1 Bra nu ngwiꞌya xaa xka tsan, xiyaꞌ ndyoꞌ tiꞌin nchga sti joꞌo nulka ndloo loꞌo nchga yu kula ꞌin neꞌ judío, chaꞌ ka suꞌwa chaꞌ ꞌin neꞌ loꞌo taꞌa neꞌ, sa ñaꞌan ka kujwi neꞌ ꞌin Jesús. 2 Mskanꞌ neꞌ ꞌin Jesús bra kanꞌ, ndyaa loꞌo neꞌ ꞌin tloo Poncio Pilato, nu ngwa gobernador romano.

3 Loꞌo Juda nu yꞌni trisiyun ꞌin Jesús yaꞌ neꞌ xaꞌan kanꞌ, naꞌan yu chaꞌ wa kujwi ti neꞌ ꞌin Jesús; ngwa xiꞌin ꞌa tiꞌ yu bra kanꞌ. Bra ti ndya yu kalatyii tñi plata kanꞌ ꞌin yu nu lka ndloo kanꞌ xiyaꞌ.

4 ―Ndiꞌin kiꞌya ꞌñaǎn ―ndukwin Juda kanꞌ ꞌin yu nu lka ndloo―, chaꞌ wa yjwiǐnꞌ ska nten luwi ꞌwan, chaꞌ kujwi wan ꞌin ―ndukwin.

Mxkwen yu nu lka ndloo kanꞌ ꞌin Juda bra kanꞌ:

―Siꞌi chaꞌ ꞌwa lka chaꞌ kanꞌ ―ndukwin neꞌ nu lka ndloo―. Si ndiꞌin kiꞌya ꞌiin, chaꞌ ꞌiin lka kanꞌ.

5 Kanꞌ chaꞌ mslu Juda tñi plata kanꞌ niꞌ lyaa tnun tloo yu nu lka ndloo kanꞌ, mdoꞌo yu ndyaa yu bra kanꞌ. Loꞌo Juda kanꞌ, ti ykwiꞌ ti yu yjwi yu ꞌin yu; mskanꞌ yu ti su ynin yu, loꞌo nguun yu ti su lo yka, mskanꞌ tukwi yu ꞌin yu, ti ykwiꞌ ti yu. Kanꞌ mxtyuu loo yu lyuu, ngujwi yu bra kanꞌ.

6 Msñi sti joꞌo nu lka ndloo tñi kanꞌ bra kanꞌ.

―¿Ni sa ñaꞌan kuꞌnian sikwa a? ―ndukwin sti joꞌo ꞌin taꞌa neꞌ―. Ja ndiya chabiyaꞌ xtyaan tñi re loꞌo lomstan nu wa mda nten ꞌin Ndiose niꞌ lyaa re, chaꞌ tñi nu mjwi ꞌin yu chaꞌ yꞌni yu trisiyun ꞌin ska nten lka tñi re ―ndukwin sti joꞌo kanꞌ.

7 Loꞌo ngwa suꞌwa chaꞌ ꞌin neꞌ loꞌo taꞌa neꞌ, chaꞌ xiꞌi neꞌ ska loꞌoo ꞌin nten loꞌo tñi kanꞌ, seꞌen mñan neꞌ katunꞌ nu ngwa sꞌni; kaja seꞌen niꞌ lyoꞌoo kanꞌ katsiꞌ ayman ꞌin neꞌ xka laꞌa tsuꞌ. 8 Kanꞌ chaꞌ nchkwiꞌ neꞌ chaꞌ ꞌin yuu kanꞌ ni: Niꞌ lyoꞌoo seꞌen ngalu tnen nten, ngwañaꞌan naan yuu kanꞌ ꞌin neꞌ sa bra ni. 9 Ayman Jeremías nu ykwiꞌ chaꞌ ꞌin Ndiose loꞌo nten nu ngwa sꞌni, wa ngwaꞌan yu chaꞌ re chaꞌ ꞌin tñi plata kanꞌ lo kityi, ska chaꞌ nu ka nde loo la: “Kalatyii tñi plata (sa kwa nsuꞌwi lyo ska nten, ndukwin neꞌ Israel taꞌaan). 10 Loꞌo msñi neꞌ tñi kanꞌ, msiꞌi neꞌ ska loꞌoo ꞌin nten nu mñan katunꞌ nu ngwa sꞌni. Kanꞌ ngwa tñan nu ngulo Ni ꞌñaǎn, Ndiose nu nka Xꞌnaan” ndukwin Jeremías.

