11 Salomón, bela Babse-goled-neg-obelosgua, degine, we-negga ibmar-ebulemaloed-imakoye-binsasad-obelosgua, degi, reyneg-sobnaid-obelosbargua, 12 mutikidba, Bab-Jehová Salomónʼse magarononikid, ega sogded:
“Anse-be-gochad an be-itosad. Degi, we-neg anga ibmar-ogumakar-ukleged-ukega an susad.”
13 Bab-Jehová ega sogdebalid:
“Ar bemar an-sogedba dasurmalale,
an bemarga dii owiosulid,
be-nainumargi ibmar-naid-obelogega, an sesmar barmidagoed.
Sulile, an bemarga uelleged-dummad barmidagoed.
14 Ar an-dulamar an-asabin na san bipii imakdemalale,
anse-gollarmalale,
degi, anba gannar nanadmalale,
e-isgudiidgi bar nanadsurmalale,
Andi an nibneg-akar itogoed,
an ega e-isgued elioed,
degi, an ega gannar yar onudakoed.
15 ”We-neggi anse-gorlegedi an nue-dakmaioed, degi, ise-itogar an maibaloed. 16 Emisgindi, we-anse-goled-neg an susad, angadga an nug-imaksad. Adi, an degisadegu agi maiguegar. Degi, aginbi an atakdii, aginbi an binsadii sadeguoed.
17 Salomón, bedi be-bab-David-nanasayob be an-asabin gudii guele,
degi, an-bega-ibmar-sogedba be ibsabalile,
an-Igar-Mesisadba be gudibalile,
degi, an-Igar-Maidba be nanadibalile,
18 be-rey-gangi-siid, degi, be-yar-semaid,
bega an sogsadyob an imakoed.
”Emide, an be-bab-Davidʼbogwa igar-mesisa, an ega sogsagusa: ‘Israel-yargi be-wagan-wargwensaale negdakmaisuli guosurye.’
19 ”Degi-inigwele, bemar angi aibatemalardi,
an-igarmar-mamaidgi,
degi, an-igarmar uksadgi be gwisgudmalardi,
aka bab-dummad-baiganba be nanadmalardi,
a-e-nug be odummodmalardi,
20 an bemarga yar-uksa-gusadgi an be-osulomaloed,
degi, anse-goled-negga an neg-susadi, an balimetoed.
Degine, bela dulemar-yar-baid-baidgi-bukmalad, bela-bela bemargi dodogega an imakoed.
