Soo 'Udechoo Whe'whudit'en-i 46

Jacob 'en Egypt yun k'ut ts'un tizya

1 'Et Israel ndai la yut'i-i tubulh tizya, Beersheba keyoh ts'e oozya 'ink'ez oobá Isaac ooYak'usda (Elohim) ts'un khuna-i dalhk'un.

2 'Et Yak'usda (Elohim) 'en Israel 'ulhdzis yunalhts'et hainya 'ink'ez 'utni, “Jacob, Jacob” ni, 'et 'uyulhni, “Njan 'ust'oh”.

3 'Ink'ez 'utni, “Yak'usda (El) 'ust'oh, mbá ooYak'usda (Elohim). 'Aw wheniljut whe Egypt ts'e tonya' junih, nyun tube didoh-un ncha-un 'et nyutiselh.

4 Egypt ts'e nyulh 'utisnelh 'ink'ez ndo na'nyutislelh. 'Ink'ez 'alha Joseph 'en nyuna k'edutalni.”

5 'Et whe Jacob 'en Beersheba 'et dudinya, 'ink'ez Israel whuye'ke 'en hube 'ubá whuz hitilhti, bubuzkehyaz cha, 'ink'ez bu'atke cha, 'en ndi nulbas be buhanla, 'i Pharoaoh hubuts'otl'ayanla.

6 'Ink'ez khuna-i cha 'ink'ez ndai la huyut'i-i cha, Canaan bugha ininkat-i, 'i tubulh Egypt ts'e whehandil, Jacob 'ink'ez ts'u haindene bubulh.

7 Ooye'ke 'ink'ez ooye'ke 'on 'un ooye'ke, ootse'ke 'ink'ez buye'ke butse'ke, ts'iyawh Egypt ts'e boozdla.

8 'Et ndi Israel buzkeh buboozi': Jacob ooye'ke, 'ink'ez Egypt ts'e whendilne,

Reuben 'en 'udetso ooye', Jacob ooye'.

9 Reuben ooye'ke 'enne:

Hanock, Pallu, Hezron 'ink'ez Carmi.

10 Simeon ooye'ke 'enne:

Jemuel, Jamin, Ohad, Jachin, Zohar 'ink'ez Shaul, Canaan whut'en-un ts'eke ooye'.

11 Levi ooye'ke 'enne:

Gershon, Kohath 'ink'ez Merari.

12 Judah ooye'ke 'enne:

Er, Onan, Shelah, Perez 'ink'ez Zerah ('et hoonts'i Er 'ink'ez Onan bulh 'enne Canaan keyoh dahuzsai).

Perez ooye'ke 'enne:

Hezron 'ink'ez Hamul bulh.

13 Issachar ooye'ke 'enne:

Tola, Puvvah, Iob 'ink'ez Shimron.

14 Zebulun ooye'ke 'enne:

Sered, Elon 'ink'ez Jahleel.

15 Ndunne Leah ooye'ke, 'enne Jacob ghu bulhts'i Paddan Aram ts'e. Ootse' Dinah, 'en cha. Mbene la ooye'ke 'ink'ez oots'eke cha tat whunizyai 'on 'at tane (33) hinli.

16 Gad ooye'ke 'enne:

Zipheon, Haggi, Shuni, Ezbon, Eri, Arodi 'ink'ez Areli.

17 Asher ooye'ke 'enne:

Imnah, Ishvah, Ishvi, Beriah 'ink'ez Serah bubulhtus.

'Ink'ez Beriah ooye'ke 'enne: Heber 'ink'ez Malchiel.

18 Ndunne 'enne Zilpah ooye'ke:

Laban, Leah dutse' gha inilhti, 'en Jacob ghu bulhtsine whunizyane 'on 'at lhk'utane (16) hinli.

19 Rachel ooye'ke, Jacob oo'at:

Joseph 'ink'ez Benjamin.

20 'Et Joseph oots'un keyoh Egypt hooni, 'enne Manasseh 'ink'ez Ephraim. 'Enne Asenath Poti-Pherah whutse', keyoh On lubret, 'en buzkeh.

21 Benjamin buzkeh 'enne:

Bela, Becher, Ashbel, Bera, Naaman, Ehi, Rosh, Muppin, Huppim 'ink'ez Ard.

22 Ndunne 'enne Rachel ooye'ke, 'alhgoh whunizyane 'on 'at dine (14), 'en Jacob ghu bulhtsi.

23 Dan ooye' 'en Hushim huyulhni.

24 Naphtali ooye'ke 'enne:

Jahzeel, Guni, Jezer 'ink'ez Shillem.

25 Ndunne 'enne Bilhah ooye'ke, 'en Laban ootse', Rachel, gha inilhti, 'en ndunne Jacob ghu bulhtsi lhtak'ant'ine hinli.

26 'Et Jacob yulh whendilne Egypt ts'e, ts'iyawh hits'u hainde, Jacob ooye'ke, bu'atke, 'aw 'enne iloh, 'alhgoh lhk'utat whunizyai 'on 'at lhk'utane (66) hinli

27 'Ink'ez Joseph ooye'ke, Egypt 'enne nane hinli, Jacob bulh whusahandilne Egypt ts'e hoozdil whe lhtak'ant'it whunizyane (70) hinli.

Jacob 'en yun k'ut Goshen 'et nenina

28 'Et Judah 'en butso yutilh'a' Joseph ts'un nts'e la Goshen ts'e whuz'ai 'ink'ez Goshen yun k'uz ts'e hoozdil.

29 'Et Joseph nyoo ye nuya-i, 'i lhaidinla, 'ink'ez Goshen ts'e whenya, dubá Israel yudutizya 'ink'ez yubut neninya. 'Ink'ez yuts'ilchun k'et yuk'ilhts'ut 'ink'ez sa' whe 'et yuts'ilchun k'et intse.

30 'Ink'ez Israel, 'en Joseph 'uyulhni, “'Awet whute daoosah-un sgha oonin'aih, nyunin us'en 'awhuz khina 'et huwa.”

31 'Et Joseph dulhutsinke 'ink'ez dubá ooyoh dilhts'ine cha 'ubulhni, “Toozya' 'ink'ez Pharaoh dosni', njan dudoosni' sih, ‘Sulhutsinke 'ink'ez sbá ooyoh dilhts'ine cha, Canaan huwhut'ine sgho nindil.

32 'Ink'ez dune 'enne 'usbai ghunline, whuz un'a khuna-i gha 'aihne hinli, 'ink'ez dughuna' cha ts'iyawh ndai la huyut'i-i cha ts'iyawh sahuyanla.’

33 'Et 'uhoneh Pharaoh nohkahizya 'ink'ez 'utni de, ‘Dahoont'oh-un la huwahna?’

34 'Et 'udoohni', ‘Mba 'ut'enne bube 'ut'en dak'ez whuts'un, khuna-i gha hana ts'oodunne ts'inli whuts'un 'andit whuts'un, wheni cha 'ink'ez netsoda' nebáke 'enne cha.’ 'Et de sih ndi yun k'ut Goshen yun k'ut hooht'e', 'usbai ghunline ts'iyawh 'ilhoghun hinli whe Egypt whut'enne buba' huninzun 'et huwa.”

<- Soo 'Udechoo Whe'whudit'en-i 45 Soo 'Udechoo Whe'whudit'en-i 47 ->