11 Chunꞌ ndiꞌin la mdiyan loꞌo neꞌ ꞌin Jesús tloo nu nka gobernador kanꞌ, mnichaꞌ nu lka ndloo kanꞌ ꞌin Jesús bra kanꞌ:

―¿Ti kwiiꞌ lkaa ree ꞌin neꞌ judío a? ―ndukwin nu lka ndloo ꞌin Jesús.

―Ti kwiǐnꞌ lkaǎn ti kwiꞌ sa ñaꞌan nu ndukwiin chaꞌ lkaǎn ―ndukwin Jesús bra kanꞌ.

12 Loꞌo tyun sti joꞌo nu lka ndloo loꞌo yu kula kanꞌ, mstya neꞌ kiꞌya ꞌin Jesús; ja mxkwen ꞌa Jesús ꞌin neꞌ kanꞌ. 13 Chunꞌ ndiꞌin la xiyaꞌ ykwiꞌ Pilato loꞌo Jesús bra kanꞌ:

―¿Ta ja ynaan chaꞌ kuxi nu nchkwiꞌ neꞌ kwa ꞌiin a? ―ndukwin nu lka ndloo kanꞌ ꞌin Jesús.

14 Ja mxkwen ꞌa Jesús ꞌin neꞌ; ja ska chaꞌ ykwiꞌ yu, kanꞌ chaꞌ nduwe ꞌa tiꞌ Pilato kanꞌ naꞌan yu ꞌin Jesús.

15 Nchga yijan bra nu nchka taꞌa kanꞌ, ndlaa nu nka gobernador ꞌin ska presu, ti kwiꞌ presu nu jñan neꞌ judío ꞌin. 16 Tsan kanꞌ, ndiꞌin ska yu kiꞌyu nu naan Barrabás niꞌ ñaꞌan chkwan, ska nten nu ndukwi ꞌa kiꞌya ngwa yu kanꞌ. 17 Loꞌo kaꞌan ꞌa neꞌ judío ni, ndyoꞌ tiꞌin neꞌ tuꞌ naꞌan ꞌin gobierno, loꞌo mnichaꞌ Pilato ꞌin neꞌ bra kanꞌ:

―¿Ti lka nchka tiꞌ wan chaꞌ kulaǎn ni a? ¿Ta suꞌwe la lyaa Barrabás a? ¿O ta suꞌwe la lyaa Jesús nu nchkwiꞌ wan chaꞌ lka Krixtu a? ―ndukwin Pilato ꞌin neꞌ.

18 Jlyo tiꞌ Pilato, chaꞌ tiꞌí ꞌa tiꞌ neꞌ nu lka ndloo kanꞌ ñaꞌan neꞌ ꞌin Jesús, kanꞌ chaꞌ msuꞌwa neꞌ kanꞌ ꞌin yu niꞌ ñaꞌan chkwan.

19 Ti nduun nten kaꞌan kanꞌ seꞌen ndiꞌin Pilato, loꞌo ti ndukwa Pilato kanꞌ lo yka xlya tnun seꞌen ngiꞌni biyaꞌ yu chaꞌ ꞌin nten. Kanꞌ mdiyan ska msu seꞌen ndukwa yu, ytsaꞌ msu chaꞌ re nu wa ykwiꞌ kwilyoꞌo Pilato: “Ja ska chaꞌ kuꞌnii loꞌo yu kiꞌyu kwa, nten suꞌwe lka yu kwa” ndukwin nu kunaꞌan kanꞌ ꞌin Pilato. “Tyukwi tla lye ꞌa mdaꞌan chaꞌ tiyeěn chaꞌ ꞌin yu kwa. Wa ykwiꞌ slaǎn chaꞌ ꞌin yu kwa.”

