Quityi nu nguscua San Lucas ñiꞌya̱ nu ngua chaꞌ jiꞌi̱ Jesús

Chaꞌcña nu nscua clyo

1 Cua quiñaꞌa̱ ñati̱ nguscua lo quityi ñiꞌya̱ nu ngua lcaa chaꞌ jiꞌi̱ Jesús nde su ndiꞌi̱ ya, quityi historia laca biꞌ. 2 Loꞌo juaꞌa̱ ntsuꞌu nguꞌ nu nguluꞌu chaꞌ biꞌ jiꞌna; nguꞌ biꞌ ni, cua naꞌa̱ nguꞌ chaꞌ biꞌ clyo, tya loꞌo nguxana Jesús nguaꞌni yu cña, loꞌo juaꞌa̱ ndyaa nguꞌ nchcuiꞌ nguꞌ chaꞌ jiꞌi̱ Jesús loꞌo lcaa ñati̱. 3 Biꞌ chaꞌ loꞌo naꞌ, ngulana tsa naꞌ ñiꞌya̱ ngua lcaa chaꞌ nu nteje tacui tya loꞌo nguxana chaꞌ biꞌ. Tsoꞌo ntiꞌ naꞌ si loꞌo naꞌ scua naꞌ lcaa chaꞌ biꞌ, chaꞌ tsaa slo nuꞌu̱, cusuꞌ Teófilo, 4 chaꞌ caca cuayáꞌ tiꞌ nuꞌu̱ tsoꞌo la lcaa chaꞌ nu nda nguꞌ loꞌo nuꞌu̱.

Ndyaa xca̱ jiꞌi̱ ycuiꞌ Ndyosi ca slo Zacarías nu caca sti Juan Bautista

5 Tyempo nu ngua rey Herodes cña, loꞌo ngua yu loo jiꞌi̱ nguꞌ loyuu su cuentya Judea, liꞌ ndiꞌi̱ sca sti joꞌó nu naa Zacarías. Biꞌ ndyaꞌa̱ loꞌo taju sti joꞌó nu ndu̱ cña su ngutu̱ jyoꞌo Abías nquichaꞌ. Elisabet naa clyoꞌo yu biꞌ, laca maꞌ la cuiꞌ ñati̱ tyaꞌa jiꞌi̱ jyoꞌo Aarón nu ngua sti joꞌó tya clyo la. 6 Liñi tsa nduꞌni tyucuaa nguꞌ biꞌ cuentya jiꞌi̱ ycuiꞌ Ndyosi, ndaquiyaꞌ nguꞌ lcaa cña jiꞌi̱ ycuiꞌ Ni; ndaquiyaꞌ tsa nguꞌ lcaa chaꞌ nu cua nda Ni loꞌo ñati̱ cua saꞌni la, juaꞌa̱ ná tucui nchcuiꞌ chaꞌ cuxi jiꞌi̱ nguꞌ biꞌ. 7 Pana ná ntsuꞌu ni sca sñiꞌ nguꞌ. Ná ndyiji sñiꞌ Elisabet, loꞌo juaꞌa̱ ngusuꞌ tsa juani.

8 Cua ndyalaa semana jiꞌi̱ taju sti joꞌó loꞌo ngaꞌa̱ Zacarías, chaꞌ cuaꞌni nguꞌ cña neꞌ laa. 9 Ndiꞌya̱ nguaꞌni sti joꞌó nu ngua liꞌ: lcaa taju nguꞌ ngusubi nguꞌ jiꞌi̱ sca tyaꞌa sti joꞌó nguꞌ, chaꞌ sca ti yu taca tyatí̱ yu su tacati neꞌ laa tonu, chaꞌ taqui̱ yu yana joꞌó lo mesa ca biꞌ liꞌ. Loꞌo juani ndyanu cña biꞌ jiꞌi̱ ycuiꞌ Zacarías. 10 Hora nu ndyaqui̱ yana joꞌó biꞌ neꞌ laa, liꞌ ndyuꞌu tiꞌi̱ nguꞌ quichi̱ nde liyaꞌ ti, nchcuiꞌ tyaꞌna nguꞌ loꞌo ycuiꞌ Ndyosi. 11 Liꞌ nduꞌu tucua sca xca̱ jiꞌi̱ ycuiꞌ nu Xuꞌna na ca slo Zacarías su ndiꞌi̱ yu neꞌ laa, naꞌa̱ yu chaꞌ ndu̱ xca̱ biꞌ laꞌa tsuꞌ cui̱ slo mesa tacati su ndyaqui̱ yana joꞌó. 12 Loꞌo naꞌa̱ Zacarías jiꞌi̱ xca̱ biꞌ, ngaꞌaa jlo tiꞌ yu ñiꞌya̱ cuaꞌni yu, chaꞌ ndyutsi̱i̱ tsa yu jiꞌi̱. 13 Nchcuiꞌ xca̱ biꞌ loꞌo yu liꞌ:

