1 Reyes 8

Bab-Jehováʼse-goled-negse Bab-Jehová-Ulu selenonikid

(2 Crónicas 5:2-14)

1 Agine, Rey-Salomón Jerusalén-neggweburgi, e-asabin dagmalaga wemarse gochad:

Israel-dulemar-nug-nikamaladse,

dulemar-sogambe-gakabogwad-e-idumaladse (12),

Israel-dulemar-e-neguya-e-dummaganse gochad.

Rey-Salomón we-dummaganse gochad, adi, Bab-Jehová-Dadganbo-Igar-Mesisad-Ulu, David-neggwebur-Sión-nugadgi-siidi, Bab-Jehováʼse-goled-negse sedamalagar.

2 A-ulale, nii-walagugled-Etanimʼye-nugad-nagunonigu (7), itoakwaa-onoleged-ibagi, bela-Israel-dulemar, Rey-Salomón-asabin gwisgunonimalad.

3 Israel-dulemar-nuga-nikamalad nonimargu, dule-irwa-Bab-Dummadse-gormalad Bab-Jehová-Ulu onakwismalad. 4 Geb agi, Bab-Jehová-Ulu sesmalad. David-ega-dordoneg-sobsad sesmarbalid.

Aginbali, a-dordonegyaba e-ibmar-ebulemalad-islidikid-bukwad sesmarbalid. We-ibmarmar dule-irwa-Bab-Dummadse-gormalad semamai gusad. Levita-dulemar bendaksamarmogad.

5 Rey-Salomón, degi, bela Israel-dulemar-ese-nonimalad, Bab-Jehová-Dadganbo-Igar-Mesisad-Ulu-asabin ambikunonimalad. Agine, amar Bab-Jehováʼga sibad-wawaad ogumakar-uknanai gualid, moli-bebe-nikamalad ogumakar-uknanai guarbalid. Doggus-merguedba geg ebislegusad.

6 A-sorba, dule-irwa-Bab-Dummadse-gormalad Bab-Jehová-Ulu Bab-Dummadse-Goled-Neg-Ise-Islidikid-siidse sesmalad. Geb baliwitur-dummagan-querubin-e-sakan-urba sismalad. 7 Baliwitur-dummagan-querubin, Bab-Dummadse-Goled-Neg-Ise-Islidikid-siidgi sakan-aasaa bukwamalad. Deyob Bab-Jehová-Dadganbo-Igar-Mesisad-Ulu, degi, e-suarmar egi yoyoi sigisad.

8 Bab-Jehová-Ulu-e-suarmar-yoyoid mullusursoggu, Neg-Islidikidgi-gwichir, e-dukumar magasar-dakleged. Magaba-gwichirdi akudakleged.

Neg-Islidikidde, Neg-Ise-Islidikid-idu siid. We-garda emi-narmaklenaise deyob amba siid.

9 Bab-Jehová-Dadganbo-Igar-Mesisad-Ulu-yagi, unnila akwa-matargwagwadgi-Bab-Jehová-e-Igar-narmaksad maid.

We-akwa-matar, Moisés, Horeb-yar-siidgi-gudigu, mesis gusad. Israel-dulemar-Egipto-yargi-nosmalad-sorba, Bab-Jehová, Horeb-yargine, Israel-dulemarbo igar-mesnai gusad.

10 Dule-irwa-Bab-Dummadse-gormalad Bab-Dummadse-Goled-Neg-Islidikidgi-nodmargua, neg waa-ena sigisad. 11 Ar Bab-Dummadse-goled-neg waa-ena-sigissoggu, dule-irwa-Bab-Dummadse-gormalad, Bab-Dummadse-goled-neggi Bab-Dummadga geg bar ibmar-imake gusmalad. Ar ade, Bab-Jehová-e-gangued-yeerdakleged bela neg-gasa nagusad.

Neg Bab-Dummadga nug-imaklesad

(2 Crónicas 6:1-7, 10)

12 Agine, Salomón sogded:

“Bab-Jehová, be sogsa gusad:

‘An mogir-sichid-imbaba gudii guoye.’