20 Nchga sti joꞌo nu lka ndloo loꞌo yu kula kanꞌ, wa ykwiꞌ neꞌ loꞌo nten kaꞌan kanꞌ, chaꞌ jñan neꞌ chabiyaꞌ ꞌin Pilato chaꞌ kulaa yu ꞌin Barrabás nu ndiꞌin niꞌ ñaꞌan chkwan kanꞌ, loꞌo kujwi Pilato ꞌin Jesús bra kanꞌ. 21 Chunꞌ ndiꞌin la mnichaꞌ gobernador kanꞌ ꞌin neꞌ kanꞌ xiyaꞌ:

―¿Ti ka kulaǎn sikwa a? ―ndukwin Pilato ꞌin neꞌ.

―ꞌIn Barrabás ―ndukwin nten kaꞌan bra kanꞌ.

22 ―¿Ni ñaꞌan kuꞌniǐn loꞌo Jesús nu nchkwiꞌ wan chaꞌ nka Krixtu sikwa a? ―ndukwin Pilato bra kanꞌ.

―¡Jwiꞌin kaꞌan wan ꞌin yu lo wsi! ―ndukwin nchga nten bra kanꞌ.

23 ―¿Ni chaꞌ lka nchka tiꞌ wan chaꞌ kujwiǐn ꞌin yu re? ―ndukwin Pilato bra kanꞌ―. ¿Ni kiꞌya ndukwi yu a?

Kwen ꞌa msiꞌya loꞌo neꞌ ꞌin Pilato bra kanꞌ:

―¡Jwiꞌin kaꞌan wan ꞌin yu lo wsi! ―ndukwin neꞌ.

24 Bra nu naꞌan Pilato chaꞌ tlá ꞌa ngiꞌni tloo neꞌ, chaꞌ msinꞌ ꞌa tiꞌ neꞌ, jlyo tiꞌ yu chaꞌ ja xlyaa ꞌa neꞌ kunan neꞌ chaꞌ nchkwiꞌ yu loꞌo neꞌ bra kanꞌ. Kanꞌ chaꞌ ngulo yu tñan ꞌin ska msu chaꞌ kan loꞌo msu kanꞌ ska siꞌyuu tyiꞌa. Mnaꞌ yu tloo nchga nten bra kanꞌ.

―Luwi kanun yaǎnꞌ ―ndukwin yu―, chaꞌ siꞌi chaꞌ ꞌñaǎn kaja yu nu ja ska kiꞌya ndukwi re ―ndukwin Pilato ꞌin neꞌ―. Chaꞌ ꞌwan lka chaꞌ kanꞌ.

25 ―Suꞌwe ―ndukwin nchga nten kanꞌ―. Ni siya kanun kiꞌya chunꞌ ba, nchga ba loꞌo sñiꞌ ba, ndiꞌin chaꞌ kaja yu re.

26 Loꞌo ngulaa Pilato ꞌin Barrabás kanꞌ, mjiꞌin neꞌ ꞌin Jesús loꞌo ti su. Kwiꞌ ngulo Pilato tñan ꞌin neꞌ sndaru chaꞌ tsaa loꞌo neꞌ ꞌin Jesús bra kanꞌ, chaꞌ jwiꞌin kaꞌan neꞌ ꞌin yu lo wsi.

