Éxodo 39

Dule-irwa-Babse-gormalad-e-mormar-soblesad

(Éxodo 28:1-43)

1 Dule-irwa-Bab-Dummadse-gormalad-mormar nirbadub-aradgi, nirbadub-suir-akwagiidgi, nirbadub-ginnidgi, mor sobsamalad.

We-mor-yoi, Bab-Dummadse-goled-negse dogdedamalad. Amba deyobi, Aarónʼga mor-islidikid imaksamarbalid. Igi Bab-Jehová, Moisésʼga sogsagusa, deyob imaksamalad.

Mor-efodʼye-nugad-maklesad

(Éxodo 28:6-14)

2 Bezaleel mor-efodʼye-nugad amba deyob imaksabalid.

A-imakega, we-dubmar ebusad:

Ordub,

nirbadub-arad,

nirbadub-suir-akwagiid,

nirbadub-ginnid,

degi, linoʼdub-nued.

3 Or-matargwa-matargwa imaksamalad,

degine, gara-gara dubga siksamalad,

adi, nirbadub-aradgi,

nirbadub-suir-akwagiidgi,

nirbadub-ginnidgi,

degi, linoʼdub-nuedgi,

ise-nue-yeerdakle imakegar.

4 Degine, mor-efodʼye-nugad-e-gukingi nabir-atinned imaksamarbalid, adi, agi e-dukugi abin atogegar. 5 Mor-molidubga-gunaidi, mor-efodʼba-baka-mesa naid. We-mor-molidub amba deyob we-dubmargi imakarmogad:

Ordubgi,

nirbadub-aradgi,

nirbadub-suir-akwagiidgi,

nirbadub-ginnidgi,

degine, linoʼdub-nuedgi imakaled.

Igi Bab-Jehová Moisésʼga sogsagusa, deyob imaksamalad.

6 Akwamar-óniceʼye-nugad-nue-sobsamaladi, or-birgi sismalad. Agine, wilub-nasikega-imakdamaladyob imaksamalad. Agi Israel-masmala-e-nug nasiksamalad. 7 Mor-efodʼye-nugad-e-gukingi nasiksad, adi, a-akwamargi Israel-dulemar-sogambe-gakabogwad (12) insaledii guegar.

Igi Bab-Jehová Moisésʼga sogsagusa, deyob imaksamalad.

Mor-binasgargi-nagued-maklesad

(Éxodo 28:15-30)

8 Bezaleel, mor-binasgargi-nagued, nue-yeerdakle, mor-efodʼye-nugad-imakaledyob imaksabalid. We-dubmargi imakaled:

Ordubgi,

nirbadub-aradgi,

nirbadub-suir-akwagiidgi,

nirbadub-ginnidgi,

linoʼdub-nuedgi, imaksad.

9 Deginbali, mor-binasgargi-nagued-e-sugued, degi, e-matardungued, bela emarbiid, degi, darbobalid. We-mor nubyaa-imaksale, e-sugued, degi, e-matardungued, achagwenad. 10 We-mor-birgine, akwamar-nuegan-ilemakar-sogabake osismalad:

Ile-soggwengine, we-akwamar osismalad:

Akwa-sardioʼye-nugad,

akwa-topacioʼye-nugad,

akwa-carbuncloʼye-nugad.

Weyob ile-soggwengi bukwad.

11 Ile-sogbogine, we-akwamar osismarbalid:

Akwa-esmeraldaʼye-nugad,

akwa-zafiroʼye-nugad,

akwa-diamanteʼye-nugad.

Weyob ile-sogbogi bukwad.

12 Ile-sogbaagi, we-akwamar osismarbalid:

Akwa-jacintoʼye-nugad,

akwa-ágataʼye-nugad,

akwa-amatistaʼye-nugad.

Weyob ile-sogbaagi bukwad.

13 Ile-sogbakegi, we-akwamar osismarbalid:

Akwa-beriloʼye-nugad,

akwa-óniceʼye-nugad,

akwa-jaspeʼye-nugad.

