1 Samuel 8

4b. Israel-yargi gebe-rey-megsokalid-igar

(8:1–12:25)

Israel-dulemar Samuelʼse rey-egichismalad

1 Samuel seredgusgua, Israel-dulemarga-igar-nabogega, na e-machimala-onug-imaksad. We-machimala, Beerseba-neggweburgi igar-nabogedga maigusmalad. 2 E-machi-dummadi, Joelʼye-nugad, a-yarbaliddi, Abíasʼye-nugad. 3 Ar Samuel-e-machimaladi e-bab-daedba gwen nanassurmalad, igar-innikigwadba ibmar-imaksurdamalad. Unnila maniginbi bur bule binsadidamalad. Degisoggu, dule-ega-mani-ukoed bur bendakdedamalad.

4 A-ulale, Israel-girmar-dummagan na igar-itosmalad. Geb Samuelʼbo-sunmakega Ramá-neggweburse nadmalad. 5 Ega sogdapmalad: “Bedi bato seredgusad. Be-machimala be-daedba gwen-nanasurmalad. Degisoggu, igi dule-bamalad-yar-baid-baidgi-bukwamalad na rey-nikamala, deyob bur be anmarga rey-amisundo, anmar-dummadga megegar.”

6 Israel-girmar-dummagan rey-abeye Samuelʼga sogsamargu, Samuel abin isdar itosad. Degidbali, Samuel Bab-Jehováʼse gorsii gusad. 7 Agi, Bab-Jehová ega sogded: “Israel-dulemar isdar-be-daksurmalad, anbi-unnila isdar-an-dakmalad. Ar e-dummadga-gued an-abesurmalad. Degisoggu, bega-ibmar-sogedba ega be imako. 8 An Israel-dulemar Egipto-yargi-onosad-akale, emi-ibase, bab-dummagan-baiganse-goled-ulale, an-obacha gudimalad. Degisoggu, deyob be-imaknanaimarmogad. 9 Degisoggu, bega-ibmar-sogedba ega be imake. Ar degi-inigwele, iduakwaa ega nue be sogo, igi rey-megoed be-imakmaloe.”

10 Geb degine Samuel, igi-Bab-Jehová ega ibmar-sogsa, deyobi, dulemar-ese-rey-egisnanaidga sogsamogad.

11 Samuel ega weyob sogsad:

—Rey-bemar-dummadga-megoedi, weyob bemar-imakoed:

Rey be-machimala be-annik suoed,

e-ur-napagined-bila-onogedgi-arbamalaga,

e-moli-bila-onogedgi-arbamalaga,

degi, e-ur-napaginedga-igar-egamalaga be-annik suoed.

12 Deginbali, we-rey, be-machimala-baigan

sorda-miligwenad (1,000) e-dummadga-guega subaloed,

sorda-dulabo-gakambe (50) e-dummadga-guega subaloed.

Be-machimala-baigandi, rey-nainumargi napa-imuega,

degi, e-ibmar-gwag-weega subaloed.

Degi, rey, be-machimala-baigandi,

bila-onoedgi-ibmar-ebumalad-sobega,

degi, ur-bila-onoged-e-gingimar-sobega be-annik subaloed.

13 ”Deginbali, we-rey, be-bunamala be-annik subaloed,

ega-gwallu-wawa-imakedga,

ega-mas-duedga,

degi, ega-madu-yoedga be-annik suoed.

14 ”Deginbali, we-rey, be-nainugan-bur-nuegan be-annik suoed,

be-uva-nainumar-bur-nuegan,

be-olivo-nainumar-bur-nuegan

e-dule-dummaganga-ukega be-annik suoed.

15 Deginbali, be-ibmar-gwag-weemaloed,

be-uvaʼmar-weemaloed,

nibirambegi nibir-gwensak (10%) be-ibe suoed

e-arbamaladga ukega,

degi, e-dummaganga ukega be-ibe suoed.

16 ”Deginbali, be-mai-machergan,

be-mai-omegan,

be-moli-alugwasualed-sapingwad-bur-nuegan,

be-moli-uayasuid-bur-nuegan

ega arbamalaga be-ibe subaloed.

17 Degine, rey, be-sibad-wawaadmar-warambegi gwensak (10%) be-annik suoed,

geb bemar-sunnad e-maiga gunonimarmogoed.

18 ”A-ibagan nagunonikile, na be rey-amismalad-ulale, be nunmak-itononimaloed. Geb degine, bemar Bab-Jehováʼgi wilearmalale, Bab-Jehová bemar-bendakosulid.”

19 Ar Samuel deyob ega sogsad-inigwele, Israel-dulemardi, Samuel-sogedba gwen-ibmar-imaksasurmalad, aka bur sogdemalad:

—¡Baisuli! Anmar rey-abege, anmar-dummadga megegar. 20 Adi, anmar, dule-bamalad-yar-baid-baidgi-bukwamaladyob gumogoed. Anmar bila-ononadele, rey anmar-idugoed. A, anmarga negsemai guoed.

21 Samuel, dulemar-ibmar-abeged-itosgua, Bab-Jehováʼga bela sogsad.

22 Bab-Jehová, Samuel-abin sogded:

—Israel-dulemar-sogedba be ibmar-imako. Ega be rey-onugsao.

Geb degine, Samuel Israel-dulemarga sogdesunnad:

—¡Degiirdi nabirdo! ¡Be-neggwebur-be-neggweburse gannar be namala!

<- 1 Samuel 7 1 Samuel 9 ->