Deuteronomio 14

Mas-sunna-gulleged, mas-ise-gulleged

(Levítico 11:1-23)

1 Moisés Israel-dulemarga sogdebalid: “Bemar, be-Bab-Dummad-Jehová-mimmigan gumalad. Mer dule-burgwisad-ular, be-san-uka daas-daas imako, mer nono-swiri be ibalo. 2 Ar bemar be-Bab-Dummad-Jehováʼba uklegarmaladid. Ar Bab-Jehová unnila egadgarbi-guega, we-napneggi dulamar-bukidar-bukwad-abargi bemar-sunonikid.”

3 Moisés Israel-dulemarga sogdebalid: “Melle ibmar-ised gunmalo.

4 We-ibmar-durgandi sunna be gunmaloed:

Moli-bebe-nikad, sibad-wawaad, sibad,

5 goe-ciervoʼye-nugad, goe-gacelaʼye-nugad,

goe-corzoʼye-nugad, sibad-ome-sapurbalid,

sibad-íbiceʼye-nugad, goe-antílopeʼye-nugad,

degine, sibad-wawaad-sapurbalid.

6 ”Degine, sunna be ibdurgan e-goonasi-darbo-marar-nikamalad, geb, gagan-masar, gannar-mabaliga-sabanyagi-mas-saboged, be gunmaloed.

7 ”We-ibdurgandi be gunnosulid:

Moli-yargan-mureged, nubi, ugdun.

Ar wemar amba gagan-masar, gannar-mabaliga-sabanyagi-mas-saboged-inigwele,

e-gonasidi negabar mararsulid.

”We-ibdurgandi be gunnosulid, ise-gullegedga gumaloed:

8 Sina, amba be gunnosurbalid,

ar goonasi-darbo-marar-nika-inigwele, mas-masar, gannar-mabaliga sabanyagi mas sabosulid.

”Degisoggu, we-ibdurgan ise gullegoed.

Sin-e-san bemar gunnosurmalad,

sin-burgwaledbela gwen be ebuosurmalad.

9 Bela ibdurgan-diakinmalad e-see-nikamalad, degi, uayob-uka-nikamalad, nabir be gunmaloed.

10 Ar ibmar-durgan-diakinmalad e-see-nikasulile, degi, uayob-e-uka-nikasulile, be gunnosurmalad, ise gullegedga gumaloed.

11 Nuu-nuegan bela sunna be gunmaloed.

12 Degi-inigwele, ar wemardi be gunnosurmalad:

Sulubagi, sulubagi-garmar-bisge-bisge-imaked, uabu,

13 mula, degi, bela sulubagi-senigan akar-akar-daklemalad,

bela e-sordamar be gunnosulid.

14 Degine, abgokor,

degi, abgokormar-akar-akar-daklemalad be gunnosurbalid.

15 Nuu-dummad-dukar-suid avestruzʼye-nugad,

irmon-senigan,

bela dilli-dilli akar-akar-daklemalad,

noo-akar-akar-daklemalad be gunnosulid.

16 Irmon, dabgala-ibisʼye-nugad, badugiid-calamónʼye-nugad,

17 gorgi, mula-buitreʼye-nugad, diidod,

18 dabgala-dummad, garzaʼye-nugad,

degi, garza-akar-akar-daklemalad,

salligiid-abubillaʼye-nugad, degine, uksir,

wemar be gunnosurbalid.

19 Gukur-akar-akar-nabir-gukumalad, ise gullegoed.

We-ibmarmar-isemalad, melle be gunmalo.

20 Ar nuumar-nuegandi nabir be gunmaloed.

21 ”Ibdurgan be burgwar-mai amisale, melle be gunmalo. We-ibmar, dule-ainebarmalad-be-abargi-mamaidga be ukoed. Amardi, sunna we-ibmar-burgwaled gunmaloed. Sulile, dule-ainebarmalad-bese-atakdanimaladga manigi ega be ukoed. Ar bemardi, be-Bab-Dummad-Jehováʼba uklegarmaladid, unnila egadga nug-imaklesmaladid.

”Sibad-e-mimmi, melle e-nan-nunisgi be duo.”

Ibmar ambegi gwensak-uklegoed (10%)

22 Moisés Israel-dulemarga sogdebalid: “Birga-ilibali bela ibmar-gwagmar be-nainugi be wesmaladi, ambegi gwensak (10%) Bab-Dummadga be ukergebmalad. 23 Be-Bab-Dummad-Jehová-asabin, e-neg-susadgi, e-nug-nasiko-sogsadgi ibmar-ambegi-gwensak-ukleged (10%) be gunnoed.

Amar wemalad:

Be-ibmar-gwag-ukleged,

be-vino-binid-ukleged,

be-olivo-gwallu-binid-ukleged.

Degine, be-moli-gebegwalulesmalad,

be-sibad-wawaad-gebe-gwalulesmalad,

be-sibad-gebe-gwalulesmalad,

wemar, Bab-Jehová-neg-susadgi be gunnoed,

adi, bemar bane-bane be-Bab-Dummad-Jehová-dobee nanamalagar.

24 ”Ar be-Bab-Dummad-Jehová megega-neg-susad begi dikasuli siile, ase geg be ibmar-sede-itogele, degidbali, geg be ibmar ambegi-gwensak-ukleged (10%) sede-itogele, 25 be we-ibmar maniga-obinyoed. Geb be be-Bab-Dummad-Jehová-neg-susadse we-mani be sedoed.

26 Agi, geb a-manigi be ibmar-bakbiedba we-ibmar be bakoed:

Moli-bebe-nikad,

sibad-wawaad,

vino,

degine, gobed-bamalad-sole-solemalad.

”Agi be-Bab-Dummad-Jehová-asabin, be, degine, be-gwenadganse-bakale, mas gunnoed, degi, weligwar itomaloed.

27 ”Levita-dulemar-bemar-neggweburgi-maid, nue be akwemalo, melle be obanmalo, ar ade, bemarga nainumar-uklesadyob, wemargardi uklessulid.

28 ”Birgapaagwad-iliba, bela be-ibmar-wesadi, ambegi-gwensak-ukleged (10%) be suoed, be-neggweburmargi be sabogoed.

29 A-neggweburmarse we-dulemar nonimaloed:

Levita-dule-bemarba-nainu-nikudsulid,

dule-be-yarginsurmalad,

dule-sergan-sated,

omegan-e-sui-burgwismalad be-neggweburgi-gudidimalad.

”Deyob, a-dulemar mas gunmaloed, nue-immee gudii gumaloed, adi, be-Bab-Dummad-Jehová bela-be-ibmar-nued-imakmaladgi ise-nued bemargi binsamalagar.”

<- Deuteronomio 13 Deuteronomio 15 ->