Weyob ile-sogbakegi bukwad.

Bela we-akwamar-mor-birgi-bukwadi, or-ega-imaklesad-imbaba osismalad. 14 Akwa-nuegana gwaambe-gakabo (12) gued, Israel-masmala-merguedba, degi, akwa-gwa-gwagwengi e-nugmar ilibali narmakar nanaid. Igi wilub-nasikega imakdamala, deyob Israel-dulemar-sogambe-gakabogwad-e-nugmar (12) egi narmakar nanaid.

15 Mor-binasgargi-naguedga ordub-nued sinni-sinni imaksamarbalid. 16 Deginbali, akwamar-e-sigoed gwabo orbi imaksamalad, degine, olua-gwabo orbi imaksamarbalid. Oluamar-gwabogwad mor-binasgargi-nagued-e-dukumar-sogbogwadgi nasiksamalad. 17 Geb degine, ordubmar-sinni-sinnid-giabogwad mor-binasgargi-nagued-e-dukugi-olua-gwabogwad-naidgi odosad. 18 Geb deginbali, amba ordubmar-sinni-sinnid-e-duku-sogbogwad ormar-sigedgi, mor-efodʼye-nugad-e-gukingi asabin nasiksamalad. 19 Deginbali, orbi olua-gwabo imaksamarbalid. Mor-binasgargi-nagued e-dukumar-bergunaidgi, asabin-urbalidgi nasiksamarbalid. 20 Deginbali, olua-gwabo orbi imaksamarbalid, mor-efodʼye-nugad-gukingi asabin urbali makaled-waliksaar, mor-sadergi-nagued-birgi-nasikega imaksamalad. 21 Deyobi, mor-binasgargi-nagued-e-oluamargi mor-efodʼye-nugad-e-oluamar-ebo dub-aradgi edichamalad, adi, mor-efodʼye-nugad-e-mor-sadergi-nagued-birgi, mor-binasgargi-naguedgi, mer bachikii guegar. Igi Bab-Jehová-Moisésʼga-sogsa, deyob imaksamalad.

Dule-irwa-Babse-goled-e-mormar-baigan-imaklesad

(Éxodo 28:31-43)

22 Deginbali, mor-dummad-efodʼye-nugad bela mor-aradgi nue-sobar imaksamalad. 23 E-negabargi, yaa-olloo nono-odogega mor-gammuga imaksamalad. Mor-gammu-e-dikarba, melle achirmakega, bela-ebilis dubgi sobsamalad. 24 Mor-dummad-e-nag-dukugi sapi-granada-e-sanyob-dakleged nirbadub-aradgi, nirbadub-suir-akwagiidgi, nirbadub-ginnidgi, linoʼdub-nuedgi-sobar imaksamalad. 25 Deginbali, gapan-burwigana olobiid imaksamarbalid. We-gapan-burwigana, bela mor-e-nag-duku-ebilis sapi-granada-e-sanyob-dakleged imba-imbagi nasiksad. 26 Gapan-bipigwad-gwensak, a-dikarba sapi-granada-e-sanyob-dakleged nasiksad. Deyob bela muchub-muchub mor-dummad-suitigwad e-nag-ebilis nasiksamalad. We-mor, dule-irwa-Bab-Dummadse-goled, Bab-Dummadse-gornadele, ebuged. Igi Bab-Jehová Moisésʼga sogsa, deyob imaksamalad.

27 Deginbali, Aarónʼga, degi, e-masmalaga mor-dummad-suitigwad lino-mor-nuedgi-sobar imaksamarbalid. 28 Deginbali, mor-gurgin-ebirmakaled lino-mor-nuedgi, e-yeerdaklemalad imaksamarbalid. Amba linoʼdub-nuedgi garson-bipi-urba-yoleged imaksamarbalid. 29 Deginbali, morgo-dub-sadergi-nagued we-dubmargi sobsamarbalid: Linoʼdub-nuedgi, nirbadub-aradgi, nirbadub-suir-akwagiidgi, nirbadub-ginnidgi, ise-nue-sobar, bela-bela-nue-yeerdakle imaksamalad. Igi Bab-Jehová Moisésʼga sogsa, deyob imaksamalad.

