1 Junni Jesús tsanque micarinasa, tsachila jato yabe cuenta quito, Galilea tobi chumin puyacalaca cuenta quilaquinue. Yalari Diosichi cuwachun tito, animalilaca totenaminlaca miya Pilátori yalacanan jera totesa carinue. Yalaca totenan, yalachi asan animalilachi asanbe palaica jominue. 2 Junni Jesús jun cuentaca meráto itsantinue:

—¿Ya Pilato toteca jun tsachilaca niyan tilatiyun? ¿Yalari weyan Galilea to tsachilaca fe jutsa tan jominla jonhoe tilatiyun? ¿Jun tenchi puyacala jonhoe tilatiyun? 3 La nulabe tsarasica pachinayoe: Ya toteca junlari fécari jutsa tan itominlanue. Nula cuwentanan jominlanue. Junni nulanan jutsa quinunca telaquepoto casan tala tenca mancantsan joe tinue. Tsantutori nulanan totailaichunae tinue. 4 O uyanlacari tenca calaquede! tinue. Siloé tinun jamo ya arajito, chunca ochuca tsachilaca dilato totenue. ¿Yalaca niyan tilatiyun? tinue. ¿Yalari weyan Jerusalenbi chuminlaca fécari jutsa tan jominla jonhoe tilatiyun? ¿Jun tenchi puyacala jonhoe tilatiyun? tinue. 5 Nulabe tsarasica pachinayoe: Ya puyaca junlari fécari jutsa tan itominlanue. Nula cuwentanan jominlanue. Junni nulanan jutsa quinunca telaquepoto, casan tenca mancantsan joe tinue. Tsantutori, nulanan padeseilaichunae tinue.

6 Junni Jesús micarinato, itsanque cuenta polarinue Diosi ico pele tsacumin cuwenta joeque:

—Aman tsachi manca yachi witabi ico pele tachunae tinue. Junni ico pucaca neyabi janasa, natiya itochunae. 7 Junto wita cuidaiminbe itsantichunae: Aman quirade! tichunae. Peman wata fecári pucaca neyabi janasa, puca itoe tichunae tinue. Junni toleto quepode! ¿Ti quichun epe chide chuno jochunan? tichunae tinue. 8 Junni wita cuidaiminni yachi patronbe itsantichunae: Nasi camérade! tichunae tinue. Man wata fecári toca towan, peca abono cuwenta tsoren, quechinayoe tichunae tinue. 9 Jun fecári puca inari, se jochunae. Aman puca itunari, tolentsan jochunae tichunae tinue. Jesús tsanque micarinue.

10 Junni jasaino mate Jesús Diosichi fiqui miinun yabi micarinaminue. 11 Aman junbi sona manca bontoica jun jominue. Chunca ochu wata ya sonaca yucanchi ocori tsan suwato taminue. Yari mantuino natiya podeitunue. 12 Junni aman Jesuri yaca quirato, jasa tito, nuca manse suwanayoe tinue yape tsanque padeseitusa. 13 Junto yaca tedechi tale quinunsi, betende manseinue. Junsi ya sonari manseicayoe tito, Diosica duque se tinue. 14 Aman jun Diosichi fiqui miinun yabi mantamin tsachiri ya sonaca mansenanunca quirato, duque painue. Jasaino mate manse suwanun tenchi Jesuca painue. Aman paito, junte layaica junlabe itsantinue:

—Sota ma trabajaquino ma joe. Jun málate manseibi jalaina! Jasaino mate manseibi jatuntsan joe tinue. 15 Aman Miya Jesús junca meráto, beconan pato itsantinue:

—Nuri laquiramin joyoe tinatonan, natiya laquiratumin joe. Laca jasaino mate manse suwatuna! titonan, nula jeralela jasaino matenan quiniquiminla joe. ¿Aman jasaino matenan nulachi wala, buro, ticatiya lasito, pi cuchisa tanjimin jolajotiyun? tinue. 16 ¿Junni jasaino mate animalica pi cuchisa lasino jonari, in sonaca jasaino matenan manse suwano jotun? tinue. Aman yanan chiquila cuwenta matu to Abrahanchi alica joe. Yucan yaca chunca ochu wata fecári pasuwanaminue yape teleca jun cuwenta nenasa. ¿Wari jasaino ma josatiya, yacanan manse suwano jotun? tinue.

