1 Chunꞌ ndiꞌin la naꞌaǎn chaꞌ mbiꞌya xka angajle nu mdoꞌo nde niꞌ kwan seꞌen ndiꞌin Ndiose bra kanꞌ. Angajle kanꞌ ndiꞌya yaꞌ naꞌan tu tiyu kiꞌñi seꞌen ndiꞌin kuneꞌ xaꞌan, loꞌo ndiꞌya ska karenan tukwin ndijyan bra kanꞌ. 2 Kwiꞌ msñi angajle kanꞌ kunan tnun, ti kwiꞌ kunan lka nu ndiꞌin lo chalyuu, ti kwiꞌ kuneꞌ xaꞌan nu naan Satanás lka iꞌ. Tsaa mskanꞌ angajle kanꞌ ꞌin kuneꞌ xaꞌan loꞌo karenan sa yaꞌ nu taꞌa ska mi yijan bra kanꞌ. 3 Mstyuu angajle kanꞌ ꞌin kunan kanꞌ ndyaa tu tiyu kiꞌñi bra kanꞌ, mdukunꞌ tuꞌwa tiyu kanꞌ. Kanꞌ ngwaꞌan kiñaꞌ tuꞌwa tiyu, chaꞌ ja tyoꞌo kunan kanꞌ, chaꞌ ja ka ꞌa kwiñi lyoꞌo iꞌ ꞌin nten chalyuu sa yaꞌ taꞌa ska mi yijan bra kanꞌ. Bra nu wa mdaꞌa yijan kanꞌ, ti ndiꞌin chaꞌ tyoꞌo nu kanꞌ ti xiꞌi chaꞌ ti kuꞌni la chaꞌ kuxi bra kanꞌ.

4 Loꞌo naꞌaǎn seꞌen ndukwa tyun yka xlya tnun bra kanꞌ. Loꞌo nsuꞌwi lyoǔn ꞌin neꞌ nu ndukwa lo yka xlya kanꞌ, chaꞌ kwiꞌ nu nsuꞌwi chabiyaꞌ kuꞌni biyaꞌ ꞌin nten chalyuu lka neꞌ kanꞌ bra kanꞌ. Laja neꞌ nu ndukwa kwa naꞌaǎn nten chalyuu nu ngujwi sꞌni; wa yjwi nten ꞌin neꞌ, chaꞌ ja ytsen neꞌ katsaꞌ ñi neꞌ chaꞌ suꞌwe ꞌin Ndiose ꞌin taꞌa nten neꞌ, ti kwiꞌ chaꞌ nu wa ykwiꞌ Jesús loꞌoan chabiyaꞌ ꞌin Ndiose Sti Ni lka chaꞌ kanꞌ. Loꞌo ja yꞌni tnun ayman kanꞌ ꞌin ꞌni chen ñaꞌan kanꞌ; ti kwiꞌ ti chaꞌ, ja yꞌni tnun neꞌ ꞌin nkwin ꞌni kanꞌ, loꞌo ja ngaꞌan biyaꞌ ꞌin ꞌni kanꞌ chkan neꞌ, o ta chunꞌ yaꞌ neꞌ. Wa ndyuꞌu neꞌ kanꞌ xiyaꞌ, loꞌo ni, lka neꞌ ndloo loꞌo Krixtu la seꞌen ndiꞌin Ndiose sa yaꞌ taꞌa ska mi yijan bra kanꞌ. 5 Ayman nu wa naꞌaǎn ni, kanꞌ lka nu wa ndyuꞌu xiyaꞌ ndla la, chaꞌ ti ndiya xka ta ayman nu ti ji tyuꞌu; yaꞌ nu taꞌa ska mi yijan, la kanꞌ tyuꞌu xka ta neꞌ kanꞌ xiyaꞌ bra kanꞌ. 6 ¡Loꞌo suꞌwe ꞌa ka tiye nten nu tyuꞌu xiyaꞌ ndla la, chaꞌ nten ꞌin Ndiose lka neꞌ kanꞌ! Ja ndiꞌin chaꞌ tyijin neꞌ kanꞌ nu tiꞌí siyaꞌ ti xa nu tyaa nchga nten kuxi la chalyuu tla, nde seꞌen tyii nchga chaꞌ siyaꞌ ti bra kanꞌ. Kuꞌni neꞌ kanꞌ tñan ꞌin Ndiose; kwiꞌ ngwañaꞌan, kuꞌni neꞌ tñan ꞌin Krixtu, chaꞌ suꞌwa ka neꞌ ndloo loꞌo Krixtu sa yaꞌ nu tyii ska mi yijan bra kanꞌ.

