1 Naakatakera karataimiri antavaitaineri Pava, noshintsithatzimi eero pimanintavaitziro okaratzi ikaminthagaimi Pava, amenaashivaitakari. 2 Tema jiroka ikantakeri irirori:
Niyotakera kameetha omatya, aripaitera nokemakemiro pikovakotanari.
Omonkarapaitetapaakara “Kitaite Avisakotaantsi,” noneshinonkatakami.
Iroora apiipaitetaachari iroñaaka, iroka “Kitaite Avisakotaantsi.” 3 Tera nonkovero intzime impaitya notzitzikavaiteri iravisakoshiretai, ari onkantya eero ithainkimavaitaitantanaro nantavaitane. 4 Aña nokovatzi noñaakantairo kameetha inampitane Pava nonatzi, oisokero nonkantanetya, aririka avishimotena tsikarika ompaitayetya: inkemaantsitakaaveetyaana, impomerentsitakaaveetyaana, irovasankitaaveetyaana, 5 impasataveetyaana, irashitakovaiveetyaana, irovatsinaavaiveetyaana, nantavaiperokivetakya, ayimavaivetakyaana novochokini, ayimavaivetakyaana notashe, 6 kiteshire nonkantaiya, iyotane nonkantaiya, aakameetha nonkantantai, nethaantane nonkantantai, nampishire irovaina Tasorentsinkantsi, etakoperotane nonkantantai, 7 nonkantapiintairo kyaaryoori, intasonkaventakaantaina Pava, nantapiintairo tampatzikashiretakainane nonkempitakaantanakero novayirityaami, notzikaaventaka ipoña nopiyakoventa. 8 Onkantavetakya inthainkimavaitaitena, ompoña ñaapinkathataaririka nonatye. Onkantavetakya inkaviyaveetakyaana, ompoña intharomentayeetyaana. Onkantavetya nonkantapiintavetyaaro kyaaryoori, ipaitapiintayeetakena “thairi.” 9 Onkantavetakya eero itzimaveta kaari ñaayetenaneri naaka, tzimamaitacha pashine iyoperoyetanari. Nonkamimavetakya, eeniromaita nañi. Irovasankitaaveetakyaana, tekeramaita jovamaayeetana. 10 Ovashire nonkantavetakya, eekeromaitatya nontharomentatyeeya. Nonkovityaaneentavaivetakya naaka, iro kantacha nanintaakaayetaiyaari pashinepayeeni. Tekatsi tzimimovaivetyaanane naaka, iro kantamaitacha nanintayetaaro kovaperotajaantachari.
11 Corinto-satziite, nokantaperotatziimirora irokapayeeni, tekatsira nomanimovaitemiri. 12 Tekeraatarika aventaashiretavakaiyaata, eerokaitera kantashitarori, tera naaka. 13 Intsityaa paakameethataina naaka nonkempitaimira eeroka, tekatsi nomanimovaitemi. (Nokantzimirora iroka, kempitavaitakara eentsimi noñaanate.)
Oshiyayetaaro itasorentsipankote Pava Kañaaneri
14 Eero povithaajaantanaari kaari kempisantatsine. ¿Kantatsima aparoni kameethashireri iraapatziyaari irantavaite aparoni kaariperoshireri? ¿Kantatsima eejatzi ontsirenite tsika janta okitainkatzi? 15 ¿Kantatsima Cristo irakakoteneri ikoviri kamaari? ¿Kantatsima kempisantzinkari intsipatyaari kaari kempisantatsine irashityaaro tsikarika ompaitya?*Jiroka pashine ivairo kamaari ikantayeetziri “Belial.” 16 ¿Kantatsima ankempitakaantero itasorentsipankote Pava tsika janta iñaapinkathataitziri oshiyakaarontsi? Tema aakaite akaratzi akempisantzinkariyetai akempitayetaatyaaro aakami tasorentsipanko tsika inampitaro Pava Kañaaneri. Tema jiroka ikantake Pava:
Ari nonampishireyetantaiyaari, nonkaratairi naniiyetai.
Naakatake inkempitakaantai Ivavane,
Iriiyetake nashitaiyaari Naaka.
17 Iroora ikantantari eejatzi Avinkatharite:
Pintainaryaapithatyaari pashinesatzi atziri, eero pikaraminthatziri irikaite.
Eero pantapiintanetairo nopinkakaimiri.
Arira naapatziyeeyaami,
18 Arira pinkempitakaantaina naakami piri,
Nonkempitakaantaimi naaka eerokayetakemi notomiite, eerokayetakemi nishintoite.
Arira ikantziri Avinkatharite, Shintsikiperotatsiri.
<- 2 CORINTO-SATZIITE 52 CORINTO-SATZIITE 7 ->
- a Jiroka pashine ivairo kamaari ikantayeetziri “Belial.”