13 Bab-Jehová, degi-inigwele, an bega neg-bur-birigined sobsad.

A-neggi degisadegu be gudii guegar.”

14 Rey-Salomón, Israel-dulemar-bela-gwigwismaladse aibirided. Geb Israel-dulemargi nued-binsasad. 15 Geb sogded:

“Bab-Jehová-e-nug odummolesun. Bab-Jehová, Israel-dulemar-e-Bab-Dummadid. An-bab-Davidʼga ibmar-imakoye-sogsagusad, sogedba imaksad. Deun, an-bab-Davidʼga weyob sogsa gusad: 16 ‘An Egipto-yargi Israel-dulemar-ononaigusad-akale, dulemar-dadgan-warambe-gakabogwad-danar-bukwad-abargi (12), e-neggwebur-gwensak anga-neg-sobega, an sussulid. Unnila an-Israel-dulemar-iduega, an Davidʼbi sunonikid.’

17 ”An-bab-David, Israel-e-Bab-Dummad-Jehováʼga neg-nue-sobbi gusanad. 18 Degi-inigwele, Bab-Jehová an-bab-Davidʼga sogsad: ‘Anga be anse-goled-neg-sobbiedi, nued be binsaenad. 19 Degi-inigwele, be anga anse-goled-neg sobosulid. Be-machi-nikuoedi, a-dule, anga anse-goled-neg sobnonikoed.’

20 ”Degisoggu, Bab-Jehová ibmar-imakoye-sogsagusad, sogedba imaksad. Ani, Salomón, an-bab-David-sorba an yar-ganonikid. Bab-Jehová-sogsagusadba an Israel-dulemar-e-rey-gangi signonikid. An Israel-e-Bab-Dummad-Jehováʼga an neg-sobnonikid. 21 A-negyagine, Bab-Jehová-Dadganbo-Igar-Mesisad-Uluga an neg-sobsabalid. A-uluyagi Bab-Jehová anmar-dadgan-ebogwa Igar-Mesisad sabolemaid. Bab-Jehová we-igar-mesis gusad, deunni, anmar-dadgan Egipto-yargi-ononai gusgu.”

Salomón Bab-Dummadse-gochad

(2 Crónicas 6:12-42)

22 Agi, Salomón, Israel-dulemar-onmakbukwad-wagab, Bab-Jehová-ibmar-ogumakar-ukleged-e-aila-asabin gwisgusad. Geb Salomón, e-argan-niba-onakdegu, 23 sogded:

“Bab-Jehováʼye, be Israel-dulemar-e-Bab-Dummad gued. Nibneggi, napneggi Bab-Dummad-baid beyobid sulid.

”Dule-be-nug-odummodimaladga be-igar-mesisad be imaked. Be-nug-odummodimalad, be-sogedba-gudimalad, be nue-sabed.

24 ”An-bab-David-be-nug-odummodigusadga, be ibmar-imakoye-sogsad, be imaksad.

”Emi-iba, ega be ibmar-sogsagusad be-ganguedba be imaksad.

25 ”Emisgi, Israel-e-Bab-Dummad-Jehováʼye, an-bab-Davidʼga be ibmar-sogsabalid be imakbali.

”Deun, ega be sognaigusgu: ‘Be-wagan, an-asabin, be-gudigusadyob nued damalale, anba ibsamalale, an-asabin, be-wagan rey-gangi-siged Israel-dulemar-e-idumalaga surguosulid.’ 26 Israel-e-Bab-Dummad-Jehováʼye, degisoggu, an-bab-David-be-maiga be ibmar-imakoye-sogsa-gusad, emisgi be imake.

27 ”Degi-inigwele, we-napneggi be megegala, ¿sunna we-napnegde bega unniguosi? Ar nibneg-naidbela, billimar-nibneg-nanaidbela, unnisulid. Degite, be-nug-odummoleged-neg an-bega-sobsad-bursunna, ¿sunna unniguosi? 28 Degi-inigwele, an-ibmar-sognaid be itoge, an bese ibmar-egisnaid be itobali. An-Bab-Dummad-Jehováʼye an bese-gornaid be itoge.