―Ná cutsi̱i̱ nuꞌu̱ Zacarías ―nacui̱―. Cua ndyuna ycuiꞌ Ndyosi chaꞌ nu tyaꞌna tsa nchcuiꞌ nuꞌu̱ loꞌo Ni, biꞌ chaꞌ cala sca sñiꞌ Elisabet clyoꞌo nuꞌu̱. Juan caca naa yu, juaꞌa̱ caca xtañi nu sta nuꞌu̱ jiꞌi̱. 14 Chaa tsa tiꞌ caca tyiquee nuꞌu̱ loꞌo cua ngula nu piti biꞌ. Loꞌo juaꞌa̱, tsoꞌo tsa caca tyiquee quiñaꞌa̱ tsa ñati̱ loꞌo ñaꞌa̱ nguꞌ jiꞌi̱ nu piti biꞌ, 15 chaꞌ nu biꞌ caca sca ñati̱ tlyu nde loo ycuiꞌ Ndyosi. Ná coꞌo Juan biꞌ lcui ngatsi, loꞌo juaꞌa̱ ni sca lo lcui ná coꞌo yu. Tya hora nu cala yu, liꞌ tyanu Xtyiꞌi ycuiꞌ Ndyosi neꞌ cresiya jiꞌi̱ yu. 16 Cuaꞌni yu chaꞌ xaꞌ caca tsoꞌo cresiya jiꞌi̱ quiñaꞌa̱ tyaꞌa nguꞌ Israel, chaꞌ taquiyaꞌ nguꞌ jiꞌi̱ ycuiꞌ Ndyosi nu Xuꞌna nguꞌ. 17 La cuiꞌ xtyiꞌi nu ngutiꞌi̱ neꞌ cresiya jiꞌi̱ jyoꞌo Elías nu ndyaa loꞌo ycuiꞌ Ndyosi jiꞌi̱ tya saꞌni la, la cuiꞌ xtyiꞌi biꞌ caja jiꞌi̱ Juan juani. Ca nde loo la ca̱a̱ Juan chcuiꞌ loꞌo ñati̱, chaꞌ tyaalaꞌ tyiquee ñati̱, chaꞌ ngaꞌaa xu̱u̱ tyaꞌa nguꞌ loꞌo sñiꞌ nguꞌ. Liꞌ taca chaꞌa̱ lcaa chaꞌ nu ntsuꞌu tyiquee nguꞌ, chaꞌ taquiyaꞌ nguꞌ jiꞌi̱ lcaa chaꞌ nu liñi. Juaꞌa̱ chcuiꞌ Juan loꞌo nguꞌ chaꞌ cuaꞌni choꞌo nguꞌ tyiquee nguꞌ, chaꞌ tyajaꞌa̱ nguꞌ xñi nguꞌ chaꞌ jiꞌi̱ ycuiꞌ Ndyosi. Liꞌ ca̱a̱ ycuiꞌ Cristo.

18 Liꞌ nchcuane Zacarías jiꞌi̱ nu xca̱ biꞌ:

―¿Ñiꞌya̱ caca chaꞌ ca cuayáꞌ tiꞌ naꞌ si chañi ca chaꞌ biꞌ? Cusuꞌ tsa naꞌ, loꞌo juaꞌa̱ clyoꞌo naꞌ cusuꞌ tsa ―nacui̱ Zacarías jiꞌi̱ xca̱ biꞌ.

