1 Aman junnasa Saulo mantimini Miya Jesucrístobe penenaminlaca duque pa canenaminue. Tsaracari toteyanaequesiri pato nenaminue. Tsan jominnan israelítalachi mantá tan patelechica jito, 2 yabe rocainue donun pilaca cuwasa. Junni donun pila casi, Damasco puebloca jinaminue. Jun puebloca jito, Diosichi fiqui miinun yabi ya donun pilaca mancuwano jominue. Junto Jesucrístobe penenaminlaca neyato féto catori, mantanjino jominue jun patelechi donun pilachi. Jesucrístobe penenaminlaca cato, Jerusalenca doquebi mantanjino jominue unilalacanan, sonalacanan.

3 Junni aman Saulo Damasco pueblo quelobi jinasa, jamochi nechi tiri cuwenta duque tsequiniquinue yachi awinta. 4 Junni Sáulori tobi queereito, fiquica meránue. Itsantinue:

—Saulo, Saulo, ¿nuri laca ti quichun seiton quinayun? tinue.

5 Ya fiquica merasi, Saulo itsantinue:

—Miya, ¿nuri moyun? tinue.

Junni beconan pato itsantinue:

—Jesúyoe tinue. ¿Ti quichun laca seiton quinayun? tinue. Laca seiton quinato, nu tencachiquenan fécari padeseinae tinue. Nuri calu chide teyanca terachi quimin cuwenta jochunae tinue.

6 Junni Saulo duque wepanachi jowinponato itsantinue:

—Miya Jesús, ¿la ti quino jowan? tinue.

Junni Miya Jesucrístori Sáulobenan itsantinue:

—Mancupato, puebloca jide! tinue. Junbi tsachi manca nube cuenta quichunae tinue ti quino jonunca.

7 Tsanhinasanan, Sáulobe pejinaminla jelechi pano podeitulajonue. Fiquica meránato, mocanantiya quiratulajonue. 8 Junni Saulo tobi nechi mancupato, caca mantsetonan, quirano podeiton inue. Junnan yaca tedele cato Damáscoca tanjilainue. 9 Junni peman ma fecári quirano podeiton, ano fitumin, pi cuchitumin, jominue.

10 Tsan josanan Damáscobi manca tsachi chuminue Ananías mumun. Yanan Jesucrístobe penenamin jominue. Junni Ananíachi quirajanasa Miya Jesucrístoca quiranue. Junni Jesucristo yabe pato, Ananías tinue. Junni Ananíari Miya tinue. Ina chuyoe tinue. 11 Junni Miya Jesucristo Ananíabe quiraito, itsantinue:

—Nuri cupato, Júdachi yaca jide! tinue. Ya Júdari Derecha tinun cayebi chue tinue. Junchi jito, Saulo tinunca panhade! tinue. Ya Saulo Tarso pueblobi nechi joe. Yari tsaina labe rocainae tinue. 12 Junni Sáulonan labe rocainasa, yachinan quirajaca joe tinue. Yachi quirajanasa, nuca janaminca quiraca joe. Nu yaca tedechi tale quebi janaminca quiraca joe tinue. Junni nu yaca tale quinunsi, Saulo manquirano podeichunae tinue. Sáulochi tsanque quirajaca joe tinue.

13 Junni Jesucristo yabe tsantica josa, Ananíanan beconan pato itsantinue:

—Miya Jesús, ya Sáulori seiton joe tinue. Yaca duque mera joe tinue. Jerusalenbi nuchi sen tsachilaca duque padeseisa carinaminue latie tinue. 14 Junni in pueblocanan jato, mantá tan patelelachi mantate jaca joe tinue nube rocaiminlaca cato jera dochun.

15 Miya Jesús mantimini Ananías tsantinunca tennatuto, yabe itsantinue:

—Nuri jiniide! tinue. Lari Sáuloca wentecayoe tinue. Yari laca cuenta polarimin jochunae. Uyan tobi chuminlabe, mantaminlabe, israelítalabenan laca cuenta polarimin pejochunae tinue. 16 Yaca micarichinayoe tinue yanan lachi tenchi duque padeseino joeque.

17 Junni Jesucristo tsantinunsi, Ananíari Júdachi yaca jinue. Junbi fesi, Sáuloca tedechi tale quito itsantinue:

—Aco Saulo, ¿nu janaminbe Miya Jesús quirainuco? tinue. Aman lanan Jesuchi joyoe tinue. Junni Miya Jesús ereca jun jayoe tinue yape nu manquirano podeisa. Junsi Diosichi Tencanan nuchibi jera pewichunae tinue.

18 Junni Ananías cuenta quinasaleri, Sáulochi cacabi nechi liquinan quiran bajinue. Tsanhinunsi manquirano podeinue. Junto mancupasi mumunhinue. 19 Junsi ano manfitobi, mansonbainue. Junni Damasco pueblobi Jesucrístochi tsachilabe nasi pechuminue.

20 Junni Saulo mansonbaisi, israelítala tala Diosichi fiqui miinun yabi winue. Junbi Jesuca paca fiquica micarinaminue Diosichi Nao joeque. 21 Aman junni junbi chuminla Saulo pánanunca meráto, jera wepanalaito itsantilatinue:

—¿Inni Jesucrístoca pa jomin tsachi jotun? latinue. Aman yari Jesube rocaiminlaca Jerusalenbi duque seiton quinaminue. Inchi janatonan, yalaca cabi janaminue tilatinue mantá tan patelelachica mantanjichun. Tsan jotori, ¿niyaito Jesucrístoca paca fiquica micariniquinan? latinue.