27 Loꞌo sndaru nu nduun kwan seꞌen ndiꞌin gobernador kanꞌ, msñi neꞌ ꞌin Jesús bra kanꞌ, ndyaa loꞌo neꞌ ꞌin yu niꞌ ñaꞌan ꞌin gobierno; ytsaꞌ neꞌ ꞌin nchga sndaru nu ndiꞌin niꞌ ñaꞌan kanꞌ, chaꞌ tyoꞌ tiꞌin neꞌ seꞌen nduun Jesús. 28 Loꞌo ngulo neꞌ steꞌ Jesús, mxkuꞌ neꞌ ska teꞌ ngaꞌa ꞌin yu. 29 Kanꞌ mxkwan neꞌ ti kicheꞌ chaꞌ ka ska sneꞌ; mstya neꞌ sneꞌ kanꞌ ke Jesús, kwiꞌ mstya neꞌ ska kii yaꞌ laꞌa seꞌen kwin. Mduun xtyinꞌ neꞌ tloo Jesús bra kanꞌ, chaꞌ xtyi lyoꞌo liyeꞌ tiꞌ neꞌ ꞌin yu; kanꞌ chaꞌ yꞌni neꞌ ngwañaꞌan, sa ñaꞌan si lka yu ska ree lo chalyuu.

―¡Ngiꞌni tnun ba ꞌiin! ¡Nuꞌwin lkaa ree ꞌin neꞌ judío! ―ndukwin sndaru ꞌin Jesús bra kanꞌ.

30 Loꞌo msuꞌwa sneꞌ neꞌ tloo Jesús; msñi neꞌ kii kanꞌ, mjiꞌin neꞌ ke Jesús bra kanꞌ. 31 Bra wa mdyii mstyi lyoꞌo liyeꞌ tiꞌ neꞌ ꞌin yu, bra kanꞌ ngulo neꞌ teꞌ ngaꞌa kanꞌ, xiyaꞌ mxkuꞌ neꞌ nu lka steꞌ ka yu. Mdoꞌo sndaru bra kanꞌ, ndyaa loꞌo neꞌ ꞌin Jesús tuꞌwa kichen chaꞌ jwiꞌin kaꞌan neꞌ ꞌin yu lo wsi.

32 Tuwiin seꞌen ndyaa neꞌ, ndyukwa taꞌa neꞌ loꞌo ska yu kiꞌyu nu naan Simón bra kanꞌ; neꞌ Cirene lka yu kanꞌ. Kanꞌ ngulo sndaru tñan ꞌin Simón kanꞌ, chaꞌ kwiꞌya yu wsi nu ndiꞌya Jesús.

33 Loꞌo mdiya neꞌ ska lo nten nu naan Gólgota. Nde lka Gólgota chaꞌtñan ꞌñaan: Kiꞌya seꞌen ndiya tijyan ke jyoꞌo. 34 Kwiꞌ mda neꞌ mñun mxtiyaaꞌ loꞌo ska tyiꞌa lyaaꞌ chaꞌ koꞌo Jesús; xa nu yiꞌo biyaꞌ yu ꞌin ran, ja mslyaa ꞌa yu koꞌo yu mñun kanꞌ bra kanꞌ.

35 Xa wa mstya neꞌ ꞌin yu lo wsi loꞌo klavu, mdiꞌin jya sndaru chaꞌ yaa kanan taꞌa yu ti ka nu kuꞌni kanan steꞌ Jesús bra kanꞌ. Ti kwiꞌ chaꞌ ngwa chaꞌ nu wa ngwaꞌan ayman nu ykwiꞌ chaꞌ ꞌin Ndiose loꞌo nten nu ngwa sꞌni: “Mtsa neꞌ steěnꞌ loꞌo taꞌa neꞌ laja mdiꞌin jya neꞌ.” 36 Ti kwiꞌ sndaru kanꞌ mdiꞌin kwan kiyaꞌ wsi. 37 Mstya neꞌ letra ke wsi nu nchkwiꞌ sa ñaꞌan kiꞌya ndiꞌin ꞌin Jesús: “Yu re lka yu Jesús, ree ꞌin neꞌ judío.” Ngwañaꞌan ngwa letra kanꞌ.

