Link to home pageLanguagesLink to all Bible versions on this site

1 Ar bela dule-irwa-Bab-Dummadse-gormalad-bur-dummagan-megismalad dulemar-abargi sules daed. Sulegogua, dulemar-irwa Bab-Dummad-asabin gwisguega, Bab-Dummadga ibmar-ukleged ukega, degine, dulemar-isgued-ular Bab-Dummadga-ibmar-ogumakar-ukleged-ukega nugsalesdaed. 2 Adi, mer mesagwar dulemar-ibmar-wissurmalad-imakega, degi, dulemar-igar-nuedgi-bangudmalad-imakegar. Ar ade, na e-sunna nolloo gumogad, sunna isgumogad. 3 A-ulale, na e-isgued-ular, degi, dulemar-isgued-ular, Bab-Dummadga-ibmar-ukleged ukmogargebed.

4 Dule na-dukin geg wargwengi dule-irwa-Bab-Dummadse-goled-bur-dummadga na nugsaed. Unnila Bab-Dummad ese golergebed, igi-Bab-Dummad Aarónʼse gocha-gusmoga, deyobi, ese gormogargebed. 5 Ar Cristoʼmoga na-dukin dule-irwa-Bab-Dummadse-goled-bur-dummadga nug-imaksasurmogad. Bab-Dummadi Jesús-nug-imaksad. Bab-Dummad ega sogsagusad:

“Be an-machi gued,
emi-ibagi, an be-babga gunonikid.”
Salmo 2:7

6 Ar Bab-Dummad-Gardagi narmakar naibalid:

“Be, Bab-Dummad-asabin Dule-Irwa-Gwisgued-Dummad-Degisadeguadid.
Igi Melquisedec maigusa, deyob be gumogad.”
Salmo 110:4

7 Cristo we-napneggi-gudigusgu, Bab-Dummad-nabir-burgwedgi-e-ollor-imakedse ibyanis-abalagi ise-wilegar binnasuli-gordii gusad. Bab-Dummad we-Cristo-ese-binnasur-gochad itosad. Ar Bab-Dummad, Cristo eba-nue-uaya-nika-nanadigusadba itosad. 8 Ar Cristo Bab-Dummad-Machi-inigwele, na nue-wilesadbali, Bab-Dummadba-ibsaed durdaksad. 9 Agi nue-durdaksasoggu, bela dulemar-eba-ibsaedga abonoleged-degisadeguad-ibedga gunonisunnad. 10 Geb Bab-Dummad sognonisunnad, Melquisedecʼyob be dule-irwa-Bab-Dummadse-goled-bur-dummadga an be-nug imaksunye.

Bab-Dummadgi-bangued, bonisailad
11 We-igargangine, bukidar anmar egi sunmaked-nika-inigwele, nuegwadsun bela bega sogegala, dutusulid, ar ade, bemar amba nue-aku itomalad. 12 Ar bemar bato dikasurgus odurdaked-sailaga gusawilubmalanad. Emigindi, amba bemarga gannar Bab-Dummad-Gayaburba-onodedgi ibgwensuli-durdaklemaladgi bega sunmaked be abemalad. Ar bemar deyob gunonisoggu, amba bemar nunis gobergebed, ar geg be amba san gunmalad.

13 Ar dule amba nunis-gobnaile, amba Bab-Dummad-Gayaburba-napiragwad nue-wissulid. Ar ade, amba Bab-Dummadgi mimmiga gued. 14 Ar san-gunmaladdi bato wedi dule-nue-Bab-Dummad-igargi-nasgumaimaladgadid. Ar dule-magasar-ibmar-itogedgadid, igid igar-nuedi, igid igar-isganabali.

<- Hebreos 4Hebreos 6 ->