Link to home pageLanguagesLink to all Bible versions on this site
2. DANIEL NEGBURGAN DAKSAD
7
(7:1–12:13)
2a. Daniel-negburgan-daksad, degi, ega odulolesad
(7:1–8:27).
Ibdurgan-walabake burbar daklesad
1 Babilonia-e-rey-Belsasar birgagwengus negsemaidgine, Daniel e-obunnoged-neggi-maigua, gabdaknonikid. Degi, negburgan dakalid. Agine, na e-gabdaksad-bur-biriginmalad narmaksad.

2 Daniel weyob narmaksad: “Mutikidbali an negburgan daksad. Agine, an demar-dummad dakalid. A-demar burwa-sogabake-abin-abin-gormaidbali arwemai an daksad. 3 Demargine, ibdula-unid-dummagan walabake noalid, akar-akar dakleged.

4 ”Ibdula-unid-gebesailagined, achumigur-nono-wawaadyob dakleged. Sulubagi-e-sakan nikabalid. An dakgwichidgine, e-ibe sakan unnusmalad, napagi-mai ogwichismalad, degi, e-nag-sorbalidgi duleyobi-gwisguega imaksamalad. Geb dule-binsaedyobi, binsaed-nika gunonikid.

5 ”Ibdula-unid-sogbogwad an dakarbalid, adi, wiobyob dakleged. We-ibdula e-dikargi yollee maid. E-gayagine, ibmar-dikar-gar warbaa ganikid. We-ibdulaga soglesad: ‘Be gwisgue, be immeregedse san gunne.’

6 ”A-sorbali, ibdula-unid-baid nodaniki an dakarbalid. Adi, achu-barbadyob dakleged. E-yargangi nuu-sakanyob sakan walabake nikad, deginbali, nono gwabake nikabalid. Negseegala ega gangued uklesad.

7 ”We-sorbali, an negburgan-dakmaidgine, ibdula-unid-baid an dakarbalid. Adi, bela-bela sunnasur-dakleged, degi, bela-bela gargangued nikabalid. E-nugar-esgorobiid-dummagan-nikadgi dulemar-goa-goa imaked, degi, dulemar-dobalid. A-sorbali, sanmar-obichad-birgi dii-dii annadaed. We-ibdula-unid, iduar ibdula-unid-bamalad an daksadyob daklesulid, wedi warambe (10) bebe nikad.

8 ”An e-bebe-warambegwad-dakgwisgua (10), a-imbagi bebe-senigwad-baid noali an dakalid. We-bebe-senigwad-anar, walapaa bebe-iduarmalad unnulesad. We-bebe-senigwad dulemar-ibyayob ibya nikad. Degine, gaya nikabali. E-sunmakedi, bule-bule sunmaked.”

Dule-Selebagwad-nuga-nikadga namaked
9 “An we-ibmar dakgwichidgine, ologanmar silenonikid.
Geb Dule-Selebagwad-nuga-nikad signonikid.
E-mor booyobi sipuu dakleged,
e-sailagia sibad-wawaad-e-absaryobi dagudik dakleged.
E-ologanagi, degi, e-ologan-e-nag-urba-orokwagwad-bipirmaked-naidgi,
soo gwabunyear daed.
10 Dule-Selebagwad-siidgine soo noardaed.
Dulemar mili-miliba ega ibmar-imaknanaid.
Dulemar-bukidar-geg-ebisle e-asabin gwichimalad.
Dule-Selebagwad igar-nabogega, gangi signonikid,
geb garda-dummagan-mamaid egalesad.

11 ”Bebe-senigwad gandikidgi-bule-bule-sunmakedba, an dakgwichi gusad. An dakgwichidgine, we-ibdula-bakegwad oburgwelenonikid, goa-goa imaksamalad, geb soo-gwabunye-siidgine, e-san metemalad. 12 Ibdula-unid-bamalad-ibe e-gargangued sulesad, degi-inigwele, wis sikwas dula-gudii-gumalaga amba ega ibagan nagusad.

13 ”Mutikidba an we-negburgan dakmaidgine, dule-wargwen mogir-imbaba aidedaniki an dakalid. We-dule, Dule-Selebagwad-siidse nade gusad, geb ese walikaa warmakega imaksamalad. 14 Geb a-dulega gargangued, gandikidba-negseleged, degi, nug-dummarba-gued ega uklesad, adi, bela dulemar-gudidiid, dulemar-yar-baid-baidgi-bukwamalad, degi, gwabinduku-akar-akar-sunmakmalad, e-nug odummomalagar.