38 Ti kwiꞌ tsan kanꞌ mstya neꞌ ꞌin tukwa nten nu wa yꞌni kunan lo tyukwa wsi seꞌen nduun wsi ꞌin Jesús; ska ndukwi laꞌa seꞌen kwin ꞌin Jesús, loꞌo xka ndukwi laꞌa seꞌen kaa ꞌin yu. 39 Loꞌo kaꞌan ꞌa nten mdijin seꞌen nduun wsi kanꞌ, mxtyi lyoꞌo neꞌ ꞌin Jesús bra kanꞌ.

40 ―Yu re lka nu kuꞌni tyii ꞌin laa tnun ꞌñaan, ndukwin yu; loꞌo ndukwin yu chaꞌ kwiñan yu xka chunꞌ snan tsan ti. Kulaa ꞌin ti ykwiiꞌ ti sikwa ―ndukwin neꞌ kanꞌ ꞌin Jesús―. Si chañi chaꞌ nuꞌwin lkaa ska ti nu lka Sñiꞌ Ndiose, kiꞌyaa lyaa lo wsi kwa sikwa ―ndukwin neꞌ ꞌin Jesús.

41 Loꞌo sti joꞌo nu lka ndloo, loꞌo mstru nu nduꞌu chaꞌ joꞌo, loꞌo yu kula ꞌin neꞌ judío, nchga neꞌ ndaꞌan naꞌan kwiꞌya neꞌ ꞌin Jesús seꞌen ndukwi yu lo wsi, chaꞌ xtyi lyoꞌo neꞌ ꞌin yu bra kanꞌ.

42 ―Ngulaa yu ꞌin xka ta nten; loꞌo ja nchka ꞌin yu kulaa yu ꞌin yu, ti ykwiꞌ ti yu ―ndukwin neꞌ nu lka ndloo kanꞌ―. Ree ꞌin neꞌ Israel lka yu, ndukwin yu. Suꞌwe la si kiꞌya yu lo wsi kwa ni, chaꞌ tsaa ñaꞌan tianꞌ ꞌin yu bra kanꞌ ―ndukwin neꞌ kanꞌ ꞌin taꞌa neꞌ―. 43 Ndiꞌin ta yu ꞌin Ndiose chaꞌ tayaꞌ Ni ꞌin yu, ndukwin yu; suꞌwe la si kulaa Ndiose ꞌin yu ni, si chañi chaꞌ suꞌwe ꞌa nka tiye Ndiose ñaꞌan ꞌin yu, chaꞌ “Sñiꞌ Ndiose lkaǎn” ndukwin yu re.

44 Loꞌo yu nu yꞌni kunan, taꞌa mstya neꞌ ꞌin yu lo wsi, loꞌo yu kanꞌ mstyi lyoꞌo yu ꞌin Jesús bra kanꞌ.

45 Chunꞌ ndiꞌin la ngwa tla chalyuu snan bra; ti ndiꞌya kwan mdyisnan chaꞌ kanꞌ, sa bra wa snan siin mdyii chaꞌ kanꞌ. 46 Ti kwiꞌ bra wa snan siin, kanꞌ kwen ꞌa msiꞌya Jesús:

―Elí, Elí, ¿lama sabactani? ―ndukwin yu. Nde lka chaꞌ kanꞌ chaꞌtñan: Ndiose Stiǐn, Ndiose Stiǐn, ¿ni chaꞌ lka ngulaa yaaꞌ ꞌñaǎn ni?

47 Bra wa ynan nten nu nduun kwiꞌ seꞌen ti, ykwiꞌ neꞌ loꞌo taꞌa neꞌ:

―Msiꞌya yu re ꞌin ayman Elías ―ndukwin neꞌ bra kanꞌ.

