Éxodo 28

Dule-irwa-Bab-Dummadse-gormalad-e-mormar-soblegoed

(Éxodo 39:1-31)

1 Bab-Jehová Moisésʼga sogdebalid: “Be-ia-Aarón, degi, e-machimala Nadab, Abiú, Eleazar, Itamar, amala bese warmaked be imako. Wemar, anga Israel-dulemar-abargi dule-irwa-anse-gormaladga gumaloed. 2 Be-ia-Aarónʼgala dule-irwa-anse-goled-bur-dummad-mormar be imako, adi, oyogega, be-ia-Aarónʼde dule-dummadye, nue-nug-nikadye. 3 Bela dulemar-mormaked-wisimaladbo be sunmako. We-dulemar Aarónʼga mor-makmalaga an ega gurgin-nuegan uksad. Deyobi, Aarón dule-irwa-anse-goledga an nug-imakegar.

4 ”Aarónʼga mormar-maklegoedi, wemalad:

Mor-binasgargi-nagued,

mor-efodʼye-nugad,

mor-dummad-suitigwad,

mor-dummad-dubgi-ise-nue-sobaled,

mor-gurgin,

degine, morgo-dub-saderba-nagued.

”Degisoggu, be-ia-Aarónʼga, degi, e-masmalaga, dule-irwa-anse-goled-mormar be imakoed, adi, amala dule-irwa-anse-gormaladga gumalagar.

5 ”We-mormar-makegala, we-dubmar ebulegoed:

Ordub,

nirbadub-arad,

nirbadub-suir-akwagiid,

nirbadub-ginnid,

linoʼdub-nued.”

Mor-efodʼye-nugad-maklegoed

(Éxodo 39:2-7)

6 Bab-Jehová Moisésʼga sogdebalid:

“Mor-efodʼye-nugad be imakoed.

Mor-efodʼye-nugad nue-yeerdakle be makoed.

Agala, we-dubmar ebulegoed:

Ordub,

nirbadub-arad,

nirbadub-suir-akwagiid,

nirbadub-ginnid,

linoʼdub-nued.

7 ”E-mor-gukinmar ebo atogegala, morgo warakwaa be imakoed, e-duku-e-dukugi ebo gwadiegar. 8 Mor-efodʼye-nugad-e-mordub-sadergi-naid, nue-yeerdakle be imakoed. We-mordub mor-efodʼgi gwadiar-nai guoed. We-mordub-makega, be we-dubmar ebugoed:

Ordub,

nirbadub-arad,

nirbadub-suir-akwagiid,

nirbadub-ginnid,

linoʼdub-nued.

9 ”Degine, akwa-óniceʼye-nugad gwabo be suoed. A-akwa-gwabogwadgi Israel-masmala-warambe-gakabogwad-e-nugmar (12) be narmakoed. 10 Gwagwengi masmala-walanergwad-e-nugmar (6) be narmakoed, degine, akwa-baidgine, baigan walanergwad-e-nugmar (6) be narmakbaloed. Be-narmakoedi, machi-dummadgi be onodagoed, geb machi-bipigwadse, e-gwalulesmaladba be narmakoed. 11 Dule-orgi-arbaedi we-nugmar we-akwamar-birgi narmakoed, igi wilub-nasikega imakdamala, deyob imakoed. We-akwamar-dikargi or be nasikoed, adi, akwamar agi galegegar. 12 We-akwamar-gwabogwad mor-efodʼye-nugad-gukinmargi be nasikoed. Weyob, Aarón, Israel-dadgan-warambe-gakabogwad-e-nug (12) an-asabin nai gudioed, adi, ani Bab-Jehová, an we-dulemar insaegar. 13 Akwamar-gwabogwad-gaegala, or be imakoed. A-birgi akwamar be sioed. 14 Degine, e-dub-orbiid giabo be imakoed, akwa-gwabogwad-sigoed agi be edinnoed.”