E-neg-ganikidi degisadeguad, gege bergued.
E-yar-ganikidi bipisaar berguosulid.”
Gabdaklesad oduloged
15 “Ani, Daniel, an we-ibmar-daksadbali an bela-bela dobe-itoded, degi, nue an bukib-itodbalid. 16 Geb degine, dule-gwensak-gwichidse an walikaa-naded, geb an ese egichided, an we-ibmar-daksadi, ibu obarye. Geb weyobi anga odulosad:

17 ” ‘We-ibdula-unid-walabakegwad, we-napneggi reymar-walabake neg-ganonimaloedid. 18 Degi-inigwele, Bab-Dummad-Bur-Birigined-e-sordagan-islidikmaladga negseleged uklegoed. Wemar, degisadegu na negsemaloed.’

19 ”Geb degine, an nue-wisgubi gualid, we-ibdula-unid-bakegwad bur ibu-burba oyoge. We-ibdula-bakegwaddi bamaladba bur akarsaar-dakleged, bela-bela sunnasur-dakleged. Nugar esgorobi nikad, degi, gonasimar esgoro-gordikidbi nikbalid. We-ibdula, dulemar-goa-goa imaked, degi, dulemar-dobalid. A-sorbali, sanmar-obichad-birgi dii-dii annadaed. 20 Geb an egisdebalid, ibdula na e-nonogi ambe (10) bebe-nikad, we, ibu obarbarye. Amba deyobi an wisgubiguarbalid, e-nonogi bebe-senigwad noargusad, geb ese walapaa bebemar-idualed-bibichisad, ibu obarbarye. We-bebe-senigwad bur bule gargangued-nika dakleged, ar ade, ibyamar nikad, degine, bule-bule sunmakbalid.

21 ”An deyob dakgwichidgine, we-bebe-senigwad dule-islidikmaladbogwa bila-onod gusad, geb amargi nakwisad. 22 Geb degine, Dule-Selebagwad nonikid, geb Bab-Dummad-Bur-Birigined-e-dule-islidikmaladga igar-nabononikid. Geb agine, dule-islidikmaladga negsemalaga iba nonikid.

23 ”Dule-Selebagwad-nuga-nikadi, weyob anga odulosad:

‘Ibdula-unid-sogabakegwadi, we-napneggi negseleged-sogabakegwadga gunonikoed.
Negseleged-bamaladbali dikasur-akar negseoed.
Bela napneggi-dulemar-gudimalad ese dolemaloed,
ese annalemaloed, degine, ese ubi-ubi gumaloed.
24 Bebe-ambegid (10) oyoged,
a-negselegedgine warambe (10) reymar negsenonikoye.
Amar-sorbali, rey-baid negsenonikoed.
We-rey, reymar-idualedba akarsaila negsenonikoed.
We-reyse walapaa reymar-idualed galakumaloed.
25 We-rey, Bab-Dummad-Bur-Biriginedgi isdar-sunmakoed.
Bab-Dummad-Bur-Birigined-e-dule-islidikmalad-wiogega imakoed.
Ibagan-mamaid, igarmar-mamaid ogwabigudagoed.
Dule-islidikmalad we-rey-urbaligwa birgapaa-negabar gudimaloed.
26 Dule-Igar-Naboged signonikoed,
bebe-senigwad-ibe e-gangued osulolegoed, geb obergulegoed.
Degisadegu bebe-senigwad bar gwisguosulid.
27 Geb degine, Bab-Dummad-Bur-Birigined-e-sorda-islidikmaladgala,
bela we-napneggi yarmar-nanaid-e-nug-dummarbagued, ega uklenonikoed,
gandikidba-negseleged, ega uklenonikoed
e-yarmar-dummarba-gued, ega uklenonikoed.
Bab-Dummad-sorda-islidikidmalad-e-negseleged degisadegu guoed.
Bela we-napneggi dummagan-negsedimaladi, e-urbaligwa nanadii gumaloed,
degi, eba ibsadii gumarbaloed.’

28 ”Dule-Selebagwad-nuga-nikad wese anga sunmaksad. Andi, Daniel, an we-ibmar-daksadba an bela-bela bukib-itod gusad, abali an-wagar sipuu daklenaded. Degi-inigwele, an we-ibmar-daksad an na gwagegi wargwen sedii gusad.”

<- Daniel 6Daniel 8 ->