48 Bra ti msnan ska nten ndyaa yꞌya ska kiche, nguchaꞌ yu ꞌin ran loꞌo mñun tiyeꞌ. Loꞌo mskanꞌ yu ꞌin ran lo yka tukwin chaꞌ xtya yu ꞌin ran tuꞌwa Jesús chaꞌ koꞌo yu bra kanꞌ. 49 Loꞌo xka ta nten ndukwin:

―Kataan si chañi chaꞌ kan ayman Elías chaꞌ kulaa ꞌin yu ―ndukwin neꞌ kanꞌ.

50 Chunꞌ ndiꞌin la, kwen ꞌa msiꞌya Jesús xiyaꞌ; mdoꞌo kasiya ꞌin yu, ngujwi yu bra kanꞌ. 51 Ti kwiꞌ ti bra mdaaꞌ teꞌ tlyu nu ndukwi loo joꞌo niꞌ lyaa tnun. Nde tukwin ran mdaaꞌ ran; sa kuꞌ ti mdaaꞌ ran, sa la lyuu ndiꞌin ran. Loꞌo tyun kee tnun ngwaꞌa ran, chunꞌ lye ꞌa mñan chalyuu. 52 Kwiꞌ ngwañaꞌan, ngalaa kwaa seꞌen mtsiꞌ ayman, loꞌo tyun ayman nu mdiꞌin chaꞌ ꞌin loꞌo Ndiose nu ngwa sꞌni, ndyuꞌu ayman kanꞌ xiyaꞌ, 53 mdoꞌo neꞌ niꞌ kwaa bra kanꞌ. Chunꞌ ndiꞌin la, xa wa ndyuꞌu Jesús xiyaꞌ, ndyaa neꞌ kanꞌ lo kichen Jerusalén, kichen nu ndiya la tiꞌ Ndiose. Loꞌo tyun nten naꞌan ꞌin neꞌ nu ngwa ayman kanꞌ, chaꞌ wa ndyuꞌu neꞌ xiyaꞌ.

54 Loꞌo sndaru nu ndiꞌin kwan ꞌin Jesús, loꞌo capitán ꞌin sndaru kanꞌ, yuwe ꞌa tiꞌ neꞌ bra kanꞌ; lye ꞌa ytsen neꞌ xa nu naꞌan neꞌ sa ñaꞌan ngwa chaꞌ kanꞌ, sa ñaꞌan ngwa xa nu lye ꞌa mñan chalyuu.

―Chañi chaꞌ ska ti nu lka Sñiꞌ Ndiose lka ayman re ―ndukwin sndaru kanꞌ.

55 Tyukwi bra nu ngwa chaꞌ kanꞌ, tijyuꞌ ti mduun tyun nu kunaꞌan. Neꞌ taꞌa mdaꞌan Jesús ngwa neꞌ kanꞌ; wa mdoꞌo neꞌ Galilea loꞌo yu chaꞌ mdayaꞌ neꞌ ꞌin yu. Mduun ti nu kunaꞌan kanꞌ, naꞌan kwiꞌya neꞌ ndukwi Jesús lo wsi; 56 loꞌo Liya Magdalena, loꞌo Liya jyaꞌan Santiago jyaꞌan Se, loꞌo nu lka jyaꞌan sñiꞌ Zebedeo, naꞌan taꞌa neꞌ kanꞌ sa ñaꞌan ngwa ꞌin Jesús.