19 ―Gabriel naa naꞌ ―nacui̱ xca̱ jiꞌi̱ yu liꞌ―. Na ndu̱ ti naꞌ ca slo ycuiꞌ Ndyosi; biꞌ laca nu nda ꞌna lijya̱a̱ chaꞌ chcuiꞌ naꞌ loꞌo nuꞌu̱, chaꞌ ta naꞌ chaꞌ tsoꞌo re loꞌo nuꞌu̱. 20 Cuaꞌa̱ jyaca̱ nuꞌu̱ jnaꞌ juani: caca cuꞌu̱ nuꞌu̱ juani, chaꞌ ngaꞌaa caca chcuiꞌ nuꞌu̱ ñaꞌa̱ cuayáꞌ nu cala cubiꞌ biꞌ jinuꞌu̱; juaꞌa̱ caca jinuꞌu̱ xquiꞌya chaꞌ ná jlya tiꞌ nuꞌu̱ jnaꞌ. Chañi tyalaa tyempo biꞌ, liꞌ caca cuayáꞌ tiꞌ nuꞌu̱ chaꞌ chaꞌ liñi laca lcaa chaꞌ nu nchcuiꞌ naꞌ loꞌo nuꞌu̱ ―nacui̱ xca̱ biꞌ jiꞌi̱ Zacarías.

21 Tya ndiꞌi̱ nguꞌ quichi̱ toꞌ laa, ntajatya nguꞌ jiꞌi̱ nu Zacarías biꞌ ñaꞌa̱ cuayaꞌ nu tyuꞌu yu nde liyaꞌ; pana quiñaꞌa̱ tsa nclyacua tiꞌ nguꞌ ni chaꞌ tyiqueeꞌ tsa ngutuꞌu Zacarías nde neꞌ laa biꞌ. 22 Loꞌo nduꞌu Zacarías nde liyaꞌ, liꞌ ngaꞌaa ngua chcuiꞌ yu loꞌo nguꞌ. Ngua tii nguꞌ chaꞌ neꞌ laa nguluꞌuloo sca xee tlyu jiꞌi̱ yu nu nduꞌu ya̱a̱ ca slo ycuiꞌ Ndyosi. Liꞌ seꞌi̱ ti ndu̱ yu ndyuꞌni yaꞌ yu jiꞌi̱ nguꞌ, pana ndyanu cuꞌu̱ ti yu.

23 Loꞌo cua ndye tsa̱ loꞌo nguaꞌni Zacarías cña neꞌ laa, liꞌ nguxtyu̱u̱ yu ndyaa yu quichi̱ tyi yu. 24 Tiyaꞌ la liꞌ, ngua tii clyoꞌo yu, nu naa Elisabet ni, chaꞌ ngujui sñiꞌ maꞌ. Liꞌ cua ntsuꞌu cua caꞌyu coꞌ nu xcuiꞌ neꞌ niꞌi̱ ti ndyanu maꞌ. 25 Ndiꞌya̱ ngulacua tiꞌ maꞌ: “Ycuiꞌ Ndyosi nu Xuꞌna na laca nu nguaꞌni chaꞌ re cuentya jnaꞌ. Cua nguaꞌni Ni chaꞌ ngaꞌaa chcuiꞌ la ñati̱ chaꞌ cuxi jnaꞌ.”

Nchcuiꞌ xca̱ jiꞌi̱ ycuiꞌ Ndyosi loꞌo María chaꞌ cua cala ti Jesús

26 Loꞌo cua ntsuꞌu scuá coꞌ nu ndyaꞌa̱ tana Elisabet, liꞌ ngulo ycuiꞌ Ndyosi cña jiꞌi̱ sca xca̱ jiꞌi̱ Ni, chaꞌ tsaa ca quichi̱ Nazaret, sca quichi̱ nde loyuu su cuentya Galilea. Loꞌo nu xca̱ biꞌ ni, la cuiꞌ Gabriel laca biꞌ. 27 Nda ycuiꞌ Ndyosi jiꞌi̱ xca̱ biꞌ jiꞌi̱ Ni chaꞌ tsaa slo sca nu cunaꞌa̱ nu ntucua ycuiꞌ ti. Na cua ngüiñi chaꞌ jiꞌi̱ nu cunaꞌa̱ biꞌ, chaꞌ caja clyoꞌo loꞌo sca nu quiꞌyu nu naa José; David laca xtañi nu quiꞌyu biꞌ, sca ti xtañi yu loꞌo jyoꞌo cusuꞌ David nu ngutuꞌú saꞌni la. María naa nu cunaꞌa̱ nu ntucua ycuiꞌ ti biꞌ, loꞌo juaꞌa̱ la cuiꞌ tyaꞌa nu Elisabet biꞌ laca María. 28 Loꞌo ndyalaa xca̱ slo nu cunaꞌa̱ biꞌ, liꞌ nchcuiꞌ loꞌo:

