Eclesiastés 7

Binsaed-nikagued, binsaedsulidaed

1 Ina-wawadikidba nug-nued-nikuleged, bur nuedid.

Gwaluleged-ibaba burgwed-iba, bur nuedid.

2 Iba-dummad-nonaidse-ataknaedba dule-burgwisadse-ataknaed, bur nuedid.

Ar dule bela burgwedsegad, degisoggu, dulemar-dula-gudimalad, burgwedgi binsadii gumalawilubbinad.

3 Allelegedba boleged bur nuedid.

Ar boleged amba wile-ito emar-imak-inigwele, gadi-gadi gwage-imakbalid.

4 Dule-binsaed-ibed, dule-burgwis-naidse-ataknadele, binsaed-nikaa daed.

Dule-binsaedsuliddina, ataknadele, unnila dodogedginbi binsadaed.

5 Dule-binsaedsulid yamo emar-ogannogedba,

dule-binsaed-ibed emarga sabsur-ibmar-soged, bur nuedid.

6 Dule-binsaedsulidaed-e-alledi, ikomar-gummakder doos-doos-gotedaeyobid, yog-berguar naddaed.

7 Sabsur-ibmar-imakleged dule-binsaed-ibed-oichoged.

Ibmargi-bennuklegar-binsaed-galeged, dule-binsaed-ibed-e-gwage oichobalid.

8 Ibmar-gebe-imaklegedba, ibmar-nagase-obeloleged, bur nuedid.

Dule-na-san-dummarba-imakdiidba, dule-na-ulubgi-bargaagwar-gudiid, bur nuedid.

9 Mer urwed begi-obinega be imako,

ar urweddi, dule-binsaedsulidaedgadid.

10 Mer be sogo, ibiga ibagan-nasmalad bur nuegan gusye. Weyob-sunmaklegedi, binsaed-ibegan-sunmakedsulid.

11 Dulemar-we-napneggi-gudimalad binsaed-nikagued-nikale, nuedid. Degine, nainu-nikabalile, doggus bur nuedid. 12 Binsaed-nikagued emar-bendaked, mani-nikued emar-bendakmogad. Degi-inigwele, binsaed-nikagued bur biriginedid, ar adi, nuedgi-sered-megega dule-imaked.

13 Bab-Dummad-ibmar-imaksad be dakena: Ar Bab-Dummad ibmar-dopere-imaksadi, ¿doa bar inniki imakosunna? 14 Bega ibagan-nuegan-nonikile, egi be werguo. Amba bega ibagan-isgana-nonibalile, Bab-Dummadgi-danibarye be binsabalo. Ar dule wissulid, ibagan-danikoedi, igi danibali.

15 Wegi-wile-itodiidgi an we-ibmar belagus dakdanikid: Dule-nuegan, ibmar-inniki-imakdiid-ular, sabsur-ibitodimalad. Ar dule-isganamardina, ibmar-isgana-imaked-inigwele, aka bur undar-seredi megmalad.

16 Mer doggus be wilub-obicha an dule-innikigwadye be sogo.

Mer doggus be wilub-obicha binsaed-ibed na be sao.

Abakalegi na be dukin oitoalile.

17 Mer doggus dule-isganaga na be imako,

mer dule-binsaedsulidga na be imakbalo.

¿Ar ibiga na be durbas burgwed aminonikosunna?

18 Mer doggus wilub-obicha na be dao,

wilubba na be gudii guoed.

Ar dule, Bab-Dummad-dobekwaa-gudiile,

bela ega ibmar nueganbi gudoed.

19 Dulemar-bulegan-ambegid (10) neggwebur-semaladba,

binsaed-nikagued dule-binsaed-ibed-ogannoged, bur nuedid.

20 Dule, bela-belad-innikidaedi, bela-belad-ibmar-nued-imakdibalidi,

gwen bipisaale isgudisurbalidi, we-napneggine, sated.

21 Mer yogasaar-sunmaklegedba be aibiro. Adi, be-mai-begi-ichakwa-sunmaked, be itogosulid. 22 Ar be nue-wismogad, emargi-ichakwa be sunmaksamogad.

Ibmar-gued-e-burbamar baramilenaid

23 Binsaed-ibed-dulega an guoye na sogsagusanad, bela we-ibmar an-binsaed-nikadba an baraminai gusanad. Degi-inigwele, amba bela an ibmar magar-itosulid. 24 Bela-ibmar-guedi yeer angi gangu noed, amba an magasar-itosulid. ¿Doa we-ibmar bela baramiosunna?

25 Degisoggu, binsaed-nued-bar-amiega an guarsunnad, ulub-nagasega ibmar-gumaid-bar-amiega an gualid. Degidbali an neg-daknonikid, dule-isgana-gued binsaedsulidaedid, degine, binsaedsulidaedi, igar-gwen-nabirsulidid.

26 Deginbali, we-ibmar bur boni-dummad an daknonibalid: Ome-isgana, burgwedba bur bule boni uked. We-ome-e-gwage-naidi, sakiyob emar-gaed, e-swidamala, esgoro-dubyob emar-edinned. Ar dule Bab-Dummadbaligwa-gudidibe, we-omese galegosurguoed. Isgued-duledina, we-omese ibitogoed.

27 Bab-Dummad-gayaburba-barsoged sogded: “Bela an ibmar-sog-soggwen baraminai-gusgua, an weyob ogwinmaknonisunnad:

28 ”An ibmar-amidiidi, amba an yoo baramied. An dula-miligwenad-abargine (1,000), dule-machered-amidiidi, an wargwen aminonikid. Ome-nued-gwensakdina, wargwensaale gwen an amissurgusad.

29 ”Degisoggu, unnila webi an magar-itonikid: Bab-Dummad dule-imaksadi, dule-bonisuli imaksanad. Degi-inigwele, dule na e-daedba, dukin na bonigan-amisad.”

<- Eclesiastés 6 Eclesiastés 8 ->