27
1 Tangtho e hnin hanlah kâoup hanh,
bangkongtetpawiteh bangmaw a tâcokhai han tie na panuek hoeh.
2 Namahoima laipalah ayâ ni na pholen naseh,
nama e pahni ni laipalah alouke ni na pholen naseh.
3 Talung hai a ri teh sadi hai a ri,
hatei tamipathu lungkhueknae teh hotnaw hlak a ri hnawn.
4 Lungkhueknae teh a mathoe,
lungphuennae teh a matheng,
hatei utnae teh apinimaw a khang thai han.
5 Hro e lungpatawnae hlak teh
hmantang yue e ahawihnawn.
6 Hmâ na ka paca e hui teh yuem a kamcu,
hatei taran ni na paco e teh dumyennae doeh.
7 A von ka paha tangcoung e ni teh khoipha patenghai
ngai mahoeh toe,
hatei a von ka hlam e tami hanelah teh kakhat e patenghai a radip.
8 Ma e imlaw ka palum ngai hoeh e teh,
tava a tabu dawk kaawm ngai hoeh e hoi a kâvan.
9 Satui hoi hmuitui ni lungthin a konawm sak teh,
hui kahawi ni pouknae na poe e ni hringnae konawm sak.
10 Na pa e hui hoi nama e hui kapek hanh,
runae na kâhmo navah na hmaunawngha im kuekluek cet hanh,
ahlanae koe e na hmaunawngha hlak teh
a hnainae koe e na hui a hawihnawn.
11 Na ka pacekpahlek e ka pathung thai nahanlah ka capa,
lungang haw, ka lungthin konawm sak haw.
12 Tamilungkaang ni thoenae hah sut a hmu teh a kâhro,
kamawngrame ni teh a kâphumsin teh rek e lah ouk ao.
13 Tamitavan hanelah amahkhankung teh
a angki amahkhan nahanelah la pouh lah ao vaiteh
napui koe poe naseh.
14 Amom a thaw teh kacaipounglah a hui yawhawi ka poe e teh,
thoebonae lah pouk pouh lah ao han.
15 Lai pou ka roe e yu teh,
Puenghoi khonan hnin e khoramei hoi a kâvan.
16 Hote napui ka pâkuem e teh, kahlî ka pâkuem niteh,
aranglae kut dawk satui kasum e hoi a kâvan.
17 Sum teh sum hoi doeh letlang hran sak thai,
hot patetlah tami ni a hui e a minhmai ouk a pan sak.
18 Thaibunglung kung ka tawn e pueng ni thaibunglung paw a ca han,
hot patetlah a bawi e thaw ka tawk e teh bari lah ao han.
19 Tui dawk coungnae a kamnue,
hot patetlah tami lungthin ni tami a kamnue sak.
20 Sheol hoi rawkkahmanae teh khout boihoeh,
hot patetlah tami e mit ni a khout tie tawn boihoeh.
21 Sôlêinae manang teh ngun hanelah,
takhuenhmai teh sui hanelah ao.
Tami teh oup e lahoi a bawilennae panue lah ao.
22 Tamipathu teh sumdawk cakang hoi
mek ka phawm nakunghai a pathunae ni cettakhai pawm mahoeh.
23 Na tuhu kong panue nahanlah panki loe,
na saringhu hah kahawicalah a kountouk.
24 Bangkongtetpawiteh, tawntanae heh a yungyoe kangning hoeh,
hoehpawiteh bawilukhung heh se pueng dawk kangning hoeh.
25 Phonaw hai a pâw, catinaw hai a pâw,
law e a pawnaw hai khue lah ao.
26 Tunaw ni na khohna hane
hmaenaw ni lawhmuen ran nahane ouk a thokhai.
27 Nang ni na ca hane, imthungnaw ca hane,