29 ”Bese-goled-neg-soblesadgi be nakuledii guoed. Aginbali, be sogsagusbalid: ‘An we-neggi gudii guoye.’ Degisoggu, we-neggi an bega sunmakder, be an-itogoed. 30 We-neggi an bese gollalile, be an-itogoed. Israel-dulemar bese gollarmogale, nibneggi-mai be itogoed. Be anmarga anmar-isgued obeloge.

31 ”Dule-gwensak e-gwenadgi yolesdibe, we-dulega soglesdibe, bese-goled-neg-dummadse nonikoye, agi Bab-Dummad-e-aila-asabin ise-sogar-sogdibe, an egi yolessurye, 32 nibneg-akale be itogoed, be-sogedba be igar nudakoed. Be-dulamarga be igar nudako. Dule-yoledimalad na e-ibmar-imaksadba be sabsur-odurdakoed, e-ibmar-imaksadba ega be igar nabogoed. Dulemar-akar-ibmar-imaksasurmaladgardina, ega be igar nudakoed, e-ibmar-nued-imaksadba egi be sogoed, gwen be ibmar oakalossurye.

33 Bab-Jehováʼye, be-Israel-dulemar begi-yolesad-ular,

e-isdarmalad-abin galakunonikile,

agine, magar neg-itononimalale,

degi, bese gannar-wilenonimalale,

gannar be-nug-odummononimalale,

bese-goled-neg-soblesadgi ise-wilesagwar bese gollarmalale,

degi, bega na e-isgusad barsognanai guarmalale,

34 nibneggi-mai be itogoed.

Israel-dulemar-e-isgued be osulogoed.

Geb gannar Israel-dulemar yar-e-dadganga-uklesadse be senonikoed.

35 ”Be-dulamar begi yolesad-ular,

bar dii-wisuli be imakalile,

deyob, be be-dulamar-sabsur-odurdaknai gualile,

bese-goled-neggi bese ise-gollar imakarmalale,

agine, e-isgusmaladgi bangudmalale,

gannar be-nug odummonai guarmalale,

36 nibneggi-mai be itogoed.

Be-Israel-dulemar-e-isgued be osulogoed.

Be-igarba nabir nanamalaga, igar-nuedgi be odurdakoed.

Geb be-dulamarga, yar-ega-be-uksadgi, be dii gannar owibaloed.

37 ”Israel-dulemar-yar-naidgine,

ukud-dummad nagunonidibe,

bonimar noardibe,

uka-aimaked noardibe,

sesemar ainiardibe,

sese-burwigan ainiarbardibe,

aginbali, e-neggwebur-bukwadgine,

e-isdarmalad ebiris ambikunonidibe,

bela bonigan egi noardibe,

uelleged egi nononibardibe,

agine, Israel-dulemar magar e-nosad itononikile,

bese ise gollar-imakdemalale,

nibneggi-mai be itogoed.

38 ”Deginbali, Israel-dule-gwensakgi boni yolenonikile,

agine, na magar e-nosad itononikile,

bese ise-gollar-imakdele,

e-arganmar bese-goled-neg-siidse oyodbalile,

degi, bela Israel-dulemar deyob imakdemarmogale,

39 nibneggi-mai be itogoed,

degi, Israel-dulemar-e-isgued be osulogoed.

War-wargwengi e-daedba ega be ibmar-imakoed,

ade, bebi unnila dule-e-binsaed magar be daked.

40 We-yar-anmar-dadganga-be-uksadgi,

deyobi, bela dulemar be-dobekwaa-nanadii gumaloed.

41 ”Israel-dulemarsulid, be-dulamarsulid, be-nug-dummarba-maid-itosadba dikasur-danimaladi, deyob be imakmogoed.