―Tsoꞌo ti tyiꞌi̱ nuꞌu̱ ―nacui̱ xca̱ biꞌ jiꞌi̱―, tyacaꞌa tsa nuꞌu̱ jiꞌi̱ ycuiꞌ Ndyosi. Tsoꞌo ndiꞌi̱ Ni loꞌo nuꞌu̱ ―nacui̱―. Quiñaꞌa̱ tsa chaꞌ tsoꞌo nda ycuiꞌ Ndyosi jinuꞌu̱, masi ná nduꞌni Ni juaꞌa̱ loꞌo xaꞌ la nu cunaꞌa̱.

29 Cua naꞌa̱ María jiꞌi̱ xca̱ biꞌ. Loꞌo ndyuna María chaꞌ nu nchcuiꞌ yu, liꞌ ngulacua tsa tiꞌ ni chaꞌ laca nchcuiꞌ xca̱ biꞌ juaꞌa̱. Ndyutsi̱i̱ tsa liꞌ. 30 Xaꞌ nchcuiꞌ xca̱ biꞌ loꞌo nu cunaꞌa̱ cuañiꞌ biꞌ liꞌ:

―María ―nacui̱―, ná cutsi̱i̱ nuꞌu̱ chaꞌ cua nda ycuiꞌ Ndyosi sca chaꞌ tsoꞌo hi̱ ―nacui̱ xca̱ biꞌ jiꞌi̱―. 31 Caca tana nuꞌu̱, caja sñiꞌ nuꞌu̱; ñacui̱ nuꞌu̱ chaꞌ Jesús ca naa cubiꞌ nu caja jinuꞌu̱. 32 Caca yu biꞌ sca ñati̱ tlyu. Ñacui̱ nguꞌ jiꞌi̱ yu chaꞌ Sñiꞌ ycuiꞌ Ndyosi nu Xuꞌna na nu tlyu la caca yu. La cuiꞌ tyaꞌa cña tlyu nu nguaꞌni jyoꞌo rey David, nu tyaꞌa yu nu ya̱a̱ chalyuu cua saꞌni la, biꞌ cña laca nu ta ycuiꞌ nu Xuꞌna na jiꞌi̱ Jesús, 33 chaꞌ lcaa tsa̱ ná tye chaꞌ caca yu loo jiꞌi̱ lcaa tyaꞌa nguꞌ Israel; juaꞌa̱ ná tye chaꞌ culo yu cña jiꞌi̱ lcaa ñati̱ chalyuu.

34 Liꞌ nchcuiꞌ María loꞌo xca̱ biꞌ:

―¿Ñiꞌya̱ caca re lacua, chaꞌ nu bilya caja clyoꞌo naꞌ? ―nacui̱ María jiꞌi̱ xca̱ biꞌ.

35 Liꞌ nda xca̱ sca chaꞌ loꞌo:

―Ta ycuiꞌ Ndyosi Xtyiꞌi Ni chaꞌ tya̱a̱ su ndiꞌi̱ nuꞌu̱, chaꞌ tyuꞌú tyucui ñaꞌa̱ nuꞌu̱; sca chaꞌ tlyu nu cuaꞌni ycuiꞌ Ndyosi nu laca loo caca chaꞌ biꞌ. Nu loꞌo cala sñiꞌ nuꞌu̱, sca ñati̱ nu lubii tsa cuentya jiꞌi̱ ycuiꞌ Ndyosi caca cubiꞌ nu cala biꞌ, la cuiꞌ biꞌ laca nu caca naa Sñiꞌ ycuiꞌ Ndyosi. 36 Loꞌo chaca chaꞌ chcui̱ꞌ loꞌo nuꞌu̱ ―nacui̱ xca̱ jiꞌi̱―, chaꞌ loꞌo Elisabet tyaꞌa cusuꞌ nuꞌu̱ nguxana ngua tana, masi cusuꞌ tsa maꞌ. Tya tsubiꞌ la nacui̱ nguꞌ chaꞌ ná ndyiji sñiꞌ maꞌ tsiyaꞌ ti, loꞌo juani cua ndyaꞌa scuá coꞌ ntsuꞌu sñiꞌ maꞌ. 37 Ni sca chaꞌ ná tucui ntiꞌ ycuiꞌ Ndyosi.

