1 Junni aman manca tsachiman jominue Ananías mumun. Yachi sonari Safira mumun jominue. Aman yalaman to osilaquinue. 2 Junto cala casi, Ananías weyanca nosa larito, jun puchuca Crístochi mantá tanlachi cuwato, jera cuwanayoe tinue. Yachi sonanan miraminue ya weyan calaca nosa laricaya joeque. 3 Junni Ananías jera cala cuwanayoe tinunsi, Pédrori yabe itsantinue:

—Ananías, nuri to tenchi cala cato, weyan calacari tsato, inni jera joe tito cuwanae tinue. Nuri Diosichi Tencabenan nene pánae. ¿Aman niyaito Satanás nuca tsanque encanasa carinan? 4 Ya toca caosituminnan, nu tsacumin jominue. Aman ositobinan, nunan calaca tsacumin jominue. ¿Junni ti quichun nene pano tenhiyun? Nuri tsachilaberi nene patue; Diosibenan nene pae tinue.

5 Junni Pedro tsantinaminca meráto, Ananías puyaca queereinue. Junni jerale junca meráminla duque jele tilatinue. 6 Junni Ananías puyanunsi unila tsachila jato, ya puyacaca lapito menabi tanjilainue.

7 Junni peman órate Ananíachi sonaman janue. Yachi unila puyaca joeque miituto janiinue. 8 Junni Pedro yabenan itsantinue:

—¿Nulachi toca tsansiteri osilaquiyun? tinue.

Junni ya sonari tsansitere tinue. 9 Pedro mantimini beconan pato, itsantinue:

—¿Ti quichun nula palunan Miya Diosica tsanlaquinayun? Nula miichi tinaminlanue Diosichi Tenca nisi fecári jutsa tenchi casticaquituminnan wantaino jonunca. Junni meráde! tinue. Nuchi unila puyan ococa menaminlari tamolante merará manjalainae tinue. Junni nucanan menabi tanjilaichunae tinue.

10 Pedro tsantinunsi, ya sonari Pédrochi nedele queereito puyanue. Junni unila tsachilanan manwito, ya sona puyacacanan cato, yacanan tanjito, yachi unila puyan ocochile menalaquinue. 11 Junni jerale Jesucrístobe cayaica junla junca jele tinaminlanue. Uyanlanan junca meráto jeralela jele tinaminlanue.

12-14 Jerale Jesucrístobe penenaminla Diosichi yabi layaimin jominlanue Salomonchi tinun postote. Uyanlari Jesucrístochi tsachilabe layaino jeleratonan, yalaca sen jolajoeque cuenta quinaminlanue. Juntonan nantanancari fe tsachila Miya Jesucrístobe cayainaminlanue sonala, unilala. Junni tsachila quiralaquinasa Crístochi mantá tanlari duque wepanato quirantsancari seque quinaminlanue yape Diosica tenca calaquisa. 15 Junni tsachilari quiyanpunlaca minu quelote tanjato tsoremin jominlanue. Weyanlacari cuyanbi, weyanlacari lowa tsanbi tanjalainue. Pansile Pedro polenasanan, yachi ocopinchube doilaitotiya manseilaichunae latinue. 16 Aman quelole pueblobi nechinan quiyanpunlacanan, yucanchi ocobe padeseinaminlacanan Jerusalenca tanjalainue yape manseilaisa. Junni jerale tanjaca junla manseilainue.

17-18 Tsantin nenalarasanan, fe mantá tan pateleri yachi tsachilabe Crístochi mantá tanlaca pailainue. Aman ya patelebe penenaminla saduseo tinun israelítala jominlanue. Junni yala jeralela Crístochi mantá tanlaca pailainue uyan israelítala ya patelelaca telaquepoto Crístochi mantá tanlaca fécari meralaquinaeque. Junto Crístochi mantá tanlaca cato dolaquinue yape wari tsachilaca nantari micarilaquitusa. 19 Junni doralarasanan, jun quepente Miya Diosi yachi anjelica erenue yape doranun tamolanca lasito cuwasa. Junni anjeliri Crístochi mantá tanlaca donun yabi nechi larisi, yalaca itsanque mantanue:

20 —Diosichi yaca jilaide! tinue. Junbi wiruito tsachilaca Diosibe pesonnanoca jera micaride! tinue.

21 Junni tsantinunca meráto, aman mantseinunsi Diosichi yabi manwito micarinaminlanue. Junnasa mantá tan patelebe yachi tsachilabe jerale israelita mantaminlaca layalaquinue. Junto jera layaitobi, donun yaca fiqui erenue yape Crístochi mantá tanlaca manlarito tanjalaisa. 22 Junni polisiala donun yabi féto quiranari, Crístochi mantá tanlari itominlanue. Junca quirasi, mantá tan patelechica manjito, 23 itsanlatinue:

—Chiquila féto quiranari, donun yari sequenan doraminue latinue. Quiramin polisialanan tamolante quirato wiruraminlanue latinue. Junni aman tamolan manlasito quiranari, fu tamo jominue latinue.

