HABACUC-GARDA
HABACUC
GEBE-SOGLENAID
Garda-nug
Habacuc-Garda. Judá-dulemar Babilonia-yarse selesmalad-idu, Habacuc, Judá-dulemarga Bab-Dummad-gayaburba-barsoged-napidga gusadid. Dulemar dogdar innikimakar e-nug-obarileged wissulid. Egi binsaledo, wede Angaagwar-gaed, e-nug obarileye.
Habacuc-Gardagi weyob sunmaklenaid
Habacuc, Judá-dulemar Babilonia-dulemarse gebe-gales-seledsokarmalad-idu ega sunmaksa gusad. Habacucʼgi binsaleged, Sofonías-ibagangi, Jeremías-ibagangi, degine, Nahúm-ibagangi, Bab-Dummad-gayaburbagi sunmaksaye.
Habacuc, Bab-Dummad-ibmar-imaknaidba ese egisnai gusad, ibiga Judá-dulemar deyob ibmar imaknaiye. Habacuc, Judá-dulemar-daed nabir daksursoggu, Bab-Dummadga sognai gusad: “We-dulemar be sabsur-odurdakye.” Bab-Dummadi, Habacuc-ese-gochad itosad. Geb ega sogsad: “We-dulemar, Babilonia-sordamarse sabsur-odurdaklemaloye.”
We-gardagine, weyob ilemakar sunmaklenaid:
1. Igar-inniki-imaklesulidba, Habacuc sabsur-ibmar soged (1:1-4).
2. Bab-Jehová, Habacuc-abin-imaksad (1:5-11).
3. Habacuc, Bab-Dummadga gannar-ibmar soged (1:12-17).
4. Bab-Jehová, Habacuc-abin-imaksad (2:1-5).
5. Dule-inniki-ibmar-imaksurmalad, dummad-wilegoed (2:6-20).
6. Habacuc, Bab-Dummadse-goled (3:1-19).
Be itogua.

1. IGAR-INNIKI-IMAKLESULIDBA, HABACUC SABSUR-IBMAR SOGED

(1:1-4)

1 Bab-Dummad-gayaburba-barsoged-Habacuc negburgan-daksagua, we-gayaburba ega soglesad.

Habacuc, Bab-Dummadga ibmar soged

2 Bab-Jehováʼye, ¿sanagwadse an bese bendakleged egisnaiguoe?

Emide, gwen be an-itosulid.

¿Sanagwadse dulemar-sabsur-imakledimalad-ular, an bese gornaiguoe?

Emide, gwen be anmar-bendaksulid.

3 ¿Ibigala, igar-innikwad-imaklesulid-dakega be an-imake?

¿Ibiga ibmar-isgana-imaklenaid-dakega be an-imake?

Unnila neg-gagalenaidbi, degi, dule-sabsur-imaklegedbi an daked.

Urwelegedbi, degi, na abin-abin-imakmaladbi neg-naid.

4 Agala, igar-maidba ibmar-imaklesulid,

igar-innikigwad-imakleged bar imaklesulid.

Dule-isgana dule-nued-balegindiid,

dulemarga igar-innikigwadba igar nabolesulid.

2. BAB-JEHOVÁ, HABACUC-ABIN-IMAKSAD

(1:5-11)

5 Bab-Jehová sogded:

“Dule-yar-baid-baidgi-bukwamalad be dakmala.

Nuekwaa be dakmala, geger-dakbukwa be gumala.

We-ibagangi ibmar-gegerdaklemalad an imaksokalid,

amba dule bemarga a-ibmar-imaklegoed-odulogele, bemar amba bengumaloed.

6 Caldea-dulemar an bemargi bila-onodagega imaknaid,

we-dulemar, dule-isgana-nanaed, binna-binnasuli ibmar-imakmaladid.

Dule-baid-ibe napa-suega bela napneg-ebirdii damalad.

7 We-dulemar dule-buleganad, dule-ogwayemaladid,

na e-sogedba igar-innikigwad-imakleged imakmaladid.

Na e-nugbi-dummarbagued amidimaladid.

8 E-molimar, achu-barbadba bur bule abarmakmalad,

achu-sapurba bur bule ursirmalad.

E-sordamar-moli-birgi-bila-onomalad sabsur-abarmakmalad,

we-sordamar dikasur danimalad.

Igi sulubagi e-mas-daksale, binnasuli egi melleardae,

deyobi dulemargi mellear damalad.

9 We-dulemar unnila emar-sabsur-imakega danimalad,

e-nadapmaladba neg-dobedbi nasiknadapmalad.

Ukub-weeyobi dulemar-gamalad.

10 Reymar-mamaidgi burgunagus damalad,

sapin-dummagan-negsemamaidgi dodonagus damarbalid.

Neggwebur-galu-matusur-nikamaladga allenana damalad,

ar ade, a-neggweburmargi-dogegala arsanyob napamar sobmalad.

11 We-dulemar burwa-dummadyobi bela ese ibmar oitoledaed.

E-gangued e-bab-dummadga imakdimalad. Agi e-isgued siid.”

3. HABACUC, BAB-DUMMADGA GANNAR-IBMAR SOGED

(1:12-17)

12 Be, Bab-Jehová, bato be negasaila-akale gudiid.

Be, an-Bab-Dummad-isligwaled, be degisadegu dula maid.

Be, Bab-Jehová, igar-innikigwad-imakmalaga be Babilonia-dorgan urbisad.

Be, akwasaila-dukuedyob anmarga gued.

Anmar-sabsur-odurdaked-oyogega be Babilonia-dorgan urbisad.

13 Be, bela-bela dule-swilidikgusoggu, ibmar-isgana be abesulid.

Dule-sabsur-imakleged be yeer daksurbalid,

degite, ¿ibiga be dule-isganamar baisur-daksunna?

Dule-isganamar dule-nuegan-sabsur-imaknaid be dakmaidgi,

¿ibiga be gayamakar maisunna?

14 Uamar-e-idued-satedyobi be dulemar-imaksad,

ibmar-unimalad-e-idued-satedyob be dulemar-imaksad.

15 A-ulale, Babilonia-dorgan achwergi-uasoeyobi dulemar-gamalad.

E-sakigi ua-galesar-ebipidamaladyobi dulemar-ebipimalad.

E-saki-ollo-ollogwad-imbaba ua-galesnanaid-weedyobi dulemar-wemalad,

degidba, yeer itomalad, weligwar itomalad.

16 A-ulale, Babilonia-dorgan na e-sakiga bab-dummadyobi ega ibmar-ukleged ukmalad.

E-sakiga ina-wawadikid ogumakmalad.

Ar e-saki-nukad na e-masgunned bukidar nikad,

e-mas yeer gullebalid.

17 Ar deyobi, Babilonia-dorgan, dulemar-wiogega, ¿na e-saki-midii gumaloe?

¿Dulemar-gwen-wiledaksuli gindakdii gumaloe?

Habacuc 2 ->