1 Junni Jesube yachi tsachilabe junte nechi manjito, Jesús uwainun puebloca manjilainue. 2 Junni jasaino ma fenunbi, Jesuri Diosichi fiqui miinun yabi wito micarinaminue. Junni duque tsachilari wepanato meráto itsantilatinue:

—¿In Jesuri niyaito tsancari miica junhun? Tsancari wepanato quirantsancari seque quimin joe. 3 ¿Yari carpintero jotun Maríachi nao? Junsi yachi acolari chiquilachi quelote chularae Jacobo, José, Judas, junsi Simón. Yalanan yalachi soquilanan intele chularae tilatinue.

Junto Jesuca quereituchi tito, pailainue. 4 Tsan josanan Jesuri yalabe itsantinue:

—Diosichi mantate paminlaca piyanlete respetailaichunae tinue. Tencachique pueblobisiri, o tencachique yabisiri yalaca natiya respetailaituchunae tinue. Jun tsachilanan, junsi yalachi familialanan natiya respetailaituchunae tinue.

5 Junni jun pueblobi layan wepanato quirantsancari seque quino podeitunue. Narin quiyanpunlacasiri tedechi tale quito manse suwano podeinue. 6 Junnan tsachila quereituminla joeque duque wepananue.

Junsi Jesuri jun pueblolate jeralete micaridede nenaminue. 7 Junni chunca paluca yabe penenaminlaca jera oticato, paluca paluca erenue yape yachi mantate micarito nenalarasa. Junsi yucanchi ocolaca sularilaquisa mantá cuwanue. 8 Junsi tsanque micaribi jinato, tinantiya tanjitusa mantanue nin tolo, nin ano, nin cala. Tola mande nacasiri tanjilaisa mantanue. 9 Sapato ponunberi, camisacanan manquiri, natiya paluqui tanjitusa tinue. 10 Junsi aman itsantinue:

—Manca yabi féto, junbisiri chularana! jun pueblobi nechi manlono fecári. 11 Junni pansile manca pueblobi nulaca facarituchi latinari, o merátuchi latinari, yalaca telaquepolaquina! Junsi nulari junbi nechi manlonato, to poyo nedebi midicaca jera manpiquisito manjilaina! tinue. Junbi chuminlaca seiton jolajoe tito to poyoca piquisilaquina! tinue. Aman tsarasica pachinayoe: To yucapiyarino mate Sodoma pueblobi, Gomorra pueblobi chumin jominla duque casticailaichunae. Juntonan nulaca facarituchi timinlari jun pueblobi chumin jominlaca fécari duque animali casticailaichunae tiyoe tinue.

12 Junni Jesús tsantinunbi, yalari jilainue. Tsachilachi tencari casan tala tenca mancanola joeque micaribi jilainue. 13 Junsi duque yucanchi ocolaca mansularilaquinue. Junsi duque quiyanpunlachibi aseite ilipoto manse suwalaquinue.

14 Junni Jesuca duque mera jonunca miya Herodes meránue. Junca jera merátonan, mo jonunca miino podeitunue. Junto weyanla pato, Jesuca Mumunmin Juan jonhoe tilatinue. Pansileri yanan puyaca jominnan, mansonhica jonhoe tilatinue. Jun tenchi tsancari wepanato quirantsancari quimin jonhoe tilatinue. 15 Junsi weyanla mantimini matu to Diosichi mantate pamin tsachi puyaca jomin mansonhica jonhoe tilatinue. Weyan weyanla mantimini tsan jonhoe tito, Elías tinun jonhoe tilatinue.

16 Junni Herodes junca meráto itsantinue:

—Juáncari misu butunsa caricayoe tinue. Ya mansonhica jonhoe tinue.

17-18 Aman Mumunmin Juan itsanque puyaca jominue: Herodes yachi acochi sonaca josoleca jominue. Felípechi sona jominue Herodías mumun. Junni Mumunmin Juan junca meráto, Heródeca payica jominue. Acochi sonaca josoletuntsan joe tica jominue. Junni ya sona Heródeca mantasa carica jominue Juanca cadenachi teleto dolaquisa. 19 Junni ya sonari Juanca pa jotonan, totesa carichi tinatonan, catotesa carino podeica itominue. 20 Heróderi Juanca Diosichi sen tsachi jonunca miraminue. Junto duque jelerato totesa carica itominue. Junni Juan micarinaminca meráto, Herodes layan entendeitunue. Tsan jotonan son tito meraniquimin jominue.

21 Junni Heródechi wata tula ma fenan, ya sonari Juanca totesa carino podeinue. Jun mate yari tenientelaca, capitanlaca, junsi Galilea to oco tsachilaca jera meracarito, fiesta ano fimiyanaminue. 22 Junnasa Herodíachi namari jun tamochi wito teraquinue yape Heródela quiralaquisa. Junni Heródebe yabe pechuminlaberi duque se joe tito quiralaquinue. Junni miyari ya nalalan sonaberi itsantinue:

—Nu tica panhanatiya, cuwaniqueyanae tinue.

23 Junni Diosi mirasa juraquito pánayoe tito itsantinue:

—Tica panhanatiya cuwaniqueyanae tinue la tanunca quitsa fecáritiya.

24 Junni ya nalalan sonari urachi manloto yachi ayanbe panhato itsantinue:

—¿Tica panhano joinhin? tinue.

Junni yachi ayan mantimini Mumunmin Juanchi misuca cuwasa tide! tinue. 25 Junni ya nalalan sonari wewe tamochi manwito, miyabe itsantinue:

—Amananan Mumunmin Juanchi misuca wa nidabi cuwade! tinue.