17 Jesús tsantinasanan, yaca pa junlari luilainue. Uyanla mantimini son tinaminlanue ya duque seque quinun tenchi.

18 Junni Jesuri tsachilaca micarinato, itsanque cuenta polarinue:

—¿Diosi mantananun tsachi bolonca niyaque pantsan jun? tinue. 19 Mostasa tinun ni cuwenta jochunae tinue. Mostasa ni tsanini jotonan, witabi wacaito duque seramanhe. Chide pele tsansi seramanhe. Pichula titiya jun alibi tasen quino podeintsancari wa chide pele imanhe tinue. Junni Diosi ya mantananun tsachi bolonca serawonato, jun tsannan quichunae tinue.

20 Aman Jesús jun cuentaca polarisi itsantinue:

—Diosi mantananun tsachi bolonla niyan jonunca micarichun in cuentaca polarichinayoe tinue: 21 Aman sona manca bibu quichunae. Junni man arowa tsansi arina cato, aman lebaduracanan pochunae yape bibu ayancaisa. Junni jera seque palachunae yape lebadura jeralete palaisa. Junni Diosi ya mantananun tsachi bolonca jerale tote serawonato, jun tsannan quichunae tinue. Jesús tsanque micarinue.

22 Junni Jesús Jerusalenca jinaminnan, pueblolabi micaride nenaminue. 23 Junni tsachi manca yabe itsanque panhanue:

—Miya, ¿se larica junlari narin jolajochunan? tinue.

Junni Jesús yaca meráto, itsantinue:

24-25 —Diosichibi wino tamolan na foro tamolan joe tinue. Junbi wino tenfelaide! tinue. La nulabe tsarasica pachinayoe: Manca mate la, tsacumin joto, jun tamolanca doqueyanae tinue. Junni jun mate duque tsachila wichi tinatonan, podeilaituchunae tinue. Aman nulari urachi puraito otito, Miya, chiquilacanan pocade! latichunae tinue. Junni la, Miya joto, nulaca quiratumanyoe tiyanae tinue. Nunchi nechi jacala jonunca miitoyoe tiyanae tinue. 26 Junni nulari beconan pato, nube ano pefiyoe latichunae. Nu chiquilachi pueblobi micarie latichunae tinue. 27 Junni nula tsanlatinasanan, nulaca pato, nunchi nechi jacala jonunca natiya miitoyoe tiyanae tinue. Nula jeralela seiton quiminla joto, jachi jilaide! tiyanae tinue.

28 Junni nulachi matu to tatalaca Diosi mantananun tsachi bolonbi peranunca quiralaquichunae Abrahanca, Isaaca, Jacóboca. Jerale matu to Diosichi mantate paminlacanan junbi peraminlaca nula quiralaquichunae tinue. Nula mantimini urachi puraicala jochunae tinue. Junbi padeseinato fudachi warelaquichunae tinue. 29 Junni duque tsachila israelítala itotonan, Diosichibi pewilaichunae tinue. Uyanchi nechi, uyanchi nechi jato, yalanan Diosichibi pewito, mesabi chudito ano pefilaquichunae tinue. 30 Lari nulabe tsarasica pachinayoe tinue: Duque tsachila amana fe jominlatiya jun mate epe tsachila manjolajochunae tinue. Uyanlari amana epe tsachila jominlatiya jun mate fe jolajochunae tinue. Jesús tsanque micarinue.

31 Junni Jesús tsantinasanan fariséolari jato itsanlatinue:

—Nuri sujide! Miya Heróderi nuca totechi tinae latinue. 32-33 Aman Jesús yalabe manpato itsantinue:

—Heróderi encanaquica oco joe tinue. Junni meralaquede! Amananan, ayunanan yucanchi ocolaca mansularin, quiyanpunlaca manse suwan, quechinayoe tinue. Junni junhayuna jerano joyoe tinue. Tsannan Diosichi mantate paminla Jerusalénbisiri totailaichunae; junto amana, ayuna, junhayuna Jerusalenca jino joyoe. Junni nulari Heródechica manjito, la pacaca yabe jera manpolarilaquina! tinue.

34 Aman tsantisi, Jesús camicarinato itsantinue:

—Jerusalén puebloca duque laquiito wepananayoe tinue. Aman Jerusalenbi chuminla, nulari Diosichi mantate paminlaca toteminla joe. Diosi nulachica ereca junlacanan su walaca quito toteminla joe. Jana walpa ayanni náca panpe tenpe pocanun cuwenta lachinan nulaca layano muquiminhe tinue. Aman nulari, te, munaralaratiyoe tilatie tinue. 35 Junni amana Diosi nulaca jera telaquepoca joe. La Jerusalenbi winaminca Diosichi mantate janae tilatichunae tinue. Laca tsara sen joe tilatichunae. Junni aman nula Jerusalenla tsantino fecári laca manquiralaquituchunae tinue. Jesús Jerusalenbi chuminlabe tsantinue.

<- San Lucas 12San Lucas 14 ->