24 Junni capitanbe mantá tan patelelabe ya fiquica meráto, duque wepanato, ¿Niyanhichunancan? tilatinue. 25 Tsanlatinasa mantimini, tsachi manca yalachica jato itsantinue:

—Nula doca jomin tsachilari Diosichi yabi tsachilaca manmicarilaquinae tinue.

26 Junca merasi, capitanbe polisialabe Diosichi yaca manjito, Crístochi mantá tanlaca manan mancato tanjilainue. Aman yalaca canatonan, uyan tsachilaca jelechi natiya sonba catulajonue chiquilaca pansile su walaca tala quilaquichunae tito. 27 Junni Crístochi mantá tanlaca mantanjato, israelita mantaminlachibi tanwilainue. Junni fe mantá tan pateleri yalabe 28 itsantinue:

—Chiquilari nulaca duque sonba mantalaquiyoe tinue Jesuchi mantate natiya manmicarilaquitunaque. Tsantica josanan, nulari jerale Jerusalenbi chuminlaca micarinilaquinae tinue. Junsi chiquilacanan culpa quichi latinae tinue Jesuca totesa caricalaeque.

29 Pédrobe uyan Crístochi mantá tanlabe beconan pato, ya mantaminlabe itsanlatinue:

—Chiquilari tsachilacari merátuto, Diosicasiri meránola joyoe latinue. 30 Nulari Jesuca corosibi totesa carica josa, chiquilachi matu tatalachi Diosinan yaca mansoncarinue tinue. 31 Junsi yaca jamochi laricanue tinue yape yachi tsa tede nanchi pemantato chusa. Junni Jesús jamochi chuto, israelítalaca yalachi jutsaca jera telaqueposa carino munarae. Yari nulachi jutsaca piyarino podeichunae. 32 Aman chiquilari junca jera mirato, Diosichi tenchi tsanque cuenta polariniquinayoe. Diosichi Tencanan junca jera mirato, yanan tsachilaca tsarasi fiqui joeque tenhisa carinae. Junni Diosi yaca meráminlachica yachi Tencaca eremin joe tinue yape yalachibi wito chusa.

Junni Pedro jun fiquicari cuenta polarinue. 33 Jun fecári meralaquinaminnan, israelita mantaminla Pédrolaca duque paito totechi latinue. 34 Junni totechi latinasa, manca mantamin tsachiri cuenta quichun wiruinue. Yari fariséolachi bolon israelita joto, yala tala mantaca micarimin jominue. Gamaliel tinun mumun jominue. Jeralela yaca duque respetaimin jominlanue. Junni ya mantimini Pédrolaca urachi moora larisa carito, 35 weyan mantaminlabe itsantinue:

—Israelita tsachila, nulari ya Jesube penenaminlaca tsarasica tencabe nenalarana! tinue. Seque tenca catuminnan tína tede potulajona! tinue. 36 Aman meralaquede! Matulenan Teúda tinun tsachi mantamin joyoe tide janue tinue. Junpalu patsa tsachila tsansi yabe penenamin ica jominlanue. Junni ya Teúda totainunsi, yabe penenaminlari ara cura jera jilainue tinue.

37 Aman Teúdachi benete Judas tinun tsachiman Galilea tobi nechi janue. Senso quinasanan janue. Weyan tsachila yabenan penenamin ica jominlanue. Junni yanan tsanquenan totainunsi, yabe penenaminlanan ara cura jera jilainue.

38 Junto ya Jesucristo tinunbe penenaminlaca telaquede! tiyoe tinue. Tede tína potulajona! Tsachilachi mantatesiri micarilaquinatori, o tsachilachi mantatesiri manse suwato nenalaratori, yalanan epele ara cura jera jilaichunae tinue. 39 Junni pansile Diosichi mantate micariminla jonari, chiquilari yalaca numanan fe lono podeicaituchunae tinue. Fe lochique tenfelainatori, pansile Diosichi contranan jono paticaichunae tinue.

40 Junni jerale mantaminla ya pacaca meráto, seque pae tilatinue. Junto Crístochi mantá tanlaca tamochi manwiyasa carito, yalaca asotaquisa carito, Jesuchi mantate nantari micarilaquitunaque mantato, manherelaquinue. 41 Junni tsanque padeseitobi, ya mantaminlachibi nechi duque son tide manlolainue. Diosi yalaca Jesuchi tenchi padeseisa carica jominue. Jun tenchi yalari son tito Diosibe acradeseilainue. 42 Junni ma cura Jesucrístoca pato micarinaminlanue weyante Diosichi yabi, weyante tsachilachi yabi.

<- Mantá Tanla 4Mantá Tanla 6 ->