EL APOCALIPSIS 15

Mdiyan loꞌo angajle xa kati kicha nu kuꞌni tyii chalyuu

1 Chunꞌ ndiꞌin la mdoꞌo tukwa xka biyaꞌ tnun nde niꞌ kwan bra kanꞌ. Nduwe ꞌa tiǎnꞌ bra nu naꞌaǎn ꞌin ran, chaꞌ nduun kati angajle ꞌin Ndiose loꞌo kati kicha nu kan xa wa tyii ti chalyuu bra kanꞌ. Xa wa mdyii mdijin kicha kanꞌ chalyuu, kwiꞌ ñaꞌan bra tyii chaꞌ msinꞌ tiꞌ Ndiose bra kanꞌ.

2 Loꞌo naꞌaǎn ska tiyuꞌ nu luwi ꞌa ñaꞌan ñaꞌan tiꞌ kunan, ngwañaꞌan luwi ꞌa lo tiyuꞌ kanꞌ; sa ñaꞌan ndyituun ska kiiꞌ nchkin, ngwañaꞌan ñaꞌan tiyuꞌ kanꞌ, mskeꞌ tiǎnꞌ bra kanꞌ. Tuꞌwa tiyuꞌ xaa kanꞌ naꞌaǎn nduun nchga nten nu wa mdijin lyo ꞌin ꞌni chen ñaꞌan kanꞌ. Ja mslyaa neꞌ kuꞌni tnun neꞌ ꞌin nkwin ꞌni kanꞌ, ti kwiꞌ ti ja mslyaa neꞌ chaꞌ tyaꞌan biyaꞌ ꞌin iꞌ chunꞌ yaꞌ neꞌ, ni siya wa ngujwi neꞌ kanꞌ chaꞌ ja mslyaa neꞌ kuꞌni neꞌ ngwañaꞌan. Biyaꞌ kanꞌ lka número nu katsaꞌ sa ñaꞌan naan iꞌ bra kanꞌ. Nduun neꞌ kanꞌ nde kwa, ngala neꞌ snen tnun nu naan arpa nu wa mda Ndiose ꞌin neꞌ bra kanꞌ. 3 Ngala tuꞌwa neꞌ ska kantu nu suꞌwa ñaꞌan nchkwiꞌ loꞌo kantu nu wa yla tuꞌwa ayman Moisés nu ngwa sꞌni, ti kwiꞌ Moisés nu yꞌni tñan ꞌin Ndiose; loꞌo nu lka ñaꞌan tiꞌ slyaꞌ kanꞌ, kwiꞌ ngwañaꞌan ndla tuꞌwa Ni. Nde ndiya chaꞌ nu nchkwiꞌ kantu kanꞌ:

Ndiose Xꞌnan ba, nchga tñan nchka ꞌiin ngiꞌnii;

tnun ꞌa tñan ngiꞌnii lo chalyuu, loꞌo nduwe ꞌa tiꞌ nchga nten chunꞌ tñan kanꞌ.

Nuꞌwin ni, xkwiꞌ chaꞌ nu ñi ngiꞌnii loꞌo nten chalyuu, chañi ꞌa nchga chaꞌ nu nchkwiiꞌ loꞌo nten.

Ska ti nuꞌwin lka Xꞌnan nten tyukwi ñaꞌaan chalyuu.

4 ¿Loꞌo ja ntsen neꞌ ꞌiin a?

¿Ta ja xlyaa neꞌ nchkwin neꞌ chaꞌ tnun ꞌa tñan ngiꞌnii a?

Ska ti nuꞌwin nu luwi ꞌa kasiya ꞌiin.

Wa naꞌan neꞌ nchga seꞌen ngiꞌni biyaaꞌ ꞌin nten chaꞌ ñi ꞌa ndyoꞌo chaꞌ,

kanꞌ chaꞌ ndijyan nchga nten tyukwi ñaꞌaan chalyuu seꞌen ndiꞌiin chaꞌ kuꞌni tnun neꞌ ꞌiin.

Mdyii kantu nu ngala tuꞌwa neꞌ bra kanꞌ.

5 Chunꞌ ndiꞌin la naꞌaǎn niꞌ lyaa tnun ꞌin Ndiose nu ndukwa laa nde niꞌ kwan bra kanꞌ. Jluꞌwe la niꞌ lyaa kanꞌ ndukwa ska naꞌan nu kti ꞌa, seꞌen msuꞌwa neꞌ kee kwajaꞌ nu ndukwa lee ꞌin Ndiose lo; ti kwiꞌ chaꞌ nu wa ngwaꞌu Ndiose ꞌin nten nu ngwa ti kulo lka ran. 6 Mdoꞌo kati angajle kanꞌ niꞌ lyaa, ndyaa loꞌo neꞌ ꞌin taꞌa kati kicha nu ka xa wa tyii ti chalyuu bra kanꞌ. Xkwiꞌ teꞌ ngaten lkuꞌ angajle kanꞌ, teꞌ nu xaa ꞌa; kwiꞌ ngwañaꞌan, wa nchkanꞌ tiye neꞌ loꞌo sintya oro. 7 Loꞌo bra kanꞌ mdyituun ska ꞌni kti kanꞌ, kwiꞌ ndiya kati kaꞌnan oro yaꞌ iꞌ; loꞌo kicha nu nsuꞌwi niꞌ kaꞌnan kanꞌ ta Ndiose nu tiꞌí ꞌin nten chalyuu, chaꞌ msinꞌ ꞌa tiꞌ Ni ꞌin neꞌ, ti kwiꞌ Ni nu ja tsaa tii ꞌa chaꞌ ꞌin Ni. Mda iꞌ kaꞌnan kanꞌ ꞌin taꞌa kati angajle kanꞌ bra kanꞌ. 8 Wa msaꞌan niꞌ lyaa nsuꞌwi sñii chaꞌ ka biyaꞌ tianꞌ chaꞌ kti ꞌa chaꞌ kanꞌ, chaꞌ tnun ꞌa chaꞌ nu nchka ꞌin Ndiose. Loꞌo ja tukwin ngwa sten niꞌ lyaa kanꞌ sa ñaꞌan yaꞌ tyii taꞌa kati kicha nu ta kati angajle kanꞌ ndijyan lo chalyuu.

<- EL APOCALIPSIS 14 EL APOCALIPSIS 16 ->