38 Liꞌ nacui̱ María jiꞌi̱ xca̱ biꞌ ndiꞌya̱:

―Si nacui̱ ycuiꞌ Ndyosi chaꞌ cala sñiꞌ naꞌ juaꞌa̱, cua laca chaꞌ liꞌ. Tsoꞌo ntsuꞌu tyiquee naꞌ cuaꞌni naꞌ cña jiꞌi̱ Ni, lcaa ñaꞌa̱ cña nu culo ycuiꞌ Ndyosi nu Xuꞌna na ꞌna ―nacui̱ María.

Liꞌ nduꞌu xca̱ biꞌ, ndyaa.

Ndyaa María nde slo Elisabet tyaꞌa

39 Liꞌ nduꞌu María ndyaa yala ti nde sca quichi̱ nu ndiꞌi̱ laja caꞌya Judea. 40 Liꞌ ndyalaa María toꞌ tyi Zacarías, nguxana nchcuiꞌ loꞌo Elisabet; 41 pana laja loꞌo ndyuna Elisabet chaꞌ nu nchcuiꞌ María loꞌo, hora ti ngüiña xi cubiꞌ nu ntsuꞌu neꞌ maꞌ. Liꞌ ngutsaꞌá̱ tyiquee Elisabet ntsuꞌu Xtyiꞌi ycuiꞌ Ndyosi, 42 biꞌ chaꞌ cui̱i̱ tsa nchcuiꞌ maꞌ loꞌo María liꞌ:

―Tlyu tsa chaꞌ tsoꞌo nu nda ycuiꞌ Ndyosi jinuꞌu̱ ―nacui̱ Elisabet jiꞌi̱ María―. Ná cuaꞌni Ni juaꞌa̱ loꞌo xaꞌ la nu cunaꞌa̱. Loꞌo juaꞌa̱ tyacaꞌa tsa cubiꞌ nu ntsuꞌu jinuꞌu̱ cuentya jiꞌi̱ ycuiꞌ Ndyosi ―nacui̱―. 43 ¿Tilaca ta laca naꞌ chaꞌ cua ndyalaa nuꞌu̱ nu caca xtyaꞌa̱ nu Xuꞌna na ca slo naꞌ? 44 Chañi chaꞌ nu nda naꞌ loꞌo nuꞌu̱, chaꞌ cua ngüiña xi cubiꞌ nu ntsuꞌu neꞌ naꞌ chaꞌ chaa tiꞌ yu laja loꞌo ndyuna naꞌ chaꞌ nu nchcuiꞌ nuꞌu̱ loꞌo naꞌ. 45 Tsoꞌo tsa tyiquee nuꞌu̱ chaꞌ jlya tiꞌ nuꞌu̱ chaꞌ jiꞌi̱ ycuiꞌ Ndyosi, chaꞌ cuaꞌni Ni lcaa chaꞌ nu nda ycuiꞌ Ni loꞌo nuꞌu̱.

Juaꞌa̱ nacui̱ Elisabet jiꞌi̱ María. 46 Liꞌ nguaꞌni tlyu María jiꞌi̱ ycuiꞌ Ndyosi:

Tyucui tyiquee naꞌ cuaꞌni tlyu naꞌ jiꞌi̱ ycuiꞌ nu Xuꞌna naꞌ, nacui̱ María.

47 Ca chaa tiꞌ cresiya jnaꞌ xquiꞌya ycuiꞌ Ndyosi nu nguaꞌni lyaá jnaꞌ.

48 Ndube tsa tiꞌ ycuiꞌ Ni ꞌna chaꞌ laca naꞌ msu jiꞌi̱ Ni, masi sca ñati̱ tiꞌi laca naꞌ.

Su nguxana ti juani, ñacui̱ lcaa ñati̱ nu lijya̱ chalyuu nde loo la chaꞌ tsoꞌo tsa ntsuꞌu tyiquee naꞌ.

49 Tlyu tsa cña nu nduꞌni ycuiꞌ Ndyosi, loꞌo juaꞌa̱ tlyu tsa chaꞌ nu ndyuꞌni Ni loꞌo naꞌ;

lubii tsa ycuiꞌ Ndyosi, nacui̱ María.

50 Ná culayaꞌ ycuiꞌ Ndyosi jiꞌi̱ ñati̱ nu taquiyaꞌ jiꞌi̱ chaꞌ nu nchcuiꞌ Ni;

ñaꞌa̱ cuayáꞌ lcaa tyempo lijya̱ ñati̱ tyiꞌi̱ chalyuu, chañi chaꞌ cuaꞌni tyaꞌna tiꞌ Ni jiꞌi̱ nguꞌ biꞌ.