42 Degisoggu, dule-bamalad be-nug-dummarba-maid wisgunonimaloed,

be-gargandik-maid wisgunonimarbaloed,

be-gandik-maid wisgumarbaloed.

We-Israel-dulemarsulid bese-goled-neggi bese gollalile,

43 nibneggi-mai be itogoed.

Israel-dulemarsulid bese ibmar-egichialile,

ega be sogedba ibmar-imakoed.

Bela-dulemar-we-napneggi-bukwamalad, Israel-dulemaryob be-nug wisgunonimarmogoed,

degi, be-dobee itononimaloed.

Agi, an-bese-goled-neg-sobsadgi be-nug-odummolenaidi, magasar dakmaloed.

44 ”Bab-Jehováʼye, be-Israel-dulemar e-isdarmaladgi bila-ononamalaga be barmisale,

amar Jerusalén-neggwebur-na-be-susadsik-atakbukwa bese gotemalale,

aginbali, an bega bese-goled-neg-sobsadsik-atakbukwa bese gotemalale,

45 nibneggi-mai be itogoed.

Bab-Jehováʼye, amar ise-wilegar bese gornanaile,

be bendaknonikoed.

46 ”Ar dule we-napneggi begi noedbisoggu,

Israel-dulemar begi yolenonimalale,

geb egi be gwisgunonikoed,

degidba be e-isdarmaladga urmakoed,

yar-baid-dikasulidse seledmaloed,

sulile, yar-baid-walikagwadse seledmaloed.

47 ”Geb a-yargi Israel-dulemar gales-bukwadgi na e-isgusad magar itononimalale,

agine, bese ise-gormakar gotemalale,

degi, weyob sogdemalale:

‘Anmar nue-nosye,

anmar ibmar-isgana imaksaye,

anmar nue-isgusye.’

Bab-Jehováʼye, nibneggi-mai be itogoed,

Israel-dulemar-e-isgued be osulogoed.

48 ”Aginbali, e-isdarmalad-e-neggi galesbukwa, e-gwage-ulubgi napiragwadgi gwagnonimalale,

we-yar-anmar-dadganga-be-uksadsik-atakbukwa,

be-Jerusalén-neggwebursik-atakbukwa gornanaile,

an bega bese-goled-neg-sobsadsik-atakbukwa,

49 bese ise-gollar gornanaile,

nibneggi-mai be itogoed.

Agi, be bendaknonikoed.

50 Be-dulamar-e-isgued ega be osuloge,

begi-yolesmalad-e-isgusad ega be elie.

E-isdarmalad be-dulamar-wiledakega be imake.

51 Ade, Israel-dulemar be-dulamar-gued, na begadid.

Ar ade, be, Israel-dulemar-soo-dummad-abargi-bukwayob,

Egipto-yargi-bukwa be onosad.

52 ”Degisoggu, an-bese-gornaid nue be itoge, be-dulamar bese-gornamogad nue be itobali. Bese gorleged-iliba bela be itogoed. 53 Be-dulamar begadga-imakega be bachikii dulemar-bamaladgi obacha gusad.

”Bab-Dummad-Jehová-Bur-Dummadye, anmar-dadgan Egipto-yargi be ononaigusgua, deyob be be-mai-Moisésʼga sogsa gusad.”

54 Salomón, Bab-Jehováʼga-ibmar-ogumakar-ukleged-aila-asabin Bab-Jehováʼse ise-gollar-siigu, yokorgi sindigar gorsii gusad. Degi, e-arganmar niba-onakwale sii gusbalid. Geb Babse-goled-bergusgua, gwisgusad. 55 Salomón gwisgusgua, Israel-dulemarga Bab-Jehováʼse goted. Weyob binnasuli sogded:

56 “Bab-Jehováʼye, be sogsa gusad: ‘Israel-dulemarga an neg-bogidikid nasikoye.’ Emisgindi, ega be nasiknonikid. Belagwable be-mai-Moisésʼga be anmarga ibmar-imakoye sogsagusad, bela be imaknonikid.