26 Junni ya miyari duque laquiinue. Juntonan juraquito paca joto, junsi junte pechuminlanan meracala jonan, nene patuchique cuwaniquinue. 27 Jun óratenan miyari soldadoca Juanchi misuca tanjasa mantato erenue. Junni soldadori Juan doranunca jito Juanchi misuca porecato, 28 wa nidabi pocato tanjato, ya nalalan sonachi cuwanue. Junsi ya sona yachi ayanchi cuwanue. 29 Junni Juanbe penenamin jominlari junca meráto, Juan puyacaca mancato menalaquinue.

30 Junni aman Jesús mantato ereca junlari yachica manjato, yabe cuenta jera manquilaquinue titiya jera quinunca junsi jera micarinunca. 31 Junni junteri duque tsachilari jan, weyanni manjin, ilainanan, yalari ano finotiya jola itominlanue. Junnan Jesuri yalabe itsantinue: Monantiya chutunun postoca nasi jasaibi jilaisa! tinue. 32 Junni Jesube yabe penenaminlaberi wa canoabi wito, tsachilaca purato, niyanlanantiya chutunun postoca jilainue. 33 Juntonan duque tsachilari Jesuca junchi jinaminca quirato miito, yalanan jerale pueblobi nechi bene jilainue. Nedechi jinato, Jesúlaca caquenan felainue. 34 Junni Jesuri canoabi nechi loto quiranari, duque tsachila méraminlanue. Junto yalaca quirato duque laqui tinue cuidaimin iton opisa cuwenta jolajoe tito. Junto yalabe duque sen cosalaca micarinue. 35 Junni wari duque quebi inasa, Jesube penenaminlari yachica jato itsantilatinue:

—Inte niyanlanantiya chutunun posto joe latinue. Duque quebi inae. 36 Junni tsachilaca jera manherede! tilatinue yape quelote puebloca jito, ano cato filaquisa.

37 Junni Jesuri itsantinue:

—Nulari yalachi ano cufilaquede! tinue.

Junni yalari manpato, chiquilari duque animali bibu canola joichunae latinue yala jeralelachi michi suwachun. 38 Junni Jesuri itsantinue:

—¿Nulari niyanca bibu talarayun? tinue. Jera quiralaquechin! tinue.

Junni yalari jera quiratobi, itsantilatinue:

—Manteca bibu, junsi watsa palucari talarayoe tilatinue.

39 Junni aman Jesuri yachi tsachilabe itsantinue:

—Ya tsachilaca lapabi chutelaquede! Bolonto, lapabi jeralelaca chutelaquede! tinue.

40 Junni aman tsachilari tsanque patsa tsansi, o mante chunca tsansi bolonhito jera chudilainue. 41 Junnasa Jesuri ya manteca bibuca, junsi paluca watsaca cato, jamochi quirato, Diosibe acradeseinue. Junsi aman Diosibe acradeseitobi, watsabe bibubeca pisuleto, yabe penenaminlachi cuwanue yape junte chumin tsachilachi cuwalaquisa. 42 Junni jeralela peyale filaquinue. 43 Junnasanan puchuicaca manlayato, chunca palu tsalabi tuwale manlayalaquinue. 44 Junni yala ano fimin tsachilari, unilalacasiri minan, mante mili tsansi tsachila jominlanue.

45 Junni jerale ano fitobi, Jesuri yabe penenaminlabe itsantinue:

—Nulari canoabi wito, wa pipiluca polelainade! Laca caquenan Betsaida fecári jilaide! tinue. Junnasa lari tsachilaca manherechinayoe tinue.

46 Junni aman Jesús tsachilaca manheretobi, du minu jinue Diosibe rocaibi.

47 Junni nemeinasa, canoachi jun wa pipilu quitsabi jinaminlanue. Junni Jesuri mancasiri jun pipilu fiquitenan cajominue. 48 Junni nuwiri jinaminlaca quiranue. Wu duque quinanan, we jino podeica itominlanue. Yalachi nan talasiri wu duque quinaminue. Junni Jesuri tseino inasa, pi jamoca nedechi yalachica jinue. Juntonan yalaca manpolenaminue. 49 Junni yalari tsanque pi jamoca nedechi jinaminca quirato, jeralela duque jelechi atinato, puyan oco jonhoe tilatinue. 50 Junnasaleri Jesuri pato itsantinue:

—Sonba tenca ilaide! Jeleratulajode! tinue. Lanan joyoe tinue.

51 Junni Jesús canoabi winunsi. duque wu quinaminnan mandeinue. Junni yalari junca duque wepanalainue. 52 Juntonan bibuca duque suwaca josatiya, Jesuca caquereica itominlanue. Uyan quiraque tenca camin cajominlanue.

53 Junni aman ya pipiluca man becochi poleto, Genesaret pueblobi felainue. Junto canoaca pi fiquite telelaquinue. 54 Junni canoabi nechi lonasaleri, tsachilari Jesuca manmiito, 55 junbi sunenato, piyanle jun tote sunenato, quiyanpunlaca cuyanbi poto jera tanjalainue. Jesús nunchi nenaeque meráto, junchi tanjilainue. 56 Junsi tiletiya Jesús nenasa, na pueblobi o wa pueblobi winari, quiyanpunlaca mercadote jera tsoremin jominlanue. Junni Jesube rocailainue yachi camisa puntacanantiya taquiralaquichun. Junni jerale taquiraminlari manseilainue.

<- San Marcos 5San Marcos 7 ->