57 Bra wa msiin la mdiyan ska yu kuliyaꞌ nu naan Se, ska neꞌ kichen Arimatea lka yu. Loꞌo Se kanꞌ yꞌni xaꞌan yu chaꞌ ꞌin Jesús. 58 Ti tsan la wa yaa yu seꞌen ndiꞌin Pilato, mjñan yu chabiyaꞌ chaꞌ tsaa loꞌo yu ꞌin ayman Jesús chaꞌ katsiꞌ. Mda Pilato chabiyaꞌ ꞌin yu bra kanꞌ, ngulo Pilato tñan ꞌin sndaru chaꞌ ta neꞌ ayman kanꞌ ꞌin Se. 59 Kanꞌ mxiin Se ska teꞌ luwi chunꞌ ayman kanꞌ, ndyaa loꞌo yu ꞌin ayman kanꞌ chaꞌ katsiꞌ bra kanꞌ. 60 Mtsiꞌ yu ꞌin ayman kanꞌ niꞌ ska tukee nu tka ngulu ti neꞌ siꞌ yuu, chaꞌ ka kwaa seꞌen katsiꞌ ti kwiꞌ Se bra nu kaja yu, mskeꞌ tiꞌ yu. Mdukunꞌ Se tuꞌwa kwaa loꞌo ska kee tlyu, mdoꞌo yu ndyaa yu bra kanꞌ. 61 Loꞌo Liya Magdalena loꞌo xka Liya, ndukwa neꞌ kwiꞌ seꞌen ti tuꞌwa kwaa kanꞌ.

62 Wa ngwa xka tsan ni, wa mdyii yꞌni neꞌ judío tñan ꞌin neꞌ, chaꞌ kuꞌni xuꞌwe neꞌ taꞌa seꞌen nxitñaꞌ neꞌ. Kanꞌ ndyoꞌ tiꞌin nchga sti joꞌo nu lka ndloo loꞌo neꞌ fariseo kanꞌ seꞌen ndiꞌin Pilato bra kanꞌ. 63 Ykwiꞌ neꞌ loꞌo Pilato bra kanꞌ:

―Yu kula ―ndukwin neꞌ ꞌin Pilato―, nsuꞌwi tiꞌ bare chaꞌ nu ykwiꞌ yu kwiñi kanꞌ xa nu ti luꞌu yu: “Xa mdaꞌa snan tsan, bra kanꞌ tyuꞌuǔn xiyaꞌ” ndukwin yu. 64 Kanꞌ chaꞌ suꞌwe la si kulo wan tñan chaꞌ kuꞌni sndaru kwan tuꞌwa kwaa kanꞌ snan tsan, chaꞌ ja ta ꞌa chabiyaꞌ ꞌin neꞌ nu yꞌni xaꞌan chaꞌ ꞌin yu, chaꞌ ja tsaa ꞌa neꞌ kanꞌ kuꞌni neꞌ kunan ꞌin ayman kanꞌ. Ja kaja ñaꞌan chkwiꞌ neꞌ chaꞌ kwiñi chaꞌ wa ndyuꞌu ayman kanꞌ xiyaꞌ bra kanꞌ. Wa msñi nten chaꞌ kwiñi nu ykwiꞌ ayman kanꞌ nu ngwa xkanꞌ; loꞌo ni, si tsaa ñaꞌan tiꞌ nten chaꞌ wa ndyuꞌu ayman kanꞌ xiyaꞌ, tlyu la chaꞌ kwiñi ka si xñi neꞌ chaꞌ kanꞌ.

65 Loꞌo mxkwen Pilato ꞌin neꞌ nu lka ndloo kanꞌ bra kanꞌ:

―Ndiya sndaru ꞌwan ―ndukwin Pilato―. Yaa lya wan loꞌo sndaru kanꞌ, chaꞌ tukunꞌ suꞌwe wan tuꞌwa kwaa kanꞌ sa ñaꞌan nu nchka tiꞌ wan, ti ykwiꞌ ti wan.

66 Mdoꞌo neꞌ nu lka ndloo bra kanꞌ, ndyaa neꞌ loꞌo ska ta sndaru ꞌin neꞌ, mdukunꞌ tsaa neꞌ tuꞌwa kwaa kanꞌ loꞌo ska lo kiñaꞌ tla nu yuꞌwi sello ꞌin neꞌ, chaꞌ ja kulo ꞌa nten kee tlyu nu nchkunꞌ tuꞌwa kwaa kanꞌ. Loꞌo ngulo neꞌ tñan ꞌin sndaru kanꞌ, chaꞌ kuꞌni yu kwan tuꞌwa kwaa bra kanꞌ.

<- SAN MATEO 26SAN MATEO 28 ->