Mor-binasgargi-nagued-maklegoed

(Éxodo 39:8-21)

15 Bab-Jehová Moisésʼga sogdebalid:

“Geb degine, mor-binasgargi-nagued, igar-nabolegedgi-ebulegega, nue-yeerdakle be imakoed. Mor-efodʼye-nugad-imaksadyob be imakbaloed.

”We-dubmar be ebugoed:

Ordub,

nirbadub-arad,

nirbadub-suir-akwagiid,

nirbadub-ginnid,

linoʼdub-nued.

16 E-sugued, degi, e-matardungued emarbi be imakoed,

achagwen-sugu, achagwen-matardungu be imakoed.

We-mor darbo be saoed.

17 We-mor-birgi akwa-nuegan ile-ile be urboed.

Degiid ilebake be urboed:

Ile-soggwengi be urboed:

Akwa-sárdicaʼye-nugad,

akwa-topacioʼye-nugad,

akwa-carbuncloʼye-nugad.

18 Ile-sogbogi be urboed:

Akwa-esmeraldaʼye-nugad,

akwa-zafiroʼye-nugad,

akwa-diamanteʼye-nugad.

19 Ile-sogbaagi be urboed:

Akwa-jacintoʼye-nugad,

akwa-ágataʼye-nugad,

akwa-amatistaʼye-nugad.

20 Ile-sogbakegi be urboed:

Akwa-beriloʼye-nugad,

akwa-óniceʼye-nugad,

akwa-jaspeʼye-nugad.

Or-gaega-imaklesad-birgi bela we-akwamala be sioed.

21 ”Akwa-nuegana gwaambe-gakabo (12) guoed, Israel-masmala-warambe-gakabogwad-iliba (12). Igi wilub-nasikega imakdamala, deyob, akwa-gwa-gwagwengi, Israel-dulemar-dadgan-sogambe-gakabogwad-e-nugmar iliba be nasikoed.

22 ”Mor-binasgargi-naguedga ordub-nued sinni-sinni be soboed. 23 Geb degine, be olua-gwabo-olobiid mor-binasgargi-nagued-e-dukumargi be nasikoed. 24 Geb ordubmar-sinni-sinnid-giabogwad mor-binasgargi-nagued-e-dukugi olua-gwabogwad-naidgi be nasikoed. 25 Mor-efodʼye-nugad-nasikegala, ordubmar-sinni-sinnid-giabogwad be akwa-nuegan-e-gukingi-siidgi-edinnar nasikoed.

26 ”Deginbali, be olua-gwabo-olobiid be imakbaloed. We-ormar mor-binasgargi-naguedyaba, e-dukumargi be nasikoed. Be nasikoedi, mor-efodʼgi naguegalad. 27 Deginbali, napi be olua-gwabo-olobiid be imakbaloed. We-ormar mor-efodʼye-nugad-e-dikarnagaba be nasikoed. E-abingunaidgi yaba-dogar be nasikoed. 28 Geb degine, mor-binasgargi-nagued-e-olua-gwabogwad, mor-efodʼye-nugad-e-olua-gwabo-naimogad-ebo dub-aradgi edillegoed. Adi, mor-efodʼye-nugad dub-saderba-naidgi naguegar. Deyob guoed, adi, mor-binasgargi-nagued melle mor-efodʼgi bachikii guegar.

29 ”Weyobi, Aarón, anse-goled-neg-islidikidyaba dogdele, igar-nabogega mor-binasgargi-nagued-ebulegedgi Israel-e-masmala-e-nug naigu guoed. Adi, an wemar-e-binsadigu guegar.

30 ”Deginbali, mor-binasgargi-nagued, igar-nabogega-ebulegedgi, be Urim, degi, Tumim sioed. Adi, Aarón an-asabin-dogder, e-binasgargi-nai dogegar. Weyobi, Aarón, an-asabin-gwisgudaged-ilibali, e-binasgargi Israel-dulemarga igar-nabogega sedigu guegar.”

