PHUNGDEIKUNG 11

1 Na rawca hah tui dawk tâkhawng haw,

atueng moi a ro hnukkhu bout na hmu han.

2 Tami sari touh dueng na hoeh, tami taroe touh hah rei lah.

Talai dawk bangmaw kaawm han tie na panuek hoeh.

3 Tâmainaw teh khotui hoi a kawi torei teh talai dawk kho a rak.

Thingkung ni akalah, atunglah a rawp nakunghai thoseh,

A rawpnae hmuen dawk roup ao.

4 Kahlî dueng ka khen e tami ni cati kahei hoeh,

Tâmainaw banglahai ka noutna hoeh e ni hai canga mahoeh.

5 Kahlî a cei nahane lam hai thoseh, camo ka neng e napui e von dawk a hrunaw ni bangtelamaw a roung tie hai thoseh, panue thai hoeh e patetlah a cawngca pueng kasakkung Cathut ni a tawksak e panuek thai hoeh.

6 Amom lae atueng dawk cati kahei nateh, tangmin lahai kahei laipalah awm hanh. Bangkongtetpawiteh, bangpatet hah maw aphu o han tie hai thoseh, hot roi teh kâvan e lah aphu ao han tie hai thoseh, panuek thai hoeh.

7 Atangcalah, angnae teh a radip, kanî raeng a hmu nah lunghawi han kawi lah ao.

8 Hatnavah tami ni a hringyung asaw teh a lunghawi nakunghai, hmonae tueng hah pouk naseh, hote atueng teh moi a ro han. Kaawm tangcoung e hnonaw teh a hrawnghrang la doeh be ao.

9 Thoundoun nang, na naw lahun nah nawmnae sak awh haw, na nawnae tueng nah lunghawinae tawn haw. Ma ngainae lamthung hoi, na panuenae koe lah dawn haw, hat navah, hote hnonaw pueng Cathut ni lawkceng vaiteh, nang yon na pen han tie panuek awh.

10 Hatdawkvah, lungreithainae hoi na roedengnae hah takhoe haw, camonae hoi thoundounnae hai a hrawnghrang doeh.

<- PHUNGDEIKUNG 10 PHUNGDEIKUNG 12 ->