30 Deginbali, or-nued-matarkwaa sobsamarbalid. We-or-nued-matargwagwadgi wilub-nasikega-imakdamaladyob we-gayaburba nasiklesad: “BAB-JEHOVÁʼGA SWILIDIK-NUGSALEGALED.”

31 We-or-matargwagwadga dub-arad nasiksamalad. Adi, we-dub mor-gurgin-birgi atinegar.

Igi Bab-Jehová Moisésʼga sogsa, deyob imaksamalad.

Bab-Dummadse-goled-neg-seleged-soblesad bergusad

(Éxodo 35:10-19)

32 Weyob Bab-Dummadse-goled-neg-sunna-seleged, sobsa gusmalad. We-nega bilebalid, Bab-Dummad-dulemarbo-ambikued-negye. Ar igi Bab-Jehová Moisésʼga sogsa, deyob Israel-dulemar sobsamalad.

33 Bab-Dummadse-goled-neg-soblesad Moisésʼga uksamalad,

degi, we-ibmarmar-egi-ebulegoed bela ega uksamarbalid:

Bela mor-gamalad,

e-urgomar,

e-suar-walagana,

e-buarmar,

degi, e-sigmalad.

34 E-sibad-wawaad-machered-e-ukamar-ginnidgi-odolegaled,

ibdurgan-uka-nuegan,

degi, mor-dummad Bab-Dummad-Dulemarbo-Igar-Mesisad-Ulu-naba-naguoed.

35 Bab-Dummad-Dulemarbo-Igar-Mesisad-Ulu,

e-suarmar-suigan,

degi, e-eduged.

36 Mese,

bela eba-ibmarmar-ebuleged,

degi, Bab-Dummad-asabin-madu-ega-ukleged.

37 Gwallu-sied-olobiid-imakaled,

e-gwallumar,

gwallumar-bela-ilekwaa-silegoed,

bela-ibmarmar-gwalluba-ebulemalad,

degi, e-gwallu-diimar.

38 Bab-Dummadga-ibmar-wawadik-ogumakar-ukleged-aila-olobiid,

gwallu-wawad magega-ebuleged,

ina-wawadikid,

degi, mor-dummad Bab-Dummadse-goled-neg-sunna-seleged-yawagak-dogedgi naguoed.

39 Bab-Dummadga-ibmar-ogumakar-ukleged-aila esgoro-gordikidgi sobaled,

esgoro-gordikidgi san-nared-saki-sakid sobaled,

e-suarmar-walagana,

degi, bela eba-ibmar-ebulemalad,

E-dii-sied,

degi, e-siged.

40 Mor-dummagan e-galugi naguoed,

e-buarmar,

egi-sigmaloed,

degine, e-mor-dummad neg-imba-dogedgi naguoed.

E-dubmar,

e-bargamalad,

degi, bela Bab-Dummadse-goled-neg-sunna-seleged dulemarbo-danar-ambikued-neggi ibmar-ebulemalad.

41 Deginbali, Bab-Dummadse-goled-neggi dule-irwa-Bab-Dummadse-golega e-mormar-ebulemaloed.

Dule-irwa-Bab-Dummadse-goled-Aarón-mormar-islidikid-ebugoed,

degi, Aarón-e-masmala dulemar-irwa-Bab-Dummadse-gorsokalir, mormar-ebumaloed.

We-ibmarmar Moisésʼga uksamalad.

42 Ar igi Bab-Jehová Moisésʼga igar-uksa, bela deyobi Israel-dulemar ibmar imaksamalad. 43 Moisés bela ibmar-imaksamalad argasad. Ar Moisés daksagua, Israel-dulemar Bab-Jehová-sogsadba bela ibmar-imaksamala, a-dulemargi ise-nued binsasad.

<- Éxodo 38 Éxodo 40 ->