51 Quiñaꞌa̱ tsa cña tlyu cua nguaꞌni Ni.

Cua nguaꞌni tye Ni chaꞌ jiꞌi̱ ñati̱ nu xcuiꞌ chaꞌ tyixi nduꞌni nguꞌ loꞌo tyaꞌa nguꞌ.

52 Cua nguloꞌo Ni jiꞌi̱ ñati̱ tlyu ca su ntucua tlyu nguꞌ ntiꞌ nguꞌ,

cua nda Ni su tsoꞌo la chaꞌ tyiꞌi̱ nguꞌ tiꞌi, nacui̱ María.

53 Cua nguaꞌni Ni chaꞌ tyaalaꞌ tiꞌ ñati̱ nu lyiji tsa chaꞌ tsoꞌo jiꞌi̱,

pana ngulo Ni cña chaꞌ ngaꞌaa caja la chaꞌ culiyaꞌ jiꞌi̱ nguꞌ culiyaꞌ.

54-55 Nguxtyucua tsa Ni jiꞌi̱ lcaa nguꞌ Israel tyaꞌa na, chaꞌ laca na msu jiꞌi̱ ycuiꞌ Ni;

tsoꞌo tsa ngüiñi chaꞌ jiꞌi̱ Ni loꞌo jyoꞌo cusuꞌ jiꞌna.

Ná ngujlyaa tiꞌ ycuiꞌ Ndyosi jiꞌna, ñati̱ tyaꞌa jiꞌi̱ jyoꞌo Abraham na; xcuiꞌ ngua tyaꞌna tiꞌ Ni jiꞌi̱ nguꞌ tyaꞌa na.

Loꞌo ñaꞌa̱ ti tya cuaꞌni tyaꞌna tiꞌ Ni jiꞌna loꞌo jiꞌi̱ sñiꞌ na tyucui tyempo nde loo la.

56 Tya xna coꞌ ndyanu María slo Elisabet, liꞌ nduꞌu ñaa nde toꞌ tyi.

Loꞌo ngula Juan Bautista

57 Cua ndyalaa tsa̱ nu cala sñiꞌ Elisabet. Quiꞌyu cubiꞌ nu ngula jiꞌi̱. 58 Loꞌo ndyuna nguꞌ chaꞌ ngula sñiꞌ maꞌ cusuꞌ biꞌ, tsoꞌo tsa ntsuꞌu tyiquee lcaa nguꞌ tyaꞌa, loꞌo nguꞌ nu ngaꞌa̱ cacua ti. Liꞌ ndyalaa nguꞌ slo chaꞌ ta nguꞌ chaꞌ loꞌo maꞌ cusuꞌ biꞌ, chaꞌ tsoꞌo tsa nguaꞌni tyaꞌna tiꞌ nu Xuꞌna na jiꞌi̱ maꞌ. 59 Loꞌo nduꞌu scua snuꞌ tsa̱, liꞌ ñaa nguꞌ toniꞌi̱ chaꞌ culacua̱ jiꞌi̱ nu piti cuentya jiꞌi̱ nguꞌ judío loꞌo ngusiꞌyu quiji̱ yu. Cua sta ti nguꞌ xtañi Zacarías jiꞌi̱ nu piti biꞌ ñiꞌya̱ nu naa xtañi sti, 60 loꞌo liꞌ nguaꞌa xtyaꞌa̱ nu piti biꞌ jiꞌi̱ nguꞌ:

―Ngaꞌaa siꞌi juaꞌa̱ caca naa yu ―nacui̱ Elisabet jiꞌi̱ nguꞌ―, Juan caca naa yu re.

61 ―Ná ntsuꞌu tyaꞌa ma̱ nu naa juaꞌa̱ ―nacui̱ nguꞌ tyaꞌa jiꞌi̱ maꞌ cusuꞌ biꞌ.

62 Nguaꞌni yaꞌ nguꞌ jiꞌi̱ sti nu piti liꞌ, chaꞌ ñaꞌa̱ ti tya cuꞌu̱ nu cusuꞌ biꞌ. Nchcuane nguꞌ jiꞌi̱ yu liꞌ:

―¿Ñiꞌya̱ xtañi nu piti re scua nuꞌu̱ ntiꞌ nuꞌu̱? ―nacui̱ nguꞌ jiꞌi̱.

