1 BAWIPA ni Mosi hah a pato teh, 2 Isarelnaw hah lawkthui nateh, hetheh Kanaan ram na pha awh toteh nangmouh ni na pang awh hane Kanaan ramri doeh atipouh.

3 Akalah nangmae khori teh, Zin kahrawngum hoi Edom ram yunglam han, akalae khori teh palawi talî apoutnae koehoi Kanîtholae han. 4 Hahoi nangmae ramri teh, Akrabbim takhangnae a rahim hoi a lawngven vaiteh, Zin pou a rakan vaiteh, Kadeshbarnea a rahim totouh han, hahoi Hazaraddar lah cet vaiteh, Azmon vah pou a cei tâphai han. 5 Hote ramri teh Azmon Izip palang totouh lawngven vaiteh, tuipuipaling koe a pout han.

6 Kanîloumlah, tuipui hah khori lah na coe awh han, hetheh kanîloumlae na ramri lah ao han. 7 Hahoi hetheh atunglae na khori lah ao han, tuipui koehoi Hor mon pâum lahoi na sak han. 8 Hor mon koehoi Hamath kâennae koe totouh na sak awh han, haw hoi khori a tâconae teh Zedad koe han. 9 Khori teh, Ziphron pou tapoung vaiteh, Hazarenan vah a pout han, hetheh atunglae na ramri lah ao han.

10 Hahoi Kanîtholae na khori teh, Hazarenan hoi Shepham totouh na sak awh han. 11 Na khori teh Shepham hoi Riblah hoi Ain kanîtholah pou a cathuk vaiteh, haw hoi paloupalou cathuk vaiteh, Khinnereth kanîtho talîpui rai koelah a pha han. 12 Khori teh Jordan lah cathuk vaiteh, palawi talî koe apout han, hetheh na khori lah ao tet pouh telah a ti.

13 Hahoi teh, Mosi ni Isarelnaw hah kâ a poe teh, hetheh BAWIPA ni miphun tako touh hoi a tangawn poe hanelah, cungpam rayu hoi na coe awh hane ram doeh. 14 Bangkongtetpawiteh, Reuben miphun catounnaw ni a imthung lahoi, Gad miphun catounnaw ni a imthung lahoi, Manasseh miphun tangawn ni a imthung lahoi a coe awh hane teh be a coe awh toe. 15 Hete miphun kahni touh hoi tangawn ni a coe awh hane teh, kanîtholah Jeriko tengpam, Jordan palang kanîtholah a coe awh toe telah a ti.

16 BAWIPA ni Mosi a pato teh, 17 hetnaw heh na coe awh hane ram nangmouh rahak vah kareikung min teh vaihma Eleazar hoi Nun capa Joshua doeh. 18 Hahoi na coe awh hane ram kareikung lah miphun tangkuem dawk hoi khobawi buet touh rip na rawi awh han ati pouh. 19 A minnaw teh hetnaw hah doeh.

Judah catoun dawk hoi Jephunneh capa Kaleb,

20 Simeoncanaw dawk hoi Ammihud capa Samuel,

21 Benjaminnaw dawk hoi Khislon capa Elidad,

22 Dan canaw dawk hoi khobawi Jogli capa Bukki,

23 Joseph capa Manasseh canaw dawk hoi Ephod capa khobawi Hanniel,

24 Ephraimcanaw e catoun dawk hoi Shiphtan capa khobawi Kemuel,

25 Zebuluncanaw dawk hoi Parnach capa khobawi Elizaphan,

26 Issakharnaw dawk hoi Azzan capa khobawi Azzan,

27 Asher canaw dawk hoi Shelomi capa khobawi Ahihud,

28 Naphtalinaw dawk hoi Ammihud capa khobawi Pedahel, han atipouh.

29 Hetnaw heh Kanaan ram e Isarel catounnaw ram coe hane kareikung lah BAWIPA ni a poe e naw doeh.

<- MILU PAREINAE 33MILU PAREINAE 35 ->