1-3 Junni Diosica tenca tan tsachila Esteban puyacaca duque laqui tito menalaquinue. Aman israelita mantaminla Estébanca totelaquinasa, Sáulonan yaca totenilaquede! petinaminue. Junni jun male nechi Jesucrístochi tsachila Jerusalenbi duque padeseilainue. Seitonla yalaca Jesucrístobe penenaminla jonun tenchi padeseisa carinaminlanue. Sáulonan Jesucrístobe penenaminlabe duque seiton pejominue. Jesucrístobe penenaminlachi ya cura wito, yalaca muricade larito tanjinue. Unilalacanan, sonalacanan cato jera donue. Junni Jesuchi tsachila ara cura jera jilainue Judea tobinan, Samaria tobinan. Crístochi mantá tanlasiri ara cura jilaitunue.

4 Junni aman Jesucrístobe penenaminla ara cura sujinato, Diosichi sen fiquica cuenta quedede jilainue. 5 Junni Felipe Samaria toca jito, pueblo máncabi wito, Jesucrístoca jera cuenta quinue. 6-7 Jun pueblobi yucanchi ocola duque tsachilachibi wica jominlanue. Junni Felíperi yucanchi ocolaca mansularinan, tsachilaca purato, sonba atide sujilainue. Felipe duque jancanlacanan, duque wecaino podeituminlacanan manse suwanue. Felipe tsanque wepanato quirantsancari seque quinaminue yape tsachila Diosica tenca calaquisa. Aman tsachilari junca jera quirato, Felipe pánanunca jera meráto, jeralela yaca seque meralaquinaminue. 8 Junni jun pueblobi chuminla tsara son tinaminlanue.

9 Tsan josanan jun pueblobi manca tsachi chuminue Simón mumun. Yari pone joto, duque podenyoe timin jominue. Jerale Samaria tobi chuminlaca wepanarinaminue. 10 Junni epe tsachilanan, mantaminlanan, yaca meraniquimin jominlanue. Ya pone tsachi Diosichi mantate duque sonba quimin joe latinue. 11 Ya Simón numarile nechi pone joto, yalaca encananaminue. Junnan yaca duque merámin jominlanue. 12 Junni Simón tsantin chusanan, Felipe Jesucrístoca cuenta quebi janue. Diosi ya mantananun tsachi bolon suwananuncanan micarinaminue. Junni duque tsachila, unilala, sonala, Felipe cuenta quinaminca quereito mumunhilainue. 13 Junsi Simonnan quereito mumunhito, Felípebe penenaminue. Felipe mantimini duque wepanato quirantsancari seque quinaminue yape tsachila Diosica tenca calaquisa. Junni Simonni junca quirato duque wepananue.

14 Junnasa mantimini Crístochi mantá tanlari Jerusalenbi chuto meralaquinue Samaria tobi chuminlanan Diosichi fiquica seque meralaquinueque. Junca meráto, Pédrobe Juánbeca junchi erelaquinue. 15 Junni Pédrobe Juanbe Samáriaca patito, Jesucrístobe penenaminlachi tenchi Diosibe rocailainue. Diosibe rocaito, nuchi Tencaca inlachibi erede! tilatinue yape yalachibi wito chusa. 16 Aman Diosichi Tenca yalachibi cawica itominue. Jesuchi icayoe titori mumunhica jominlanue. 17 Junnan Pédrobe Juanbe Jesuchi tsachilaca tedechi tale quilaquinue. Junni tsanquinan Diosichi Tenca yalachibi winue. 18 Aman Simonni junca jera quirato miito, aman Crístochi mantá tanlabe itsantinue:

19 —Lachinan tsanque mantá cuwade! tinue yape lanan mocatiya tedechi tale quinan Diosichi Tenca ya tsachichibi wisa. La cala cuwanae tinue.

