6
Lawkkam e taki a tho
1 Ka capa, na hui hanelah lawk na kam teh,
ayâ alouk hoi na kut na tambei pawiteh,
2 na dei e lawk dawk letlang na kâman toe.
Na dei e lawk hoi la lah na o toe.
3 Hatnavah, ka capa, hettelah namahoima na kârungngang han.
Bangtelamaw na hui kut dawk na pha toung dawkvah,
kârahnoumnae lahoi cet nateh, kâhet lah a.
4 Ip hanh, ngam takhai hanh.
5 Moi ka me e koehoi sakhi ni a yawng takhai e patetlah,
yawng takhai haw, tangkam dawk hoi
kahlout e tava patetlah kamleng takhai haw.
6 Nange tami ka pangak, lungkhi koe cet nateh,
a oangnae lahoi lungangnae kamtu haw.
7 Ahnimouh teh, kahrawikung, karipkung,
kaukkung, tawn awh hoeh eiteh,
8 kawmpoi vah rawca a pâtung awh teh,
canga tue nah rawca a pâtung awh.
9 Oe, tami ka pangak, nâtotouh maw na i han.
Nâtuek maw na kâhlaw han.
10 Ka ip ei haw pawiteh, dongdeng ka yan ei haw pawiteh,
kut kâtapam hoi dongdeng kâhat ei haw pawiteh, na ti lahun nah,
11 mathoenae ni karum kâva e patetlah vaitalahoi na tho sin vaiteh,
voutthoupnae ni kutdaw patetlah na tho sin han.
12 Tami cungkeihoeh e, tami kahawihoehe teh,
tamthoe hoi a kâhlai.
13 A mit a kaluek teh, a khok hoi mitnout a poe teh,
a kutdawn hoi a takhi teh a pâtu.
14 A lungpouk a longkawi teh, pout laipalah,
hawihoehnae dueng a pouk teh, kâyuenae cati doeh ouk a tu.
15 Hatdawkvah, kahmakatanae ni vaitalahoi a tho sin han.
Vaitalahoi damthaihoehnae kahmakatanae a kâhmo han.
16 Hete hno taruk touh heh, BAWIPA ni a hmuhma.
Bokheiyah, a panuet e hno sari touh a pha.
17 Kâoupnae mit, laithoe ka deinae lai,
yon ka tawn hoeh e tami theinae kut,
18 Hawihoehnae meng ka pouk e lungthin,
kahawihoehe sak nahanelah a hue ka rang e khok,
19 Laithoe ouk ka dei e kapanuekkhaikung kaphawk hoi,
hmaunawngha rahak kâpohoehnae cati ka patuekungnaw doeh .
Uicuknae kâhruetcuet poenae
20 Ka capa, na pa e kâpoelawk hah tarawi nateh,
na manu e kâlawk hah cettakhai hanh.
21 Na lungthung pâkuem nateh,
na lahuen dawk awi haw.
22 Alouklah na cei toteh, hote kâlawk ni na hrawi han,
na i navah na ring vaiteh, na kâhlaw toteh, na pato han.
23 Bangtelah tetpawiteh, kâpoe e teh,
hmaiim lah ao teh, kâlawk teh angnae lah ao.
Cingthuilasak e teh hringnae lamthung doeh.
24 Napui kathout hoi pasawtpanepnae koehoi
na hlout sak han.
25 Na lungthin hoi a meihawinae nôe hanh lah a,
a mit padainae ni na man hanh naseh.
26 Bangkongtetpawiteh, kâyawt e napui kecu dawk,
tongpatang heh vaiyei tangen lah a coung teh,
ayâ yu ka yonkhai e ni, ka sungren e a hringnae hah a raphoe.
27 Tami ni a kho e angki kang laipalah
hmaisaan a yawm thai han na maw.
28 Tami ni a khok kang laipalah,
hmaisaan van a cei thai han na maw.
29 Hot patetvanlah, a imri yu ka ipkhai e tami hai hot patetlah doeh ao.
Ayâ yu ka ipkhai e tami teh, yonnae hoi hlout hoeh.
30 A vonhlam dawk tami ni parawt pawiteh,
hote tamru teh tami ni pacekpahlek hoeh.
31 Hmu lah awm pawiteh, let sari touh hoi a patho roeroe hanelah ao.
A im dawk kaawm e hno pueng a rawng hanelah ao.
32 Ayâ yu hoi ka uicuk e tami pueng teh,
panuenae ka tawn hoeh e tami doeh.
Ama hringnae ka raphoekung lah ao.
33 Hmâtan cat vaiteh, min mathoe a kâhmo han.
A kayanae teh roum thai mahoeh.
34 Bangkongtetpawiteh, dipmanae ni
vanaw puenghoi a lung ouk a khuek sak.
Moipathungnae hnin navah hlout thai mahoeh
35 Rawng e hno nâyittouh hai banglah noutna mahoeh.