1 Aman Diosichi mantá chutecaca quiraminlabe cuenta quinayoe. Nula miralaranae jun mantá sonnaminlachi tenchisiri joeque. Puyaca junlachi tenchi itoe. 2-4 Aman casalaica jun sonala cuwenta jochunae. Diosichi Pilabi mantá chuteca joe casalaica jun sonala yalachi unilalabesiri sonnanola joeque. Uyanlachi sona ino podeilaituchunae. Tsanhiminlaca jutsa quilaquinae tintsan jochunae. Jun tsanquenan nula acola, soquila, Diosichi mantá chutecabe culpa tan nenaminnan, Jesuchi tsachila ino podeituminlanue. Tsan josanan, sonalachi unilala casonnalarasari yalachi sonala jolajochunae. Unilala puyacabi yalachi sonala itolajochunae. Junte nechi uyanlachi sona manhino podeilaichunae. Tsanhinari, jutsa itochunae.

Junni nula jun tsannan jolajoe. Jesucristo puyaca jonan, nulanan puyaca cuwenta jolajoe. Puyaca tsachi cuwenta, Diosichi mantabe culpa itulajochunae. Jun tenchi Diosichi mantabe culpa iton nenato, Jesucrístochi tsachila ino podeilaichunae. Ya puyato mansonhinue, yape chiquila Diosichi tenchi seque nenalarasa.

5-6 Casaleri chiquilachi tenca munate nenamin jominlayoe. Juntonan Diosichi mantá pila chutecabi paca jominhe jutsa quilaquitunaque. Junni jun mantabi Jutsa quilaquituna! tica jonun tenchi, nantanancari jutsa quimin jominlayoe. Jerale tsanque nenaminla puyalaichunae. Aman jutsabe mantaito, doraminla cuwenta jominlayoe. Jutsari chiquilaca mantánan, seiton quimin jominlayoe. Junni jun mantá tenchi doraminla cuwenta jominnan, amanari manloca cuwenta jolajoyoe. Puyaca cuwenta icalayoe jutsa manquituchun. Matu mantabi chutecabe culpa itoto, casan tala nenalarayoe Diosichi Tencabe nenato.

7 ¿Junni niyan tintsan jun? Diosichi mantá tenchi culpa tenhinari, ¿seiton mantá jun? Te, numanan seiton itochunae. Tsan josanan, Diosichi mantá itomanpari, lari jutsaca miratuno jomin joinhie. Uyanlachi ticatiya munaito quiralaquitunaque mantá chuteca itomanpari, jutsa joeque tenhino itomin joinhie. 8 Tsan josanan, lachi tenca jutsa pun joe. Jun tenchi uyanlachi ti jonuncatiya munaito quiratunaque mantaca jonan, uyanlachi ti jonuncatiya nantanancari munaito quiraniquiyoe. Jutsa quitusa mantá itonari, jutsacanan tenhitumin jocaichunae. 9 Junni matu mate Diosichi mantaca miitomin jomanyoe. Diosichi mantaca miitoto, lari culpaca tenhituto sonnamin jomanyoe. Junni Diosichi mantaca merasi, jutsaca tenhinan, lachi tenca puyae. 10 Diosi yachi mantaca tsachilachi cuwaca jominhe yape tenca sonnalarasa. La mantimini jun mantabe sonnatiyoe; puyayoe. 11 Diosichi mantaca miito, jutsabe encanaito, lachi tenca jutsa tenchiri puyae. 12 Junni Diosichi mantári duque sen mantá joe. Tuca joe.

13 Junni Diosichi mantá sen jonari, ¿niyaito jun mantabe puyano patinun? ¿Mantári seiton mantá jono iton? Te, natiya tsan itoe. Diosichi mantachi culpa itoe; jutsachi culpa joe. Seiton jutsa tan joto, sen mantabe puyayoe. Junto miintsan joe jutsa duque seiton joeque. Diosichi mantaberi fécari miintsan joe jutsa jelecari seiton joeque. 14 Diosichi Tencari yachi mantaca cuwanan, sen mantá joe. Junca miralarayoe. Lachi tencari seiton joe. Jutsabe cayaito nenamanyoe.

15 Junni la ti quinanunca miitoyoe. La quino munaranunca quitumanyoe. Natiya quino munaratununca quimanyoe. 16 Junni la quinanunca seitoe titori, la Diosichi mantabe man panni quinayoe. Diosichi mantaca sen joe tino patíyoe. 17 Junni tsan jonari, la patsari seiton quimin itoyoe. Lachi tencabi jutsa wito, seiton quimiyamin joe.

18 Lachi tencabi ti sen cosanantiya itoe. Seque nenano munaratonan, seque nenano podeitiyoe. 19-20 Seque nenano munaratonan, seitonque nenaniramanyoe. Junni quino munaratununca quitori, la patsa seiton quitiyoe. Jutsari laca mantato seiton quisa cariniquiminhe.

21 La itsanque patica joyoe: Seque nenano munaratonan, seque nenano podeitiyoe. 22 Lachi tencabi Diosichi mantaca sen joe tiyoe. 23 Juntonan lachi tencabinan man cosa cajoe. Jutsa quino mowin tayoe. Junni lari man quiraque quichi tinatonan, ya mowin uyan quiraque quisa carichi timin joe. Diosichi mantabe jutsa mowinbe pataato, jutsa mowinnan fe lomin joe. 24 Duque padeseinayoe. In jutsa jelenquiran joe puyan oco cuwenta. ¿Junni mo laca se larichunan? yape jutsabe mantaitusa. 25 Chiquilachi Miya Jesucristo, ya se larino joe. Jun tenchi Diosibe duque acradeseimin joyoe.

Junni itsanque patica joyoe: La patsa Diosica tenca cato, yachi mantaca merámin joyoe. Junnasanan, lachi tencabi jutsa mowin ponnan cajoto, yacanan camerániquimin joyoe.

<- Románolachi 6Románolachi 8 ->