20 Pedro mantimini ya Simonbe beconan manpato, itsantinue:

—Nu nuchi calabe yucapiyade! tinue. Diosi epe cuwanacaca calachi cantsan joeque tenca canun tenchi padeseichunae tinue. 21 Nuri natiya Diosichi tenchi titiya pequimin itoe tinue. Nu Diosibe seque nenatumin joe; epele tenca cato nenamin joe. 22 Junni in jutsaca telaquepoto, casan tala tenca mancade! tinue. Junsi Diosibe rocaide! Pansile seitonque tenca cananunca perdonaichunae tinue. 23 La nuca mirayoe tinue. Nuri fe mantá tachi tito, nuchi tenca duque seiton joe. Nuchi tenca jutsabe cadenachi telepoca jun cuwenta joe tinue.

24 Pedro tsantinunsi, Simón beconan pato itsantinue:

—Pedro, nulanan lachi tenchi Miya Diosibe rocailaide! tinue yape laca tsanque padeseisa caritusa.

25 Junni Pédrobe Juanbe Miya Jesucrístoca jera cuenta quetobi, Jerusalenca manjilainue Samaria tose poleto. Duque pueblobi wide wide jito, Jesucrístoca paca sen fiquica cuenta quedede manjilainue.

26 Junni Miya Diosichi anjeli Felípebe itsantinue:

—Wiruito jide! tinue. Nuri butunni tala jito, Gaza tinun puebloca jinun minuca jide! tinue.

Aman Gázaca jinun minuri niyanlanantiya chutunun postose polenun minu jominue. Jerusalenbi nechi Gaza fecári jinunhe. 27 Junni Felipe anjelichi fiquica merasi, wiruito jiniinue. Junni ya minuse jinasa quiranari, Etiopía tsachi jinaminue. Etiopía to miya sona Candace mumun jominue. Junni ya tsachiri Candácechi tenchi tesorero jominue eunuco tinun tsachi. Yari Jerusalén puebloca Diosibe rocaibi jica joto 28 manjinaminue. Calu muricanun carobi chudito, Diosichi Pilaca quiradede manjinaminue. Aman matu to tsachi Isaías mumun Diosichi mantate pila chuteca jominue. Junni Etiopía tsachi ya pilaca quiradede manjinaminue. 29 Tsan josanan, Diosichi Tencari Felípebe itsantinue:

—Ja carobe parejo parejo jinade! tinue.

30 Junni Felipe caroca sujito, Etiopía tsachica Diosichi Pila quiranaminca meránue. Isaías Diosichi fiqui chutecaca quiranaminue. Junni Felipe itsantinue:

—¿Jun pilabi niyan tinan? ¿Entendeinayun? tinue.

31 Junni Etiopía tsachi itsantinue:

—Monantiya micaritunari, miitiyoe tinue.

Tsantisi, nuri lade! Lato chudide! tinue. 32 Aman Isaías chuteca jun pilabi itsanque chuteca jominue:

—Nu pade! tinue. ¿Mo tsanque padeseino jun? tinue. ¿Isaías patsa, o uyan? tinue.

35 Junni Felipe yabe tulanto cuenta quito, Jesuca paca joe tinue. Ya tsanque padeseica joe tinue.

Junni Felíperi casale Isaías chutecaca cuenta quito, junsi Jesuca paca sen fiquica jera cuenta quinue. 36 Junni minuse jinaminnan, pi quelole polelainue. Junni Etiopía tsachiri itsantinue:

—Quirade! Ina pi poe tinue. ¿Lari mumunhino podeino joinhin? tinue.

37 Junni Felíperi itsantinue:

—Nuchi tencabi Jesucrístobe jera cayaitori podeichunae tinue.

Junni Etiopía tsachiri manpato, Jesucristo Diosichi Nao joeque quereiyoe tinue. 38 Tsantisi, caroca tsoresa carito, Felípebe Etiopía tsachibe pibi patilainue. Pibi wito, Felipe yaca mumunnue. 39 Junni pibi nechi manlonaminnan, Felipe piyapoleniinue. Miya Diosichi Tenca yaca piyapolarinan, Etiopía tsachi Felípeca manquiratunue. Etiopía tsachi mantimini son tide manjito polenue. 40 Junni Felíperi Azoto pueblobi manquirainue. Junsi Azótobi nechi Cesarea puebloca jinue. Junni Cesaréaca jinato, pueblo cura Jesucrístoca paca sen fiquica micaridede jinue.

<- Mantá Tanla 7Mantá Tanla 9 ->