1 ¿Crístori nulaca sonba tenca suwaco? ¿Junsi nulaca duque laquirato manpansi josa carico? ¿Diosichi Tenca nulachibi poco? ¿Nula tala laquiracaalaquinaco? 2 Tsanla jotori, laca tsaracari son josa carilaquina! Man tala man tala tenca calaquituna! Man parejori tenca cato, junsi laquiracaato, man junni tenca cato nenalarana! Tsanque nenalaranari, lari tsaracari son joanae. 3 Junsi isapun itolajona! Uyanlaca fe sen joyoe titulajona! Uyanlari nulaca fe jolajoeque tenca calaquina! 4 Junsi tencachique munaranuncasiri tenca calaquituna! Uyanla munaranuncanan petenca calaquina!

5 Jesucristo tenca cananun cuwenta, nulanan jun tsanquenan tenca calaquina! 6 Yari Diosi jotonan, Diosibe parejo cajochique tenfetunue. 7 Diosi jonunca purato, tsachi ito, peyun cuwenta inue. 8 Tsachi ica jun jototiya, fe mantá tan tsachi joyoe titunue. Totaino jototiya, Diosica merámin jominue. Junsi corosibinan totainue. 9 Jun tenchi Diosiri yaca tsaracari mantá tan suwaca joe. Jerale uyanlaca duque fe josa carie yape 10 yachi cale jeralela jera telenhilaisa. Jamochi chuminla, tote chuminla, to tenpe chuminla, piyanlela yachi cale jera telenhilaichunae. 11 Jeralela palaquichunae Jesucrístori piyanlelaca mantamin Miya joeque. Jeralela tsanlatichunae yape Apa Diosicari tsara sen patsa joeque mirantsan josa.

12-13 Junni nulanan labe meráminla jonan, nulaca laquirato payichinayoe. Lari nulabe pechusanan, nulari laca merámin jominlae. Junni amanari lari nulabe peitosanan, laca fécari meralaquina! Diosiri nulaca sen jono munarasa carimin joe. Junsi yanan nulaca sen jono podeisa carimin joe yape yachi tenca munate sen jolajosa. Junni yari tsan josanan, nulanan tsa se loca jochun duque tenfelaina! Fe joyoe tituto, Diosica duque jele tito, se lochun tenfelaina!

14 Titiya quino jotori, beco patuto, junsi pacaatuto quinilaquina! 15-16 Culpa itolajochun tsan jolajona! Tsanla jotori, ti quira seiton tsachilachite chuminla jotonan Diosichi sen nalala jolajochunae. Diosica tennatuminlachite nenato, tseno cuwenta jolajochunae. Sonnasa carimin fiquica duque tennato, yalachi tenchi tseno cuwenta jolajochunae yape Diosichi minuca feno podeilaisa. Junni nulari tsanque nenalaranari, lari Cristo manpatano mate duque son joanae. Nulaca seque micaricayoe; epe micaritiyoe tino podeiichunae.

17 Nulari Diosibe cayaito, yachi tsachila jolajoe. Junni yachi tsachila joto tencachiqueca yachi cuwaminla joe. Junni lanan nulabe pecuwacainoyoe. Lari totainun tenchi nulari fe sele cuwacaino podeilainari, junca son tinoyoe. Junsi nulabe duque son tiyanae. 18 Junni nulanan labenan son tinola joe.

19 Miya Jesús tinari, Timotéoca nulachica moora ereno muquee yape yari nulaca miito quirasa. Yari inchi manjato, labe nulaca jera cuenta manquinasa, lari duque pansi joanae. 20 Timotéori sen tsachi joe. Nulaca tsaracari duque laquirato, seque ayudaino munarachunae. Timotéosiri tsanque seque ayudaichunae. 21 Weyanlari yalachi tenca munateri nenato, Crístochi mantate nenatuchi timinla joe. 22 Timotéoca mantimini nulanan miralarae yari sen joeque. Nao apabe trabajaquimin cuwenta, labe peayudaimin joe. Jesucrístoca paca sen fiquica micarinasa, labe seque peayudaimin joe. 23 Jun tenchi yaca nulachica ereno muquee. Casaleri laca niyanlaquino jonunca miino muquee. Junca miisiri, aman Timotéoca ereno muquee. 24 Junni Miya Jesucristo ayudainan, lanan nulachica nanni ina jaichunae tenjae.

25 Tsan jotonan, Epafrodítocanan nulachica manherentsan joeque tenca canayoe. Nulari yaca lachica ereca jominlae yape laca ayudaisa. Junni lari Diosichi tenchi ticatiya quinasa, yanan lachi aco cuwenta joto labe peayudain, pepadesein, inaminhe. 26 Junni amanari Epafrodítori nulaca manquirabi jichi tinae. Nulari jera meraca jominlanue yari quiyanpun jominueque. Junni yari junca tenhito, nulachica manjichi tinae yape nulari laquiilaitusa. 27 Junni yari duque quiyanpun jominhe. Puyachinaminhe. Junnasa Diosi mantimini yaca duque laquirato manse suwae. Lacanan Diosi laquiraminhe. Epafrodito puyaca jomanpari, lari nantanancari laqui jono jomin joinhie. Junni Diosiri yaca manse suwanato, lacanan laquiraminhe yape duque laquiitusa.

28 Jun tenchi Epafrodítoca fécari nulachica ereno muquee yape nulari yaca manquirato manson tilatisa. Junni nula laqui jominnan polarilaqueeque meráto, lanan wepananaminnan nasi pansi manhiichunae. 29-30 Junni Miya Jesucrístobe duque acradeseinato, Epafrodítoca son tito facarilaquina! Yari Crístochi tenchi titiya quinaminnan, casi puyawiyae. Junni yari puyano jototiya nulachi tenchi laca duque ayudaino munaraminue. Ya tsanlaca duque respetaintsan joe.

<- Filípolachi 1Filípolachi 3 ->