-nanaid bela an ei wisgusbarye.

25 Dule-baigan-yargi, ani an dii-yaamar urbisye,

we-diimar an gobsaye.

An-nanaedba, bela Egipto-diwarmar an odinnosye.

26 ” ’Senaquerib, ¿ar be wissursi?

Ar bato an dikasurgus we-ibmarmar-guoed an ega igar mesisad.

Bato yola-birgabargus weyob-imakega an igar amisad.

Emisgwa, geb an we-ibmarmar oyoalid.

Aga be nabir neggwebur-sakdigar-bukmalad be obelos nanaed.

27 E-dulemar gaganmar-naiyob be-abin naded,

gwen be-abin imaksasulid,

be-abin nollo nadmalad.

Be-abin bingegudmalad.

Amarde nainugi gagan-dutugana-naiyob, be-abin nadmalad.

Neg-uas-birgi-gagan-ainialir dinguddaeyob, be-abin nadegusmalad.

28 ” ’An nue bela-belad be-wisid, sanase be signonidae,

sanagwadse be aineba naddabali.

Sanagwadse be dognonidabali.

Deginbali, sanadgine be angi isdar-sunmakardabali,

bela an nue be-wisid.

29 Ar be, an-annik sunmaksadi,

be-angi-apor-sunmaksadi, an bela itosad.

Degisoggu, be-asugi esgoro-wardummad an yooed,

mer bar be sunmakega be-gaya an edinnoed.

Degine, bia be danigusa, gannar a-igarba an be-barmidoed.’ ”

30 Isaías, Rey-Ezequíasʼga weyob soged:

“Rey-Ezequías, we-ibmarmar bega e-wilubga guoed:

We-birgagine, ibmar-gwag-gwen-diglessuli-ainiardaed be gunmaloed.

Baid-birgasega, ibmar-gwag-diglessulid-sanmakoedi amba be gunmarbaloed.

Geb birgapaasedina, sunna ibmar-gwaggi be arbamaloed,

degi, nabir be weemarbaloed.

Sunna uvaʼgi be arbamaloed,

degi, geb nabir e-san be gunmaloed.

31 Judá-wagan-abala-san-onosmaladi sapi-malimar-ainiardaedyobi, gannar ainidagoed,

e-anagan gannar nikudoed.

32 Ar Jerusalén-neggweburgi wis ichee dulemar bedapoed,

amba Sión-yargi bukumaloed.

Ar Bab-Jehová-Bela-Gangued-Nikad e-dulamargi-bela-bela-sabgued-nikadba, we-ibmar imakoed.”

33 Degisoggu, Bab-Jehová, Asiria-e-reynik weyob soged:

“Senaquerib we-neggweburse gwen dogosurguoed.

We-neggweburgi sigu-wargwensaar miosulid.

We-dule, bila-onogega we-neggweburse sigu-abgaedyalaba gwen urwosulid.

Deginbali, neggwebur-galu-matusulid-dikarba, gwen napa-nakwemaid imakosulid.

34 Ani an Bab-Jehová-guedgi, an soged:

We-dule, gebe-danigusadba gannar naoed.

We-neggweburgi gwen dogosurguoed.

35 ”An we-neggweburgi nued-binsasoggu, an-mai-Davidʼgi nued-binsabarsoggu,

we-neggwebur an bendakoed, we-neggwebur an obelogosulid.”

36 A-mutikidgine, Bab-Jehová-e-baliwitur, Asiria-sorda-bukwadgine, mili-dulabakebak-gakatar (185,000) dulemar-ogilosad. Degine, neg-oiboargu, bela dulemar burgwar-mamaitibi oiboalid. 37 Degidgine, geb Asiria-rey-Senaquerib nadegusad, gannar Nínive-neggweburse nonigusad, agine megidapid.

38 Ibagwengi, Rey-Senaquerib bab-dummad-Nisrocʼse-goled-neggi, e-bab-dummadse-gorsiidgi, e-masmala Adramelec, degi, Sarezer, es-suidgi Senaquerib-oburgwismalad. Geb agine, Ararat-yalase wakitegusmalad. Senaquerib-sorbali, e-machi-Esar-Hadón yar-sesad.

<- Isaías 36 Isaías 38 ->