22 Tsanlatinasanan Sáulori fe seque pade pade jiniinaminue. Damáscobi chumin israelítalari yaca meráto, beconan manpano podeilaitunue. Tenca jera palaicala joto podeilaitunue. Saulo mantimini seque micarinaminue Jesús Diosi wenteca Cristo tinun tsachi joeque.

23 Junni Saulo numari micarinasanan, israelítala tenpalaquinue yaca totechun. 24 Junni aman jun pueblo awinta wa serica jominue tamo cuwenta. Junni israelítala jun serica tamolante quirato Sáuloca méraminlanue. Quepen, malon méraminlanue Sáuloca cato totechun. Saulo mantimini junca jera meránue. 25 Junni Jesuchi tsachilari yaca se larilaquinue yape totelaquitusa. Quepen nosa epele jun pueblobi nechi manlarilaquinue. Tsalabi poto, serica urachi manpatarilaquinue.

26 Aman Sáuloca manlarilaquinan, Jerusalenca manjinue. Junbi Jesuchi tsachilabe layaichique tenfenasanan, yalari jelechi facaritulajonue. Nene joe tito, Jesucrístochi tsachi iton jonhoe tilatinue. 27 Bernabé mantimini Sáuloca cato, Crístochi mantá tanlachica tanjinue. Junchi tanjito, Crístochi mantá tanlabe itsantinue:

—In Saulo minuse jinasanan Miya Jesús yabe quiraito cuenta quinue tinue. Junni Damasco pueblobi Jesuchi mantate seque jeleratuto micarinaminue tinue.

28 Junni Bernabé tsantinunbi, Saulo Jerusalenbi pechuto, yalabe penenaminue. 29 Miya Jesuchi mantate seque jeleratuto micarinaminue. Griego fiqui pamin israelítalabe pacaanaminue. Junni yalaman Sáuloca paito totechi tinaminlanue. 30 Junni Jesucrístochi tsachilari junca miito, Sáuloca Cesarea puebloca tanjito Tarso puebloca manherelaquinue yape yaca totelaquitusa.

31 Junte nechi Judea tobi, Galilea tobi, Samaria tobi, Jesucrístochi tsachi bolonla pansi chuto sonba tenca jera ilainue. Miya Diosica respetaito jelerato chuminlanue. Diosichi Tenca yalachi seque tenca cuwanan, serade serade jinaminlanue.

32 Junni aman Pedro jerale Jesucrístobe penenaminlaca quiradede nenaminue. Junto Lida pueblocanan jito, junbinan Diosichi sen tsachilaca quirabi jinue. 33 Aman junbi féto quiranari, jancan tsachi manca tsominue Eneas mumun. Ya Enéari wecaino podeituto, ochu wata fecári cupano podeiton tsominue. 34 Junni Pédrori yabe itsantinue:

—Eneas, Jesucristo nuca tsaina manse suwanae. Cupato, jalica mantepade! tinue.

Junni Pedro tsantinasaleri, Eneas mancupanue. 35 Junni jerale Lídabi chuminla, jerale Saronbi chuminla junca quirato, Miya Jesucrístobe cayailainue.

36 Junnasa mantimini Jope pueblobi Jesucrístobe penenamin sona manca chuminue Tabita mumun. Aman Griego fiquichi paminla yaca Dorcas timin jominlanue. Ya sona tsarasi seque quito, titiya itonlachi duque epe cuwamin jominue. 37 Aman Pedro Lídabi nenasanan, Tabítari duque quiyaito puyanue. Junni puyacaca pipiyarito, jamo tamobi tsorelaquinue. 38 Aman Jope pueblori Lida quelote joe. Junni Jesucrístochi tsachila meraca jominlanue Pedro Lídabi raeque. Junni paluca tsachilaca erelaquinue yape Pédroca we jade! latisa.

39 Pédrori junca merasi, yalabe pejinue. Junni Jópebi manfalainunsi, Pédroca jamo lowabi tanloto puyaca sona tsonunbi tanlolainue. Aman Tabita casonnaminnan, biudalachi tenchi duque camisa, panu, titiya quito epe cuwamin sona jominue. Aman Pédrochi awinta jun camisa tsanlaca quirawoto, wareto wiruilainue. 40 Junni Pedro mantimini piyanlelaca urachi lolaide! tito, mancasiri telenhito Diosibe rocainue. Junni Diosibe rocaitobi, ya sona puyacaca manquirato, itsantie:

—Tabita, mancupade! tinue.

Junni Tabítari caca mantsequiniquito, Pédroca quirato mansonhinue. 41 Junni Pedro yaca tedele cato mancuparinue. Junto biudalaca, Diosichi uyan tsachilaca, jeralelaca manhoticanue. Junto Tabítaca sonca yalachi manquirawonue. 42 Junni jerale Jópebi chuminla junca miito, layanla Jesucrístobe cayailainue. 43 Junni Simón Pedro Jope pueblobi numari fecári manca Simonbe pechuminue. Aman ya Simonni quidoca cato se suwamin jominue.

<- Mantá Tanla 8Mantá Tanla 10 ->