63 Liꞌ ndijña nu cusuꞌ sca ngocaꞌ piti chaꞌ lo biꞌ scua letra. Ndiꞌya̱ nguscua nu cusuꞌ biꞌ liꞌ: “Juan ca naa yu”. Liꞌ ngulacua tsa tiꞌ lcaa ñati̱ nu ndiꞌi̱ slo. 64 Hora ti ndyaala tuꞌba Zacarías, nguxana ndyuꞌni tlyu yu jiꞌi̱ ycuiꞌ Ndyosi liꞌ. 65 Ndube tsa tiꞌ lcaa ñati̱ nu ndiꞌi̱ cacua ti liꞌ; lcua ti su ndiꞌi̱ nguꞌ nde quichi̱ caꞌya su cuentya Judea biꞌ, nda nguꞌ chaꞌ loꞌo tyaꞌa nguꞌ ñiꞌya̱ nu ngua jiꞌi̱ Zacarías. 66 Ngulacua tsa tiꞌ lcaa ñati̱ nu ndyuna chaꞌ biꞌ:

―¿Ni cña caca nu piti re? ―nacui̱ nguꞌ jiꞌi̱ tyaꞌa nguꞌ.

Chañi chaꞌ tsoꞌo tsa ndyuꞌni ycuiꞌ Ndyosi loꞌo nu piti biꞌ.

Nguaꞌni chi̱ Zacarías loo ycuiꞌ Ndyosi, ndyula tuꞌba yu sca ji̱i̱

67 Cua ngutsaꞌá̱ tyiquee Zacarías ntsuꞌu nu Xtyiꞌi ycuiꞌ Ndyosi lo yu. Liꞌ nguxana nu cusuꞌ biꞌ nda chaꞌ loꞌo ñati̱ ca biꞌ, lcaa ñaꞌa̱ chaꞌ nu cua nda Ni loꞌo ycuiꞌ yu. Ndiꞌya̱ nchcuiꞌ yu:

68 Ntsuꞌu chaꞌ cuaꞌni tlyu na jiꞌi̱ ycuiꞌ Ndyosi nu Xuꞌna na, nu laca ycuiꞌ Ndyosi jiꞌna nguꞌ Israel, nacui̱ nu cusuꞌ biꞌ liꞌ.

Cua chaca quiyaꞌ nguxana nchcuiꞌ Ni loꞌo nguꞌ tyaꞌa na nu laca na ñati̱ jiꞌi̱ ycuiꞌ Ni, juani ndyuꞌni Ni cña chaꞌ clyaá na jiꞌi̱ nu cuxi.

69 Cua nda ca ti ycuiꞌ Ndyosi lijya̱ sca nu tsoꞌo tsa nchca jiꞌi̱, chaꞌ cuaꞌni lyaá yu jiꞌna jiꞌi̱ lcaa chaꞌ cuxi nu ntsuꞌu jiꞌna;

biꞌ laca sca ñati̱ nu la cuiꞌ ñati̱ tyaꞌa jiꞌi̱ jyoꞌo David nu nguaꞌni cña jiꞌi̱ ycuiꞌ Ndyosi cua saꞌni la.

70 La cuiꞌ juaꞌa̱ chaꞌ nu nda Ni loꞌo nguꞌ tyaꞌa na tya saꞌni la, chaꞌ cua ngua tyu̱u̱ siyento yija̱ nu nda Ni chaꞌ biꞌ loꞌo jyoꞌo cusuꞌ jiꞌna nu ngua tuꞌba jiꞌi̱ ycuiꞌ Ndyosi.

71 Nacui̱ jyoꞌo cusuꞌ biꞌ, chaꞌ cuaꞌni lyaá ycuiꞌ Ndyosi jiꞌna laja loꞌo nxu̱u̱ tyaꞌa ñati̱ cuxi loꞌo na,

loꞌo juaꞌa̱ cuaꞌni lyaá Ni jiꞌna laja loꞌo tiꞌí tiꞌ ñati̱ ñaꞌa̱ nguꞌ jiꞌna.

72 Cuaꞌni tyaꞌna tiꞌ ycuiꞌ Ndyosi jiꞌna, loꞌo juaꞌa̱ jiꞌi̱ jyoꞌo cusuꞌ jiꞌna;

ná ngujlyaa tiꞌ ycuiꞌ Ni chaꞌ nu cua ngüiñi jiꞌi̱ Ni loꞌo jyoꞌo tyaꞌa na cua saꞌni, nacui̱ jyoꞌo cusuꞌ biꞌ.

