1 Junni anjeliri pi jinanunca lachi quirawoe. Ya piri numatotiya sonnasa carimin pi joe. Duque uraran tseba pin joe bidrio cuwenta. Diosibe Opisa Nabe mantato chudinunbi nechi jun pi bulanae. 2 Junbi nechi lato, pueblobi caye quitsase jinae. Pi caten pequeloca chide pele chularae. Jun chide pelebi numatotiya sonnato polesa carimin puca imin joe. Chunca paluca pucala jun chide pelebi imin joe. Pe cura uyan puca, uyan puca imin joe. Jun chide pele japisuchi jerale tote chuminla janpeinun joe.

3 Jun pueblobi monantiya yucaquituminla joe. Junbiri Diosibe Opisa Nabe mantato chudinun joe. Junni yabe mantaiminlari junbi yachi tenchi titiya quiminla joe. 4 Yachi caforoca quiraminla joe. Yalachi lesubi yachi mumunca chuteca junla joe. 5 Junni jun pueblobiri numatotiya quepen itumin joe. Tsan jonari tsenonan, lanparinnan, yonan, munaralaratue. Miya Diosiri yalachite tsenae. Yalanan numatotiya mantato polelaichunae.

6 Junni anjeli labe pato itsantie:

—In fiquiri tsarasi quereintsan fiqui joe tie. Miya Diosi yachi anjelica eree tie yape yabe mantaiminlaca meracarisa inale niyan ino jonunca. Diosiri yachi mantate paminlachi tenca cuwamin joe tie yape yachi fiquica seque palaquisa.

7 Junni Jesús itsantie:

—La moora manpatanae tie. In pila Diosichi mantate chuteca jun pila joe. Junni in fiquibe mantaiminla duque son jolajochunae tie.

8 La Juan inca merán, quiran, quicayoe. Yaca quirato, lachi quirawomin anjelichi nedele telenhichinamanyoe Diosichi cale cuwenta. 9 Junni yari wari labe itsantie:

—Tsanhitude! tie. Lanan nu cuwenta Diosibe mantaimin joyoe tie. Lanan, nunan, Diosichi mantate paminla nulachi acola joto, yalanan, jerale in pilabe mantaiminlanan, jeralela jun tsannan jolajoyoe tie. Junni Diosichi calesiri telenhito se tintsan joe tie.

10 Junsi ya anjeli labe itsantie:

—Diosi nuchi ticatiya quirajasa carito, yachi mantate in pilaca chutesa carie tie. Junni inbi chuteca fiquica meracariniquina! Nosaituna! Tsanhino jun ma queloinae tie. 11 Junnasanan jutsa quiminlari yape jutsa quinilaquinasa! tie. Seitonla yape seiton cajonilajosa! Senla mantimini peleituto sen jolajosa! tie. Yape Diosichi tsachilari Diosichi mantate canenalarasa! tie.

12 Junni Jesús labe itsantie:

—Meralaquede! tie. Moora manpatanae tie. Jatobi, jeralelaca niyan quicala jonunca miito, seque quica junlaca seque manqueyanae; seiton quica junlaca casticaqueyanae tie. 13 La Jesús caque joyoe. Junni jeralela jerainasanan cajoanae tie.

14 Tsanpaca tsalenun cuwenta tencaca mantsalentsan joe tie sen jochun. Tencaca tsaleca junlari duque son jolajochunae tie. Yala Diosichi pueblo tamolanse wito, numatotiya sonnasa carimin chide pele pucaca fino podeilaichunae tie. 15 Pueblo urachi seitonlari purailaichunae tie. Pone quiminla, uyan sonalabe o uyan unilalabe nosa seitonque nenaminla, tsachilaca toteminla, epe diosi joe tinun moldeca tennaminla, nene paminla, encanaminla, yala urachi purailaichunae tie. 16 La Jesús lachi anjelica ereyoe tie yape lachi tsachilaca in fiquica meracarisa. Lari matu to miya Davichi alica joyoe tie. Tsachilachi tencabi tsemin joyoe tie tseino inasa duque uraran tsemin tsabo cuwenta.

17 Junni Diosichi Tencabe, Opisa Nachi sona tinunbe, jalaide! timinla joe. Yalaca meráminlanan jalaide! petinola joe. Pi muquinasa jominla pi cuchilaquetsan! Numatotiya sonnato polesa carimin pica epe cuwachunae. Jun pica munaraminla calaquetsan!

18 Inbi chuteca jun fiquiri Diosichi mantate paca jun fiqui joe. Junni la Juan in fiquica meráminlaca payichinayoe: In fiquica uyan fiquibe palalaquinari, Diosi yalaca duque casticaquichunae. Inbi padeseinanunca chutecaca yalari fécari duque padeseilaichunae. 19 Junni in fiquica weyan weyanca larilaquinari, Diosi yalacanan casticaquichunae. Yalachi mumun sonnanun pilabi chuteca jonari, piyarichunae. Diosichi sen pueblobi wisa carituchunae. In pilabi duque sen cosalaca chuteca joe. Junni in fiquica weyan weyanca larilaquinari junbi win, jun cosalaca can quisa carituchunae.

20 Jesús in fiquica pasa carimin joto, la moora manpatanae tinae.

Tsa tie. Miya Jesús, manpatana!

21 Rocaiyoe Miya Jesucristo nula jeralelaca laquirato duque ayudaisa. Tsanqueri joe.

<- Quirajanunca 21