Ezequiel 24

Bormogi-burbar-sunmaklenaid

1 Deunni, anmar birgabakebakgus Babiloniaʼgi-bukwadgine, gaka nii-warambegwad-ibambegine, Bab-Jehová weyob anga sokalid: 2 “Dule-machi, emi-iba-naid be narmake, ar Babilonia-e-rey Jerusalén-dulemargi-bila-onogega emi-ibagi Jerusalén-ebiris bukwad. 3 We-dulemar-uayasulidamaladga burbar-sunmakleged be soge. Bab-Jehová-Bela-Gangued-Nikadi, weyob sogye ega be soge:

‘Sooyagi bormo be onakwe,

bormoyagi dii be eogo.

4 Bormoyagi sanmar-goamakaled be obato,

e-dua-sanmar-bur-nuegan, e-yarganmar-bur-nuegan be obato.

Degi, e-garmar-bur-nuegan bormoyagi be obatebalo.

5 Sibad-wawaad-wardadagwad be suo.

Nue dii gwakwarmakegala, bormo-urba sapanmar be yoe-yoe sao,

adi, garmar ise-akwiguar guegar.’ ”

6 Ar Bab-Jehová-Bela-Gangued-Nikadi weyob soged:

“¡Neggwebur-ablis-eoged, be wiles!

Bormo-saamechadyob be siid,

be-saamechad geg elileged.

Yamo ise-dakarsuli, gwa-gwagwen san-goagan-bormoyagi-bukwad be sue.

7 ”Ar neggweburgi dulemar-ibe-ablis-eolesgusadi, yaisur naid.

Ar ade, akwa-dummad-birgi ablis milesad.

Ukubba ablis-oubogega,

napagi ablis-eossurmalad.

8 An sae-itogegala, an buged-mai imakegala, ablis-eolesad akwa-dummad-birgi-dinguega an imakoed.”

9 Degisoggu, Bab-Jehová-Bela-Gangued-Nikadi weyob soged:

“¡Neggwebur-ablis-eoged, be wiles!

An bela-belad soo duurmaksii imakoed.

10 Sapanmar gatik odunnumaksii an saoed,

san ise-akwiguarguega, an soo ogaoed.

Bela san-nis dinnaa guedse an imakoed,

degi, bela garmar gummakedse an saoed.

11 Geb sorbali, sooyagi bormo-ollogwad an sioed,

adi, bormo sooba ginnitibi sigegar.

Degidbali, e-satemaksiid surgudoed,

e-saamechad bergudoed.

12 Ar we-bormo bela-bela saamechasoggu,

amba sooginbela geg osuloleged.

13 ”Jerusalén-neggwebur, be-galagwensuli-gudigusad an bega elibi gusanad, ar bedi bega-elied gwen abessulid. A-ulale, an-sae-itogedba-sabsur-be-odurdakoed-sorbali, geb be swilidik gunonisunnoed.

14 ”Ani an Bab-Jehová-guedi we-ibmar soged. An we-ibmar imakedsegad. An-sunnad an imakoed, an sikirmakosulid. An wile-be-dakosulid, deginbali, an ibmar-sogsad an gannar-osulogosurbalid. Be-daedba, be-ibmar-imakedba an bega igar-nabogoed. Ani an Bab-Jehová-Bela-Gangued-Nikadi weyob soged.”

Ezequiel-ome-burgwisad

15 Bab-Jehová anga sogdebalid: 16 “Dule-machi, be-ome na be bela-bela-binasogdiid ukiagwale, an be-ibe suoed.

Melle be boo,

melle be naibi itogo,

degi, melle be ibyanis eobalo.

17 Unnila, gwage-ulubgi be nunmak itogo,

melle be burgwismaladba nunmak itogo,

mor-gurgin-bipirmakaled nonogi be sio,

sapat be yoo,

melle wagar-emurkwaa be imako,

degi, melle dule-burgwedgi-masgulleged be gunbalo.”

18 Wakdaradba dulemarga an sunmaksagua, sedogidba an-ome burgwisad. Bangine, anga-ibmar-soglesadba, an ibmar imaksad.

19 Dulemar anga sokalid:

—Anmarga be soge, be weyob-daedi, ¿ibi anmarga obare?

20 Geb dulemarga an sogde gusad:

—Bab-Jehová weyob anga sogsad, weyob anga igar uksabalid. 21 Israel-dulemarga iduakwaa ibmar be sogo, weyob Bab-Jehová-Bela-Gangued-Nikadi sogye:

” ‘Anse-goled-nega an obelogoye. We-nega bemar-gangued-dummarba-imaked-negad. Na be we-neg yeer dakdimalad. Na be we-negbina bela-bela-sogdimaladi, an obelogoye. Degi, Jerusalénʼgi be machimala-obes alidi, bunamala-obes alidi, es-suidgi burgwemaloye.’ ” 22 Emide, bemar anyopira imakmarmogoed:

Wagar-emurkwaa be imakosurmalad,

dule-burgwedgi-masgulleged be gunnosurmarbalid.

23 Mor-gurgin-bipirmakaled nonogi be simaloed,

sapat be yomaloed,

be boosurmalad,

be naibi itogosumarbalid.

Ar be-isgued-ular, be bergumaloed.

Na be muchub-muchub wiles-gornanai gumaloed.

24 Bab-Jehová sogdebalid: “Ezequiel bemarga wilubga guoed. Ezequiel-ibmar-imaksayob be samarmogoed. Ar ibmar weyob gusale, bemar wisgumaloed, ani an Bab-Jehová-Bela-Gangued-Nikadi gue.

25 ”Dule-machi-Ezequiel, anse-goled-neg an obelogoed. We-nega we-dulemar-gangued-dummarba-imaked-negad. Na we-dulemar, we-neg yeer dakdimalad. We-dulemar, we-negbina bela-bela-sogdimaladi, an obelogoed. Degi, Jerusalénʼgi e-machimala-besmaladi, e-bunamala-besmaladi, es-suidgi anse oburgwilegoed. Deyob-neg-guoed-ibagine, 26 dule-gwensak-wakinnoedi bega gayaburba sognonikoed. 27 A-ibagine, be-gwabin bega nollomakdoed, geb nabir be sunmakdoed. Geb degine, dule-wakicha-nonikidbo be sunmakoed. Wemarga be wilubga guoed, degidbali, na wisgumaloed, ani an Bab-Jehová gue.”

<- Ezequiel 23 Ezequiel 25 ->