73 Nde laca chaꞌ nu cua nda ycuiꞌ Ndyosi loꞌo jyoꞌo Abraham, nu loꞌo nguaꞌni jura ycuiꞌ Ndyosi loꞌo yu:

74 nacui̱ Ni chaꞌ culo Ni jiꞌna laja ñati̱ cuxi nu nxu̱u̱ tyaꞌa loꞌo na;

juaꞌa̱ cuaꞌni Ni chaꞌ ná cutsi̱i̱ na, laja loꞌo ndyuꞌni na cña jiꞌi̱ ycuiꞌ Ni tyucui tyempo loꞌo ndiꞌi̱ na nde chalyuu.

75 Ta Ni chacuayáꞌ biꞌ jiꞌna si lubii tyiquee na, si tyucui tyiquee na taquiyaꞌ na jiꞌi̱ Ni, nacui̱ nu cusuꞌ Zacarías liꞌ.

76 Loꞌo nuꞌu̱ juani, sñiꞌ, nacui̱ yu jiꞌi̱ nu piti Juan, chcuiꞌ nguꞌ chaꞌ nuꞌu̱ laca nu ta cui̱i̱ loꞌo ñati̱ cuentya jiꞌi̱ ycuiꞌ Ndyosi nu laca loo.

Tyaꞌa̱ nuꞌu̱ ca nde loo la jiꞌi̱ ycuiꞌ nu Xuꞌna na, chaꞌ quiñi tsoꞌo tyucui̱i̱ su ca̱a̱ ycuiꞌ.

77 Culuꞌu nuꞌu̱ jiꞌi̱ ñati̱ chaꞌ jiꞌi̱ ycuiꞌ nu Xuꞌna na;

cuaꞌni nuꞌu̱ chaꞌ ca cuayáꞌ tiꞌ nguꞌ chaꞌ cuaꞌni clyu tiꞌ ycuiꞌ Ndyosi jiꞌi̱ quiꞌya nu ntsuꞌu jiꞌi̱ nguꞌ, chaꞌ liꞌ taca clyaá nguꞌ biꞌ jiꞌi̱ nu cuxi.

78 Ntsuꞌu tsa tyiquee ycuiꞌ Ndyosi ñaꞌa̱ Ni jiꞌna; tyaꞌna tsa tiꞌ Ni jiꞌna, biꞌ chaꞌ cua ta ti ycuiꞌ Ni jiꞌi̱ Cristo chaꞌ ca̱a̱ nde su ndiꞌi̱ na.

Biꞌ laca sca xee tlyu nu tyuꞌú neꞌ cresiya jiꞌna, ñiꞌya̱ ntiꞌ xee ndubi nu ntyijiꞌi̱ su ndiꞌi̱ na loꞌo lijya̱ ca ti cuichaa.

79 Liꞌ ta Ni xee biꞌ chaꞌ tyuꞌú neꞌ cresiya jiꞌi̱ nguꞌ nu ngaꞌaa ndyiji ñiꞌya̱ cuaꞌni nguꞌ, chaꞌ talya tsa ñaꞌa̱ neꞌ cresiya jiꞌi̱ nguꞌ biꞌ.

Masi tya luꞌú nguꞌ biꞌ, pana ñiꞌya̱ ntiꞌ si na cua ngujuii ntiꞌ nguꞌ, xquiꞌya chaꞌ cuxi nu ntsuꞌu neꞌ cresiya jiꞌi̱ nguꞌ.

Culuꞌu Cristo jiꞌna ñiꞌya̱ cuaꞌni na chaꞌ tyiꞌi̱ ti̱ ti na loꞌo tyaꞌa na.

Cua ndye chaꞌ nu nda Zacarías liꞌ.

80 Cua ndyaluu la nu piti, loꞌo juaꞌa̱ cua ngua tlyu la tyiquee yu. Pana xcuiꞌ neꞌ quixi̱ꞌ ndiꞌi̱ yu ñaꞌa̱ cuayáꞌ nu nguluu yu, ñaꞌa̱ cuayáꞌ nu nduꞌu tucua yu slo nguꞌ Israel tyaꞌa yu.

SAN LUCAS 2 ->