80
Isarel ban nahanlah ratoumnae
Kathutkung: Asaph
1 Oe Isarel Tukhoumkung, tuhu patetlah
Joseph kahrawikung na thai pouh haw.
Nang Cherubim koe na kaawm e ang haw.
2 Ephraim, Benjamin, hoi Manasseh hmalah
na thaonae hah hroecoe nateh,
tho nateh, na rungngang haw.
3 Oe Cathut, na roung sak haw,
na minhmai hah ang sak nateh,
rungngang lah ka o awh han.
4 Oe ransahu Cathut BAWIPA,
na taminaw ratoumnae taranlahoi
bangkong na lungkhuek.
5 Mitphi rawca hoi na kawk teh,
mitphi hah ka boum lah na pânei.
6 Imrinaw ni yue hanelah na o sak teh,
ka tarannaw ni na panuikhai awh.
7 Oe Cathut, na roung sak haw,
na minhmai hah ang sak nateh,
rungngang lah ka o awh han.
Oe ransabawi Cathut na roung sak haw.
Na minhmai hah ang sak nateh, rungngang lah ka o han.
8 Izip hoi misurkung na la teh,
Jentelnaw na pâlei teh na ung.
9 Ahni hane hmuen na hmoun pouh.
Kadung poung lah tangpha na payang teh
ram pueng koung akawi.
10 Mon hah a tâhlip hoi a ramuk teh,
a kang teh kalen e sidar patetlah ao.
11 A kangnaw ni talîpui a pha teh,
a dawn teh tuipui koe a pha.
12 Lam dawk kacetnaw pueng ni,
a paw a khi awh nahanelah,
Bangkongmaw tumdumnae rapan hah a raphoe awh.
13 Ratu thung e pangan ni a hre teh,
kahrawng sarang ni a ca awh.
14 Oe ransabawi Cathut, ka kâhei.
Bout ban nateh, kalvan hoi hete misurkung hah,
khen nateh, ring haw.
15 Aranglae kut hoi na ung teh,
nang hanlah thao sak e
cakang misur patetlah ao han.
16 Hmai dawk pâeng lah ao teh, tâtueng lah ao.
Mei hoi mei kâhmo lah na yue e hah,
khang thai laipalah koung a kahma awh.
17 Aranglae kut dawk kaawm e tami,
nang hanelah thao sak e tami capa lathueng vah,
na kut hah awm lawiseh.
18 Hottelah pawiteh, nang koehoi kamlang awh mahoeh.
Na hring sak haw, na min ka kaw han.
19 Oe Cathut, na roung sak haw,
na minhmai hah ang sak nateh,
rungngang lah ka o awh han.
Oe ransahu Cathut na roung sak haw.