Dule-irwa-Babse-goled e-mormar-baigan-imaklegoed

(Éxodo 39:22-31)

31 Bab-Jehová Moisésʼga sogdebalid: “Mor-dummad-efodʼye-nugad, bela mor-aradbi be imakoed. 32 Nono-odogega, abargine mor-gammu be sikoed. Mor-gammu-e-dikar bela-ebilis be ebayoed, adi, melle achirmakegar.

33 ”Mor-dummad-e-nag-dukugi bela-ebirar yeerdakle be soboed.

Be soboedi, sapi-granada-e-sanyob-dakleged be soboed,

nirbadub-aradgi,

nirbadub-suir-akwagiidgi,

nirbadub-ginnidgi be soboed.

Degine, amar-imba-imbagi gapan-burwigana-olobiid,

bela e-nag-duku-ebilis be nasikoed.

34 Weyob be nasikoed:

Gapan-bipigwad-olobiid,

a-nagaba, sapi-granada-e-sanyob-sobaled be nasikoed,

geb a-nagaba gapan-bipigwad-olobiid be nasikbaloed,

geb sapi-granada-e-sanyob-sobaled be nasikbaloed.

Deyob, muchub-muchub bela-ebilis mor-dummad-e-nag-dukugi be nasikoed.

35 ”Aarón, dule-irwa anse-gorsokalile, we-mola-yoi dogoed. Adi, e-gapan-burwigana-goled mag itolegegar.

Aarón an-asabin Neg-Islidikidse-dogder, degine, agi noarbalir, gapan-burwigana-goled mag itolebaloed. Deyob imakele, Aarón burgosulid.

36 ”Deginbali, or-nued matarkwaa be imakbalo. Geb a-birgine, wilub-nasikega-imakdamaladyob be we-gayaburba nasikoed:

‘BAB-JEHOVÁʼGA SWILIDIK-NUGSALEGALED.’

37 ”We-olo-matargwagwad dub-aradgi-edinnar mor-gurgin-ebirmakaled-asabinnidgi be nasikoed. 38 Weyobi, Aarón-bebegi nai guoed. We-olo-matargwagwad sogleged:

Aarón ibmar-ukleged-swilidikid-anga-ukalile, Israel-dulemar-nosasogele, Aarónʼgi gwisgulegoye,

degine, an e-isgusmalad elioye,

geb an anga-ibmar-ukleged-swilidikid-ukarmalar, abingaoye.

39 ”Degine, mor-dummad-dubgi-ise-nue-sobaled lino-morye-nugadgi be imakoed, degine, mor-gurgin-ebirmakaled amba lino-morgi be imakbaloed. Deginbali, morgo-dub-sadergi-nagued ise-nue-sobar, bela-bela nue-yeerdakle be imakbaloed. 40 Deginbali, Aarón-e-masmalaga mor-dummad-dubgi-ise-nue-sobaled, degi, morgo-dub-sadergi-nagued, degine, mor-gurgin ega be imakmogo. Adi, oyolegegar, wemarde dule-dummaganye, nue-nug-nikamaladye.

41 ”We-mormar be imaksadi, be-ia-Aarónʼga, degine, e-masmalaga be yooed. Geb degine, gwallu-wawa amar-nonogi be eogoed. Geb degi, dule-irwa-anse-gormaladga-gumalaga be onugsaoed. 42 Deginbali, lino-mor garson-bipi-urba-yolegedga be imakoed, adi, wemar melle uka-swiri gumalagar. We-garson-bipi saderse, geb duase-sugu yooed. 43 Aarón, degi, e-masmala, dulemar-anbo-ambikued-negse-dogdemalale, we-garson-bipi-yoi dogmaloed. Degine, anga-ibmar-ogumakar-ukleged-ailase nadmalale, amba we-garson-bipi-yoi dogbaloed. Adi, wemala melle isgumalagar. Ar isgumalale, wemala burgwemaloed. Aarónʼgala, degi, e-masmalagala, we-igar degisadegu-mai guoed.”

<- Éxodo 27 Éxodo 29 ->