19
1 A lawk ka longkawi e tamipathu hlak,
mathoe laihoi yuemkamcu hringnae ahawihnawn.
2 Panuenae tawn laipalah hringnae hai hawi hoeh,
a khok a hue ka rang e hai a payon thai.
3 A pathunae ni lamthung a payon sak teh,
a lungthung hoi BAWIPA ouk a taran.
4 Hnopai ni huiko moi a sak,
hatei tamimathoe teh a hui ni a ceitakhai.
5 Ka panuekkhaikung kaphawk teh rek laipalah tâcawt mahoeh,
laithoe ka dei e hai hlout mahoeh.
6 Tami kapap ni bawi e lungyouk hanelah a kâcai awh,
poehno ka poe e tami hai tami pueng ni a kamyawngkhai.
7 Tamimathoe teh a hmaunawngha pueng ni hai a hmuhma,
a huinaw natawng teh ahlanae koe doeh hoe ao awh,
lawkkanem lahoi a pâlei ei nakunghai hoe a yawng takhai awh.
8 Lungangnae ka hmawt e ni hringnae a lungpataw teh,
thaipanueknae ka pâkuem e ni hnokahawi a hmu han.
9 Ka panuekkhaikung kaphawk teh rek laipalah tâcawt mahoeh,
laithoe ka dei e hai a rawk han.
10 Hringnawmnae heh tamipathunaw hanelah kamcu hoeh,
san ni khobawi a uk e heh hoe kamcu hoeh.
11 Poukpanueknae ka tawn e ni a lungsaw sak teh,
kâtapoenae ka pahnim pouh e teh ama ka bawilen sakkung doeh.
12 Siangpahrang lungkhuek e teh sendek ka huk e patetlah ao,
hatei a ngaikhainae teh hram dawk
ka bawt e tadamtui patetlah ao.
13 Capa ka pathu e teh a na pa hanelah
thoenae kaphawtkung lah ao teh,
lai ka roe e yu teh tui ka yu e patetlah ao.
14 Im hoi tawntanae teh napanaw koehoi coe e râw doeh,
hatei yu kahawi teh BAWIPA koehoi e doeh.
15 Thathoenae ni ihmu a tho sak,
ka pangak e teh a vonhlam han.
16 Kâpoelawk ka tarawi e teh a hringnae a ring,
hatei ka pahnawt e teh a due han.
17 Tamimathoe ka pahren e teh BAWIPA koe a cawi sak toe,
a poe tangcoung e hno hah bout poe lah ao han.
18 Ngaihawinae ao navah na capa hah yue haw,
a kahma nahanelah pouk hanh.
19 A lung puenghoi ka khuek sak e ni reknae a kâhmo han,
bangkongtetpawiteh, na rungngang nakunghai
boutbout rungngang a ngai han doeh.
20 Kâpankhainae hah thai haw, cangkhainae hah dâw haw,
bangkongtetpawiteh, hmalah na lung a ang han.
21 Tami e lungthin ni hno moikapap a kâcai,
hatei BAWIPA e khokhangnae dueng doeh kangning han.
22 Tami ni a ngai poung e teh pahrennae hah doeh,
laithoe dei e hlak mathoe e ahawihnawn.
23 BAWIPA takinae ni hringnae koe lah a ceikhai,
hote hringnae ka tawn e teh a lung a kuep vaiteh,
hnokathout ni thosin mahoeh.
24 Tami ka pangak ni a kut a kâyap teh
rawca a kâtu hane boehai ngai hoeh.
25 Ka dudam e tami hah hem haw,
kamawngrame tami teh a kâhlaw yawkaw han doeh,
a lungkaang e tami hah yue haw patopatang han
26 Na pa roedeng ka poe ni teh manu ka hrek e teh,
yeiraiponae hoi min mathoenae ka phawt e capa doeh.
27 Ka capa cangkhainae thai e heh na kâhat payon pawiteh,
lungangnae lamthung na phen han doeh.
28 Cungkeihoehe kapanuekkhaikung ni
lawkcengnae kalan a dudam teh,
tamikathout e pahni ni payonpakainae a payawp.
29 Lawkcengnae heh kadudamnaw hanelah hruek e lah ao teh,