57 ”Anmar-Bab-Dummad-Jehováʼye, anmar-dadganba be gudii gusayobi, be anmarba gudii gusana gadin, mer be anmar-obanena gadin. 58 Bab-Jehováʼye, bebina-nue-itogega be anmar-imake, adi, anmar be-sogedba nanamalagar.

Be-Igar-Islidik-Maidba,

Be-Negseleged-Igar-Maidba,

Be-Igar-Mesisadba,

anmar nanamalagar.

We-igarmar be anmar-dadganga uksa gusad.

59 ”Bab-Jehováʼye, an bega we-ibmar-binai-gusadi, bitigi egi be bane-bane binsadii gusana gadin. Bane-bane ibmar-abelegedba, be an-bendakdii gusana yeerban, degine, deyob be be-Israel-dulamar-bendakbaligar. 60 Adi, deyobi dule-ainebarmalad magar be-dakmaloed, bede Bab-Jehová guye, beyobid, bab-dummad-baid surye. 61 Degisoggu, bela Bab-Jehováʼga na be san-ukmala,

gwage-swilidikidgi be nanadii gumala,

e-Igar-Sogmaidba be gudii gumala,

e-Igar-Islidik-Maidba be gudii gumala.

Igi emi-ibagi bemar igar-maidba nanadimala, deyob be nanamala.”

Bab-Dummadga ese-goled-neg nugsalesad

(2 Crónicas 7:1-10)

62 Agi, Rey-Salomón, bela Israel-dulemarmala, Bab-Jehová-asabin ibmar-ogumakar uknai gusad. 63 Salomón Bab-Jehováʼga dogdar-nuedye-sogleged-ibmar-ukleged uknai gualid. We-ibmarmar uksad:

Moli-bebe-nikad,

mili-dulagwen-gakabo (22,000) uksad.

Sibad-wawaad, degi, sibadmar,

mili-dulanergwa (120,000) uksabalid.

Deyob, Salomón bela Israel-dulemarmala, Bab-Jehováʼga neg-soblesad nug-imaknai gusad.

64 A-ibagine, Rey-Salomón, Bab-Jehováʼse-goled-neg-imba-naid, Bab-Jehováʼga nug-imaknai gusad. We-neg-imba, Bab-Jehová-e-neg-asabin naid.

A-neg-imba-naidgi,

ibdurgan ogumakar uknai gusad,

ibmar-gwag-gulleged uknai gusbalid,

degi, gwenatigwar-guega ibdurgan-e-gwallu ogumakar uknai gusbalid.

Ar ibmar-ogumakar-ukleged-aila-esgoro-gordikidgi-sobaled, Bab-Jehová-e-neg-asabin-siid senisoggu, unnisulid. Ar ade, ibmar-ogumakar-ukleged ichesulid. Deginbali, dogdar-nuedye-sogleged-ibmar-ukleged ichesurbalid.

65 Deyob, Salomón, bela Israel-dulemarmala Bab-Dummad-Jehová-asabin, ibagugle (7) iba-ononai gusad. Degine, Salomón napi-ibagugle (7) iba-obangusbalid. Belagwable ibambe-gakabake (14) iba-ononai gusad. A-ibase, bukidar-dule-ainebarmalad nonigusmalad. Hamatʼye-neg-nugadginmalad, degi, Egipto-diwarginmaladse-bakale, noni gusmalad. Dulemar bukidar ibase noni gusmalad. 66 Iba-gwinmaknaid-oibosgua, Salomón dulemar-naesognanaidga napi-sognai gualid, degimaloye. Geb a-dulemar, Rey-Salomónʼgi nued binsananai gusmalad. Bela e-neg-e-negse nade gusmalad. Nadmargu, Bab-Jehová Davidʼga-ibmar-nuegan-imaksadba, degine, Israel-dulemarga-ibmar-nuegan-imaksabalidba, weligwar na itonadapi gusmalad.

<- 1 Reyes 7 1 Reyes 9 ->