7 Xa mdaꞌa ska mi yijan kanꞌ, tyoꞌo Satanás niꞌ ñaꞌan chkwan seꞌen nsuꞌwi yu ndijin yu nu tiꞌí bra kanꞌ. 8 Tyoꞌo Satanás kanꞌ ti xiꞌi chaꞌ kwiñi lyoꞌo yu ꞌin nchga nten tyukwi ñaꞌaan chalyuu, chaꞌ xuun neꞌ loꞌo Ndiose; neꞌ Gog loꞌo neꞌ Magog lka nten kanꞌ. Ñaꞌan tiꞌ kata ysiin nu ndiꞌin tuꞌwa tujoꞌo chaꞌ ja nchka ꞌñaan kwaan sa kwa lka ran, kwiꞌ ngwañaꞌan, ja ka kwaan ni sa ñaꞌan nten xoꞌ tiꞌin Satanás chaꞌ xuun yu loꞌo Ndiose bra kanꞌ. 9 Chunꞌ ndiꞌin la tyoꞌo nten nu ndiꞌin chaꞌ ꞌin loꞌo Satanás kanꞌ, tsaa neꞌ tyukwi ñaꞌaan chalyuu. Tsaa tuun neꞌ ñaꞌaan chunꞌ seꞌen ndiꞌin taꞌa nten ꞌin Ndiose bra kanꞌ, suꞌwa loꞌo neꞌ ꞌin neꞌ kanꞌ bra kanꞌ. Tyiꞌin neꞌ ñaꞌaan tuꞌwa kichen tnun, kwiꞌ nu ndiya la tiꞌ Ni bra kanꞌ. Nka tiye neꞌ kuꞌni tyii neꞌ ꞌin nten ꞌin Ndiose. Kanꞌ chaꞌ suꞌwa Ndiose kiiꞌ nu tyoꞌo nde niꞌ kwan kalu lyuu seꞌen ndiꞌin neꞌ kanꞌ, tyii neꞌ skin neꞌ bra kanꞌ. 10 Chunꞌ ndiꞌin la xñi Ni kuneꞌ xaꞌan nu wa mñi lyoꞌo ꞌin neꞌ ti kulo, tyaa loꞌo Ni ꞌin yu la lo tiyuꞌ kiiꞌ, seꞌen ndiꞌin kiiꞌ nchkin loꞌo yuu sufri; ti kwiꞌ seꞌen wa mxkwan Ni ꞌin ꞌni chen ñaꞌan kanꞌ, kwiꞌ seꞌen mxkwan Ni ꞌin nu kwiñi kanꞌ, nu ndukwin chaꞌ nchkwiꞌ chabiyaꞌ ꞌin Ni. Tsan loꞌo tla ja tsaa tii ꞌa chaꞌ tyijin neꞌ nu tiꞌí nde kwa bra kanꞌ.

11 Loꞌo kanꞌ naꞌaǎn chaꞌ ndukwa ska nten tnun lo ska yka xlya tnun nu xaa ꞌa bra kanꞌ. Loꞌo ni, chaꞌ nde kwa ndiꞌin Ndiose nu tlyu la ti, kanꞌ chaꞌ ngutin nchga chalyuu, ngutin nchga nan nu nsuꞌwi nde niꞌ kwan; ja la ꞌa chkanꞌ ran siyaꞌ ti, ja mjwi ꞌa seꞌen xuꞌwi ran nde kwa bra kanꞌ. 12 Loꞌo naꞌaǎn chaꞌ la kwa ndiꞌin nchga nten nu wa ngujwi, ni siya neꞌ kula, ni siya neꞌ kuneꞌ, ndiꞌin neꞌ tloo yka xlya tnun seꞌen ndukwa Ndiose bra kanꞌ. Kwiꞌ ngalaa kityi kanꞌ bra kanꞌ, loꞌo ngalaa xka kityi kanꞌ seꞌen ndukwa nin nten, nchga nten nu wa mjwi chalyuu nu ja tsaa tii ꞌa ꞌin neꞌ, chaꞌ wa ndyuꞌu neꞌ xiyaꞌ bra kanꞌ. Loꞌo chunꞌ kityi nu ngwaꞌan Ndiose yꞌni biyaꞌ Ni ꞌin nchga nten nu wa ngujwi kanꞌ, chaꞌ lo kityi kanꞌ ndukwa nchga tñan nu yꞌni neꞌ xa nu yan neꞌ lo chalyuu. 13 Loꞌo xiyaꞌ ndyuꞌu nten nu wa ngujwi lo tyiꞌa tujoꞌo, kwiꞌ ngwañaꞌan, xiyaꞌ ndyuꞌu nten nu ndyaa loꞌo La Mte ꞌin, loꞌo ayman nu ndyaa seꞌen ndiꞌin chaꞌ tsaa nten xa wa ngujwi neꞌ; taꞌa neꞌ kanꞌ mdoꞌo neꞌ ndijyan neꞌ bra kanꞌ. Loꞌo yꞌni biyaꞌ Ndiose ꞌin nchga nten chaꞌ ꞌin nchga tñan nu wa yꞌni neꞌ xa nu yan neꞌ lo chalyuu bra kanꞌ. 14 Kanꞌ mxkwan Ni ꞌin La Mte, loꞌo mxkwan Ni ñaꞌaan chalyuu seꞌen ndiꞌin ayman, ndyaa ran la lo tiyuꞌ seꞌen ndiꞌin kiiꞌ tnun nchkin bra kanꞌ. Ngwañaꞌan nten nu tsaa lo tiyuꞌ kanꞌ ni, tyaa neꞌ chalyuu tla bra kanꞌ; kaja neꞌ kanꞌ siyaꞌ ti, ja tyuꞌu ꞌa neꞌ kanꞌ bra kanꞌ. 15 Kwiꞌ nde kwa xkwan Ndiose ꞌin nchga nten nu ja ndukwa nin lo kityi ꞌin Ni, tsaa neꞌ la lo tiyuꞌ seꞌen ndiꞌin kiiꞌ kanꞌ. Wa ytsaꞌ kityi kanꞌ ti ka nu ja tsaa tii ꞌa chalyuu ꞌin.

<- EL APOCALIPSIS 19EL APOCALIPSIS 21 ->