1 Tuikamuem a tho hnukkhu, Noah capa Shem, Ham hoi Japheth koehoi patuen a khe e casaknaw teh a rahim lae patetlah doeh. 2 Japheth e capanaw teh Gomer, Magog, Madai, Javan, Tubal, Meshek hoi Tiras. 3 Gomer e capanaw teh, Ashkenaz, Riphath hoi Togarmah. 4 Javan e capanaw teh, Elishah, Tarshish, Kittim hoi Dodarim. 5 Ahnimanaw teh miphun tangkuem, ram louk hmuennaw hah amamae ram, amamae lawk, amamae imthung lahoi amamae ram dawk lengkaleng kâkapek awh. 6 Hahoi, Ham e capanaw teh Kush, Izip, Put hoi Kanaan, 7 Kush e capanaw teh Seba, Havilah, Sabtah, Raamah hoi hmaloe pasuek a thakasaipoung e lah ao. 8 Hahoi Kush ni Nimrod a khe teh, ahni teh talai van dawk hmaloe pasuek a thakasaipoung e lah ao. 9 Ahni teh BAWIPA hmalah thakasaipounge lah ao. Hatdawkvah, BAWIPA hmalah thaonae hoi moikathaipounge Nimrod patetlah ouk ati awh. 10 A uknaeram a kamtawngnae teh, Babilon, Erek, Akkad hoi Shinar ram e Kalneh. 11 Hote ram koehoi Assiria ram lah a cei teh Nineveh, Rehobothir aka lahoi, 12 Nineveh hoi Kalah rahak kaawm e Resen khopui kalenpounge kho hmuen hai a thawng. 13 Izip e capanaw teh Ludim, Anamim, Lehabim, Naphtuhim, 14 Pathrusim (philistin hoi Kaphtorimnaw a tâconae) hoi Kapthorim, 15 Kanaan e a camin teh Sidon, hahoi Heth, 16 hahoi Jebusit tami Amor tami, Girgashite tami, 17 Hiv tami, Arkit tami, Sin tami, 18 Arvad tami, Zemarit tami hoi Hamath taminaw hah a khe. Hathnukkhu, Kanaan e ca catounnaw teh a kampek awh. 19 Kanaannaw e a ramri Sidon hoi Gerar koelae Gaza totouh. Hahoi Sodom, Gomorrah, Admah, hoi Zeboiim kho a tapoung teh Lasha kho totouh a pha. 20 Hete miphunnaw teh Ham e ca catounnaw doeh. Ahnimanaw teh amamae imthung lahoi, lawk lahoi, kho hmuen lahoi, amamae ram thung kho lengkaleng a sak awh. 21 Japheth e nawngha, Hebru miphunnaw e a na pa Shem haiyah canaw a khe. 22 Shem e capanaw teh Elam, Assyria, Arphaxad, Lud hoi Aram. 23 Aram e capanaw teh Uz, Hul, Gether hoi Mash. 24 Arphaxad e capa teh Shelah, Shelah e capa teh Eber, 25 Eber ni capa kahni touh a khe. Buet touh e min teh Peleg. Bangkongtetpawiteh, ahnie a se navah talai a kârei awh. A nawngha e min teh Joktan. 26 Joktan e a capanaw teh, Almodad, Sheleph, Hazarmaveth, Jerah, 27 Hadoram, Uzal, Diklah, 28 Obal, Abimael, Sheba, 29 Ophir, Havilah, hoi Jobab, 30 Kho a saknae hmuen teh Mesha kho koehoi kanîtholah Sephar mon totouh a pha. 31 Hete taminaw teh Shem e capanaw lah ao teh, amamae imthung lahoi, lawk, kho ram tangkuem dawk kho a sak awh. 32 A lathueng lae khenae hoi miphunnaw teh, Noah e imthung hoi a capanaw ni patuen a khe e catounnaw e kong doeh. Ahnimanaw teh tuikamuem a tho hnukkhu kho ram alouklah a kampek awh.

<- KAMTAWNGNAE 9KAMTAWNGNAE 11 ->