Isaías 22

Negburgan-Daked-Nebagi yoedse-ibmar-guoed

1 Isaías, Negburgan-Daked-Nebagi yoedse-ibmar-guoedgi sunmaksad:

¿Igi be itomala? Emide, bela bemar neg-uas-birgi be nakwemamaigu.

2 Bemar, dulemar-e-itoleged-damalad-neggweburad,

bemar, oimakedginbi-gudidamaladid,

ibagibi be negdakdimalad.

Ar be-dule-burgwismaladi, es-suidgi gwen burgwissurmalad,

bila-ononanaidgi gwen burgwissurmalad.

3 Bela be-dummagandi, danar duurmakdemalanad,

degi-inigwele, gwen egi warsi-miledsuli galedapmalad.

Bela be-dulemar-galesmaladi, aisaar wakinye sokarmalanad,

bela galedapmalad.

4 A-ulale, Bab-Jehová weyob sogsad:

“Be angi bangumar.

Mer be anse gormar.

Melle an-gwage baisur-itoge be imakmar.

An-dulamar-bela-bergusad-ular, an boesii imakgwelo.”

5 Ar Bab-Dummad-Jehová-Bela-Gangued-Nikad, Negburgan-Daked-Nebaga gwayed-dummad-iba nasiksad,

suli-suli-itoged-iba nasiksad,

nug-bipi-gued-iba nasiksad.

Galu-matusulid-earleged-iba nasiksad,

yalaganba binnasuli-gordigued-iba nasiksad.

6 Elam-yar-sorda-bila-onomalad moli-birgi-sii e-warsi oniarmalad.

Kir-yar-sorda-bila-onomalad e-sigu-abgamalad oniarmalad.

7 Be-neba-yeerdaklemaladgi ur-bila-onomaladi, engus nanaid.

Sorda-bila-onomaladi, degi, e-molimala, bela neggwebur-yawagak-doged-ebilis bukwad.

8 Judá-dulemar bendakleged-sate gudmalad.

A-ibagine, bemala Sapurba-Neg-Dummad-siidgine,

bila-onogedgi-gingimar-ebulemalad-bukwadi, be daksagusmalad.

9 David-neggwebur-e-galu-matusulid bukidar marar-marale be daksa gusmarbalid.

Degine, dii-saboleged-urbalid-siidgine, dii be wesmarbalid.

10 Jerusalén-negmar-bukwad be ebichismarbalid.

Galu-matusulid-mararmalad-nudakmalaga, abala, a-negmar-bukwad be earismarbalid.

11 Galu-matusulid-abinnidgi, be dia sobsamalad,

adi, dii dia-epennegwadgi-sabolesiid, dia-soblesadse ogwaegar.

Degi-inigwele, we-dule-ibmarmar-imaksadgi be binsaed-nikaa gwen gussurmalad.

Degine, we-dule dikasurgus-we-ibmar-guoed-mesisadi, aku be daksamalad.

12 Isaías sogdebalid:

“A-ibagangine, Bab-Dummad-Jehová-Bela-Gangued-Nikadi, boega bemarse gochanad,

bukib-binsaega bemarse gochanad.

Sailagia-swiri-saega bemarse gochanad,

mor-sommed-yoega bemarse gochanad.

13 Degi-inigwele, aka bemar weligwar itodmalad.

Yeer-itogedba be iba onodmalad.

Moli-bebe-nikad be oburgwidmalad,

sibad-wawaad be oburgwidmalad.

Moli-sana be gutemalad,

vino be gobdemalad.”

Degine, be weyob sogdemalad:

“Anmar mas-gunmala, anmar gobed-gobmala,

ar anmar banedse burgwemalosursi.”

14 A-ulale, Bab-Jehová-Bela-Gangued-Nikad an-uayagwar anga weyob sogsad: “We-isguedi an bemarga osulogosulid. Ani, Bab-Dummad-Jehová-Bela-Gangued-Nika-Maid, an soged.”

Eliaquim, Sebna-muchub dummadga onaklesad

15 Bab-Jehová-Bela-Gangued-Nikad weyob Isaíasʼga soged: “Sebna be aminae, ar ade, reyneg-daked-dummadid. Ega be weyob sogo:

16 ‘¿Ibu be wegi sanai?

¿Doa bega igar-uksa neg-uangi be yaa-gwisega?

¿Ibiga be nibali ise-sobale be yaa gwisnai?

¿Ibiga be akwasailagi nuesaale-megega be yaa gwisnai?

17 ” ’Ar Bab-Jehová dikasuli be-barmetoed.

Dule-gandikid-emar-gaeyobi, Bab-Jehová be-gaoed,

ise-sabsur be-metoed.

18 Ogob-baparmakeyob be-imakoed,

yar-dummadgi be-balimetoed.

Agi, be burgoed.

Agi be-ur-bila-onomalad-yeerdaklemalad bedapoed.

Be-dummadga binged-dummad be guoed.

19 Be-gangi be siidgine, an be-onogoed.

Be dummadga-maidi, an be-oberguoed.’

20 ”A-ibagine, an-mai-Hilcías-machi-Eliaquimʼse an goloed. 21 Be-mor-dummad-suid an ega yooed. Be-molidub an ega nasikoed, degine, be-negseed-igar an ega ukoed. Jerusalén-dulemarga, degi, Judá-dulemarga, e-babayob guoed. 22 Rey-David-waganga-ibmar-sogega an ega igar ukoed. Eliaquim igar-ukele, dule igar-gaosulid, gwen dule egi akar sunmakosulid. Eliaquim igar-uksulile, ibmar guosulid. 23 Igi esgoro ise-bioklegar-gwisdae, deyob an Eliaquim dummadga-megega imakoed. Egine, e-neg-yaginmalad nug-gannarba itomaloed. 24 Bela e-neg-yaginmalad egi weligwar-itomaloed, degi, bendakdemarmogoed: E-masmala, e-wagan, bela-e-gwenadgan-bamalad, degine, e-aimarse-bakale, bendakdemaloed.”

25 Bab-Jehová-Bela-Gangued-Nikad weyob sogbali: “A-ibagine, ani an, Eliaquim, bela-e-gwenadgan, bela dulemar-egi-bengussurmalad obelononikoed. Ani an Bab-Jehová-guedgi, deyob an soged.”

<- Isaías 21 Isaías 23 ->